Aŭtar fota: Stefan Coders/pexels.com

Aŭtar fota: Stefan Coders/pexels.com

U Biełarusi pierastaŭ pracavać šerah bujnych VPN-pravajdaraŭ. Adbyłosia heta praz toje, što pačałosia hałasavańnie ŭ Kaardynacyjnuju radu.

Pa źviestkach «Kibierpartyzanaŭ», błakujuć pakul što tolki mabilny trafik. U kamientarach niekatoryja čytačy paviedamili, što VPN nie pracavali i ŭ sietcy Byfly.

Jak błakujuć VPN?

Ahułam, u śviecie ŭžyvajucca dva asnoŭnyja sposaby błakavańnia VPN. Heta abo «punktavaje» błakavańnie viadomych adrasoŭ, jakimi karystajecca siervis, abo poŭnaje błakavańnie pratakołaŭ, pa jakich kampjutar dałučajecca da VPN.

Druhi sposab u Biełarusi vykarystoŭvajecca redka i nie «ŭklučajecca» nazaŭždy. Reč u tym, što VPN karystajucca nie tolki prychilniki demakratyčnych siłaŭ ci aktyvisty, ale i dziaržaŭnyja orhany dy bujnyja kampanii, asabliva ŭ IT-śfiery (jany «pradajuć» svaich supracoŭnikaŭ jak rełakantaŭ). U hetym vypadku mocna b paciarpieła ekanomika biez surjoznaj pierabudovy ŭsioj internet-ekasistemy, što vielmi doraha.

Tamu zvyčajna vykarystoŭvajecca sposab błakavańnia pa adrasach. Praściej zabłakavać tak zvanyja API damieny. Kali vy dałučajeciesia da VPN, to jon spačatku «stukajecca» da siervieraŭ, jakija vydajuć danyja da padklučeńnia da VPN. Ich davoli lohka adšukać, a ŭ bujnych pravajdaraŭ jany daŭno viadomyja.

Taksama ŭ Rasii (u Biełarusi hetaha pakul nie adbyvajecca) pačali błakavać i siaredniaj viadomaści siervisy. Kali šmat ludziej złučajucca z adnym i tym ža siervieram i ŭstaloŭvajuć ź im VPN-złučeńnie, to jaho błakujuć.

Minus hetaha padychodu ŭ tym, što efiektyŭna možna zabłakavać tolki bujnyja i siarednija sierviery i servisy. Nievialikija i stvoranyja ŭłasnaručna zabłakavać davoli składana.

Udakładnieńnie. Niekatoryja našy čytačy paviedamili, što, padobna, błakujucca pratakoły całkam. Kali ŭ vas nie pracuje anijaki VPN — skarystajciesia adrazu inšymi sposabami abychodu błakirovak.

Što rabić, kab abyści błakavańnie VPN?

My padrabiazna pisali pra heta ŭ našym raniejšym ahladzie, ale miarkujem, što varta paŭtaryć hetuju infarmacyju karotka.

Varyjanty dva — znajści inšy VPN abo skarystacca siervisami, admysłova stvoranymi dla abychodu błakirovak.

Kali vy karystalisia zabłakavanym servisam, to možacie pašukać inšy. Isnuje hetaja tablica, dzie paraŭnoŭvajucca bolš za 190 siervisaŭ. Niekatoryja ź ich užo nie pracujuć, ale varta vyvučyć jaje padrabiazna.

Za bolšaść dobrych VPN daviadziecca zapłacić. Śpis VPN, jakija ličać nadziejnymi pravaabaroncy — tut.

Kali vam nie pasuje varyjant sa zvyčajnym VPN, to skarystajciesia servisami dla abychodu błakavańnia. Samyja viadomyja i nadziejnyja: Tachyon (spasyłki dla Android, IoS i Mac), TOR (instrukcyja pa abychodzie błakavańnia), Lantern (Android, IoS) i Psiphon.

Kali sajty servisaŭ zabłakujuć, to jość mahčymaść spampavać klijent praz paštovy zapyt. Dla TOR dašlicie e-mail z nazvaj vašaj apieracyjnaj sistemy (Windows, Android, Mac, Linux) na adras [email protected]. Dla Psiphon dašlicie pusty list na adras [email protected].

Taksama niekamiercyjnaja arhanizacyja Roskamsvaboda raspracavała admysłovy dadatak dla braŭzieraŭ dla abychodu zabaronaŭ. Jon dastupny dla Firefox i Chrome.

Taki ž dadatak stvaryŭ inšy čałaviek, ale jon mienš papularny i my nie viedajem, kab jaho niechta praviaraŭ. Zatoje jon dastupny dla Firefox, Edge, Opera i Chrome.

Taksama vy možacie stvaryć ułasny VPN-siervis. Tut my tłumačyli jak heta zrabić z dapamohaj Outline abo Amnezia.

Inicyjatyva CyberBeaver raić mieć niekalki siervisaŭ adrazu, kab možna było siarod ich pieraklučacca. «Kibierpartyzany» paraili šukać niezabłakavany VPN mietadam pieraboru abo skarystacca TOR.

Nie varta zamiest VPN karystacca noŭnejm-siervisami z Google Play abo pieršaj spasyłki Google

Karystacca noŭnejm-siervisami z Google Play abo pieršaj spasyłki Google nie varta. Jany mohuć pierapradavać vašy źviestki, być nienadziejnymi abo fišynhavymi, h.zn. kraści vašy źviestki i paroli.

Čytajcie taksama:

U Rasii masava błakujuć VPN-siervisy. Što rabić, kali pačnuć i ŭ nas?

Jak ułasnymi rukami stvaryć VPN-siervier, jaki ciažka budzie zabłakavać — padrabiazny hajd

Jak čytać niezaležnyja ŚMI i nie padstaŭlacca — padrabiazny hajd

Mnohija VPN źbirajuć danyja i mohuć pieradać ich siłavikam. Raskazvajem, jak ad hetaha abaranicca i pieraličvajem nadziejnyja biaspłatnyja VPN

Клас
24
Панылы сорам
8
Ха-ха
7
Ого
4
Сумна
7
Абуральна
11