Čamu ŭ biełaruskich lasach stała tak šmat klaščoŭ? Asnoŭnyja pryčyny dźvie
Mnohija z rybakoŭ, hrybnikoŭ i inšych amataraŭ adpačynku na pryrodzie adznačajuć niebyvałuju aktyŭnaść encefalitnaha klašča. Kali ŭ byłyja hady padčas prahułki pa lesie abo vyłazki na lasny vadajom možna było sutyknucca z paraj-trojkaj klaščoŭ abo alenievych kryvasosak, to ciapier tych, chto adpačyvaje na pryrodzie, atakujuć dziasiatki, a to i sotni parazitaŭ. U čym asnoŭnyja pryčyny hetaha, piša fishingby.com.
Papulacyja lasnoha klašča i much-kryvasosak pavialičyłasia ŭ razy, niebiaśpiečnyja nasiakomyja ŭ vialikaj kolkaści adznačanyja navat u tych rehijonach Biełarusi, dzie raniej praktyčna nie sustrakalisia.
Na dumku śpiecyjalistaŭ-parazitołahaŭ, hałoŭnymi tryhierami rostu kolkaści lasnych klaščoŭ (Ixodes Dermacentor i Ixodes ricinus) stali niekatoryja z novych ekałahičnych standartaŭ i praviłaŭ.
U asnoŭnym śpiecyjalisty adznačajuć dźvie pryčyny:
- zabarona na vykarystańnie insiektycydu dychłordyfieniłtrychłormietyłmietanu (DDT, dust) u sielskaj i lasnoj haspadarkach.
- paŭsiudnaja zabarona na pał travy, što raniej šyroka praktykavałasia ŭ sielskaj miascovaści.
U niekatoraj stupieni na rost kolkaści parazitaŭ taksama paŭpłyvali klimatyčnyja źmieny.
Ale ŭsio ž taki asnoŭnyja pryčyny — hetyja dźvie, i abiedźvie jany na hety momant nie majuć vyrašeńnia, bo «duścić» lasy i vypalvać prylehłyja da ich pali nichto ŭ metach baraćby z klaščom nie stanie. Bo DDT zdolny nazapašvacca ŭ raślinach i taksičny dla čałavieka, a spaleńnie travy pryvodzić da pažaraŭ i masavaha źniščeńnia hniozdaŭ ptušak.
Parazity napadajuć nie tolki na ludziej, ale i na chatnich žyvioł. Dačniki ŭsio čaściej źviartajucca da vieterynaraŭ z katami i sabakami, litaralna ableplenymi tak zvanym «sabačym» klaščom.
Razam z rostam papulacyi niebiaśpiečnych parazitaŭ u Biełarusi stali čaściej adznačacca vypadki zaražeńnia encefalitam, tamu śpiecyjalisty centraŭ parazitałohii rekamiendujuć bolš uvažliva stavicca da vybaru adzieńnia na čas naviedvańnia lasoŭ, bałot i vadajomaŭ, a pa prybyćci dadomu abaviazkova rabić ahlad cieła na pradmiet prysmaktanych klaščoŭ.
Vynieśli prysud dokšyckamu piarevaratniu ŭ pahonach Zhirskamu1
Kamientary