Znakamity hmach u centry Varšavy śviaciŭsia sinim — pryčym tut Prakopjeŭ?

Pałac navuki i kultury ŭ samym centry Varšavy — upadabanaja fotazona ŭsich haściej i žycharoŭ horada. Budynak, jaki vielmi nahadvaje hmachi MDU, MZS i anałahičnyja žyłyja damy ŭ Maskvie, paśla vajny byŭ pabudavany jak «padarunak SSSR polskamu narodu».

Hety hmach — nie tolki architekturnaja daminanta centra polskaj stalicy i pryčyna lutych sprečak na temu «znosić ci nie znosić», ale jašče i svojeasablivy majak. Časam na pałacy źjaŭlajecca jarkaje kalarovaje padśviatleńnie, kali jość hodnaja nahoda.

Tak, na Dzień niezaležnaści i inšyja vialikija dziaržaŭnyja śviaty stalinka afarboŭvajecca ŭ bieła-čyrvonyja kolery polskaha ściaha. A 9 žniŭnia pałac na adzin viečar stanovicca biełaruskim — u bieł-čyrvona-biełych kolerach. Takim čynam ułady Varšavy demanstrujuć salidarnaść ź biełaruskim demakratyčnym rucham. U Suśvietny Dzień Ziamli hmach zvyčajna padśviatlajecca biełym, a, naprykład, u dzień raspaŭsiudžvańnia infarmacyi ab VPČ — fijaletavym.

Uviečary ŭ niadzielu adzin z bakoŭ budynka afarbavaŭsia ŭ sini koler. Nijakich śviataŭ abo mižnarodnych akcyj u hety dzień nie było. Na sens hetaj padśvietki ničoha nie pakazvała. Ale nieŭzabavie stała viadoma, što padśviatleńnie źviazana ź Biełaruśsiu.

Ranicaj u paniadziełak Błok Prakopjeva-Jahorava, jaki ŭdzielničaje ŭ vybarach u Kaardynacyjnuju radu, raspaŭsiudziŭ zvarot śpikiera KR Andreja Jahorava. Jon pramaŭlaŭ na fonie pałaca, jaki śviaciŭsia sinim. I zajaviŭ, što stalinka «stała Majakom biełarusaŭ śvietu». Jahoraŭ u zvarocie padziakavaŭ za padtrymku i vyrašeńnie pytańnia z padśvietkaj prezidenta Varšavy Rafała Tšaskoŭskaha.

«Naša Niva» spytała ŭ inšaha lidara błoka Vadzima Prakopjeva pra mety hetaha pierfomansu. Hramadski dziejač adkazaŭ koratka:

«Navošta my padśviatlili hmach u Varšavie? Kab našyja ŚMI ŭbačyli narešcie vybary, jakija va ŭpor admaŭlajucca zaŭvažać. Kab raspaviali pra prahramy kožnaha śpisu, i kab rehularnyja debaty pravodziŭ nie ŭkrainski błohier, a našyja demakratyčnyja niezaležnyja ŚMI».

Na pytańnie ab tym, kolki kaštavała takoje padśviatleńnie, u štabie błoka adkazvać nie stali. Sam Prakopjeŭ na debatach z Paŭłam Łatuškam raspavioŭ, što na padśvietku «skinulisia pa 12 dalaraŭ usie ŭdzielniki śpisa». Nam viadoma, što dla arhanizacyi hetaj akcyi daviałosia prajści šmat uzhadnieńniaŭ z haradskimi ŭładami. Pytańnie sapraŭdy dajšło da kiraŭnika horada, jaki dazvoliŭ padśviatlić Pałac navuki i kultury ŭ kolery Błoka Prakopjeva-Jahorava.

Pavialičyć

Vybary ŭ Kaardynacyjnuju radu projduć anłajn 25-27 traŭnia. Hałasavać možna budzie tolki pry najaŭnaści sapraŭdnaha abo praterminavanaha biełaruskaha pašparta.

U vybarach udzielničajuć 12 vybarčych śpisaŭ: «Salidarnaść» Hieorhija Dźmitruka, «Vola» Vadzima Kabančuka, «Jeŭrapiejski vybar» Alaksandra Dabravolskaha, «Naša sprava» Rozy Turanbiekavaj, «Zakon i pravaparadak» Alaksandra Azarava, «Nołas dyjaspar — adzinstva nad miežami» Nadziei Nortan, «Niezaležnyja biełarusy» Maksima Šabuckaha, Błok Prakopjeva-Jahorava, kamanda Łatuški i ruch «Za Svabodu», «Chopić bajacca» Taćciany Martynavaj, «Kraina dla žyćcia» Vitala Saviuka i «Moładzievy nastup» Lizaviety Prakopčyk.

• 21
• 0
• 4
• 32
• 2
• 3
• 5
• 0