U intervju polskamu vydańniu Na:Temat były ministr kultury i pasoł, a ciapier kiraŭnik Narodnaha antykryzisnaha ŭpraŭleńnia, pradstaŭnik Abjadnanaha pierachodnaha kabinieta pa pytańniach tranzitu ŭłady Pavieł Łatuška raskazaŭ pra pahrozy z boku aficyjnych uład Biełarusi jamu i inšym lidaram demakratyčnaha ruchu.

Palityk adznačyŭ, što demakratyčnyja siły Biełarusi atrymali infarmacyju ab tym, što na bazie hałoŭnaha raźviedvalnaha ŭpraŭleńnia Ministerstva abarony Biełarusi ŭ asabliva sakretnych umovach pad Minskam prajšła śpiecyjalnuju padrychtoŭku hrupa z 5-7 śpiecyjalistaŭ dla praviadzieńnia dyviersij na terytoryi Polščy i Litvy.

Pa słovach Łatuški, jamu «dali ich uzrost, rost i koler vačej». Hetyja ludzi «prajšli snajpierskuju padrychtoŭku ŭ składanych umovach nadvorja. Jany rychtavalisia paasobku i nie viedali adzin adnaho».

«Naš infarmatar papiaredziŭ nas, što metaj moža być likvidacyja jak mianie, tak i pałkoŭnika Sachaščyka, jaki źjaŭlajecca siabram kabinieta Śviatłany Cichanoŭskaj. My razumiejem, što jany mohuć pracavać u roznych śfierach», —

havoryć palityk i, spasyłajučysia na słovy infarmatara, śćviardžaje, što hetyja ludzi pierasiekli miažu Polščy i Litvy i mohuć znachodzicca ŭ Jeŭrasajuzie.

Hetaja historyja całkam supadaje z dopisam kanśpirałahičnaha telehram-kanała «Biełaruskaja vyviedka», apublikavanym u sakaviku 2024 hoda.

Čytajcie taksama:

Adkul Sachaščyk čerpaje insajdy pra jadziernuju vajnu? Jany supadajuć z dopisami kanśpirałahičnaha telehram-kanała

Łatuška śćviardžaje, što jamu niadaŭna napisali: «Ty jašče žyvy, Navalny maje miesca kala siabie».

Jon pryhadvaje padziei 2020 hoda: «Mianie vyratavali dziakujučy pasłam Polščy i Litvy. Heta była šaścihadzinnaja razmova. I jany mianie ŭpeŭnili, što ŭ mianie niama inšaha vybaru, jak źjechać. Ja hetaha nie chacieŭ».

Na zaŭvahu žurnalistki ab tym, što ciapier takoj mahčymaści nie było b, palityk adkazaŭ: «Moža, užo navat i nie žyŭ by».

Na pytańnie, ci zdradziŭ Łatuška Łukašenku, jon adkazaŭ:

«Pa jaho mierkavańni ja chiba što zdradziŭ. Ale, jak by pafasna heta ni hučała, ja nie zdradziŭ svajoj krainie i nacyi. Jak jašče my mahli dziejničać, kali pabačyli takija hvałt i cisk? Źbivańnie, katavańni, zabojstvy ludziej. Maštab byŭ vielmi strašny.

Palityk raskazaŭ, što aficer słužby achovy Łukašenki skazaŭ jamu: «Ty pavinien razumieć, što źjaŭlaješsia dla Łukašenki voraham №1, ty byŭ ministram. Jon ličyć, što heta dziakujučy jamu ty staŭ ministram, što jon ciabie pryznačyŭ svaimi ŭkazami».

«Jon skazaŭ, što Łukašenka mnie hetaha nikoli nie daruje. Pakul jon žyvy, jaho metaj budzie mianie likvidavać. Kłasičny mietad — atručeńnie», —

havoryć Łatuška i zhadvaje:

«U 2019 hodzie była situacyja, kali ja piŭ kavu ŭ restaranie padčas sustrečy z čałaviekam, blizkim da Łukašenki. Potym ja dva dni byŭ biez prytomnaści. Ja daviedaŭsia, što ŭ 2017 hodzie biełaruski KDB atrymaŭ śpiecyjalny preparat, jaki dazvalaje parazmaŭlać z čałaviekam, ale jon potym ničoha nie pamiataje».

Hety vypadak Łatuška źviazvaje sa źjaŭleńniem u niezaležnych miedyja jaho proźvišča siarod mahčymych kandydataŭ na budučych prezidenckich vybarach. «Jany dumali, što ja viadu na Zachadzie pieramovy ab źviaržeńni Łukašenki».

Čytajcie taksama:

Łatuška źviarnuŭsia ŭ Kamisiju finansavaha nahladu Polščy ŭ suviazi z bankam Santander

Uviečary ŭ kvaterach kandydataŭ u KR ad błoku Łatuški i Ruchu «Za svabodu» prajšli pieratrusy

Ci źmienicca situacyja ź vizami i jak jašče možna budzie karać siłavikoŭ, što zapeckalisia katavańniami — raskazvaje Łatuška

Клас
8
Панылы сорам
7
Ха-ха
13
Ого
7
Сумна
7
Абуральна
30