Jašče adna sproba zapałochać Zachad. Navošta Pucin pryjazdžaŭ u Minsk

Papiaredni raz Uładzimir Pucin naviedaŭ Biełaruś z pracoŭnym vizitam u śniežni 2022 hoda. Była, praŭda, jašče jahonaja pajezdka na samit ADKB u Minsk u listapadzie letaś. I voś ciapier niečakana pryjechaŭ iznoŭ.

Pres-słužba Alaksandra Łukašenki nazyvaje hety vizit «aficyjnym». A na sajcie prezidenta Rasii status vizitu nie paznačany. Łukašenka sustrakaŭ Pucina ŭ aeraporcie, što robić davoli redka padčas naviedvańnia navat vysokich haściej.

Nijakaj praktyčnaj nieabchodnaści ŭ hetym pryjeździe rasijskaha prezidenta nie było. Pucin i Łukašenka sustrakajucca davoli časta. Dziela hetaha ŭ Maskvu nakiroŭvajecca sam Łukašenka. Apošnija razy jon byŭ tam 11—12 krasavika i na pačatku traŭnia. Napiaredadni paradu 9 traŭnia ŭ stalicy RF Łukašenka i Pucin pieramaŭlalisia da troch hadzin nočy.

Tamu možna śćviardžać, što ciapierašni vizit u Biełaruś prezidenta Rasii — demanstratyŭny.

Jon dasyłaje dva miesiedžy. Pavodle mižnarodnaj tradycyi, novaabrany kiraŭnik dziaržavy ładzić pieršy vizit u krainu, jakaja najbolš važnaja z hledzišča nacyjanalnych intaresaŭ. Heta demanstracyja pryjarytetu ŭ zamiežnaj palitycy. Apošnija čverć stahodździa prezidenty Rasii adrazu paśla abrańnia pieršy vizit, jak praviła, ładzili ŭ Minsk. Bolš taho, navat rasijskija premjer-ministry paśla pryznačeńnia najpierš naviedvali biełaruskuju stalicu.

Hetym razam paśla inaŭhuracyi Pucin pajechaŭ u Kitaj. U Kramli sychodzili z łohiki, što Biełaruś nikudy nie dzieniecca, Łukašenka kryŭdavać nie budzie, jamu niama kudy biehčy z padvodnaj łodki. A ad pazicyi Kitaja dla Maskvy šmat što zaležyć. Palityka Piekina adnosna vajny Rasii suprać Ukrainy ŭ značnaj stupieni źjaŭlajecca vaharom, jaki moža, jak ličać u Kramli, mocna ŭpłyvać na staŭleńnie da hetaha kanfliktu z boku suśvietnaj supolnaści.

A voś druhi vizit Pucinu treba było ładzić u Miensk, inšych varyjantaŭ tut niama. Inakš jaho nie zrazumieli b nie tolki ŭ Biełarusi, ale i ŭ samoj Rasii, u blizkim zamiežžy. Kali chto nie zrazumieŭ, to Łukašenka heta asabliva padkreśliŭ padčas sustrečy darahoha hościa ŭ aeraporcie: «Paśla vybaraŭ heta adzin ź pieršych vizitaŭ. Paśla Kitajskaj Narodnaj Respubliki — našych siabroŭ». Na heta źviarnuŭ uvahu i Pucin padčas zaklučnaj pres-kanfierencyi.

Tamu vizit vyhladaje jak demanstracyja dobrazyčlivaści Pucina da svajho adzinaha sajuźnika. Bo sajuźnik padčas vajny doraha kaštuje i ŭ palityčnym, i ŭ finansavym sensie. Taksama važna źviarnuć uvahu, što Pucin pryjechaŭ nie adzin, a z uradavaj delehacyjaj, u składzie jakoj novy ministr abarony Rasii Andrej Biełavusaŭ, ministr zamiežnych spraŭ Siarhiej Łaŭroŭ, inšyja vysokija čynoŭniki.

A druhi miesiedž — voraham, to bok Zachadu, Ukrainie.

Vajna, jakuju viadzie Rasija, dasiahnuła kulminacyi. Abodva baki robiać kroki, kab prademanstravać siłu i rašučaść da pieramohi. ZŠA razmarozili vialiki pakiet dapamohi Ukrainie. Zachad razam z ukrainskim kiraŭnictvam ładziać vialikuju kanfierencyju ŭ Šviejcaryi, jakaja, pavodle zadumy, pavinna sfarmavać antyrasijskuju kaalicyju.

Maskva robić kroki ŭ adkaz. Heta i vizit Pucina ŭ Piekin, i płany adnabakovych źmienaŭ Rasijaj marskich miežaŭ u Bałtyjskim mory.

I, moža, hałoŭny krok. 6 traŭnia Minabarony Rasii abjaviła ab vučeńniach u spravie prymianieńnia taktyčnaj jadziernaj zbroi (TIAZ). Na druhi dzień ministr abarony Biełarusi Viktar Chrenin zajaviŭ, što Biełaruś praviadzie sinchranizavanuju z Rasijaj treniroŭku. 9 traŭnia Pucin i Łukašenka paviedamili, što Biełaruś dałučycca da Rasii na druhim etapie vučeńniaŭ pa adpracoŭcy prymianieńnia taktyčnaj (niestratehičnaj) jadziernaj zbroi.

Sihnał Zachadu davoli prazrysty: pamachać pierad ich tvaram jadziernaj dubinaj. Abodva dyktatary prahavaryli heta adkrytym tekstam. Łukašenka anansavaŭ paradak dnia pieramovaŭ tak: «Dumaju, jak zvyčajna, my pytańni biaśpieki — na pieršy płan».

Pucin paćvierdziŭ płany abmierkavać z Łukašenkam vučeńni pa prymianieńni niestratehičnaj jadziernaj zbroi: «Pahavorym, viadoma, i pra druhuju fazu vučeńniaŭ. Heta źviazana z pramym udziełam našych biełaruskich siabroŭ, kaleh u vajennaj śfiery ŭ hetych mierapryjemstvach».

Varta źviarnuć uvahu, što TIAZ — heta zbroja łakalnaha prymianieńnia. Joj niemahčyma pahražać, naprykład, ZŠA ci navat Zachodniaj Jeŭropie. Jaje nośbity nie praduhledžvajuć vykarystańnia na dalokich adlehłaściach. Tamu, kab pahražać, treba nablizić punkty dysłakacyi TIAZ bližej da vorahaŭ. I ŭ ciapierašnich umovach Biełaruś — aptymalnaje miesca, jakoje nadaje Rasii stratehičnuju hłybiniu ŭ supraćstajańni z NATA. Jość mahčymaść pahražać Łatvii, Litvie, Polščy, Ukrainie.

Sumiesnyja vučeńni Biełarusi i Rasii ŭ spravie prymianieńnia TIAZ — heta sproba Maskvy zapałochać Zachad, adlustravańnie kursu na eskałacyju, demanstracyja taho, što Rasija idzie na padvyšeńnie stavak u vajnie, hatovaja ŭžyć jadziernuju zbroju i rychtujecca ŭžo da jaje praktyčnaha vykarystańnia.

Nievypadkova na vynikovaj pres-kanfierencyi pieršym pytańniem biełaruskaj žurnalistki była jakraz tema hetych vučeńniaŭ. Łukašenka adznačyŭ, što 90% času sustreč z Pucinym pryśviečanyja pytańniam abarony.

Što da astatnich temaŭ pieramovaŭ, to tut ciažka ŭłavić niejkuju kankretyku, va ŭsialakim razie, u publičnaj prastory. Było šmat pafasu, rytuału, što stanie chiba što dobrym materyjałam dla prapahandy abiedźviuch krain.

• 8
• 0
• 10
• 3
• 2
• 5
• 35
• 0