«Dumali, što ja amierykaniec». Biełarus stvaryŭ u Polščy ema-pank-hurt, jaki palubili ŭ ZŠA
Ryan Cooper — pad takim psieŭdanimam vystupaje 20-hadovy biełarus — zasnavaŭ u Polščy muzyčny hurt Rusted Teeth, jaki hraje ŭ žanry ema-pank. Muzyki ŭžo zapisali pieršy albom i anansavali tur pa Polščy. Jak uźnik prajekt i čamu hurt staŭ papularny siarod amierykanskich słuchačoŭ, Rajan raskazaŭ vydańniu Most.
Muzykaj Rajan zachapiŭsia jašče ŭ škole — kaža, jamu vielmi pašancavała z vykładčycaj.
«Sa škoły adrazu bieh na repietycyi, kapiejki źbiraŭ, kab za ich zapłacić. I ŭvohule nikoli nie rasstavaŭsia z hitaraj», — raskazvaje małady čałaviek.
Padletkam Rajan hraŭ na vulicach Minska, zarablajučy «vielmi niadrennyja hrošy dla školnika» — časam atrymlivałasia navat «adchapić sto dalaraŭ ad zamiežnika». A kali dva hady tamu małady čałaviek pierajechaŭ u Polšču, znoŭ staŭ hrać na vulicy, kab mieć dachod, pakul nie znojdzie pracu. Praŭda, akazałasia, što «tut ludzi krychu skupiejšyja».
«Nichto nie vieryŭ, što z hetaha niešta vyjdzie»
Nieŭzabavie Rajan zrazumieŭ, što jamu nie chapaje kalektyvu — z-za taho, što nie było z kim było hrać, pačałasia «žudasnaja łomka». Tady biełarus znajšoŭ tematyčny hurt u fejsbuku i vykłaŭ vialiki post na anhlijskaj movie, u jakim raspavioŭ pra svoj muzyčny dośvied.
«Palaki, jakija pisali mnie, dumali, što ja amierykaniec, — śmiajecca muzyka. — Kali ja im skazaŭ, što ź Biełarusi, u ich vočy byli pa piać kapiejek — ničoha sabie».
Dziakujučy pastu ŭ supołcy da Rajana dałučyŭsia hitaryst. Jon pryvioŭ basista, a toj — bubnača. U chłopcaŭ užo byŭ dośvied ihry ŭ hurcie, ale, pa słovach Rajana, niaŭdały.
Maładyja ludzi pačali repieciravać, i nieŭzabavie hurt daŭ pieršy kancert u biełastockim kłubie Motopub.
«Nichto nie vieryŭ, što z hetaha niešta vyjdzie. Ale kali my syhrali pieršy kancert i ŭbačyli, što ŭ nas plus sto padpisčykaŭ, zrazumieli: niešta ŭ hetym jość».
Da taho ž kancert akupiŭsia:
«My pajšli ŭ vialiki plus, dzieści 4 tys. złotych».
«Padletki i staryja mužyki, jakija ŭ maładości słuchali pank»
Dalej chłopcy vyrašyli zapisać pieršy albom — Pictures. U Rajana jakraz byli hrošy ad prodažu mašyny ŭ Biełarusi, i jon ukłaŭ ich u zapis.
Za pieršy miesiac albom sabraŭ kala 22 tys. prasłuchoŭvańniaŭ u Spotify. Ale zatym, dasiahnuŭšy adznaki ŭ 50 tys., prahlady stali pastupova padać.
«My stali chutka dziejničać i anansavali pieršy tur, u jaki pajedziem užo ŭ červieni», — raskazvaje muzyka.
U płanach hurta — vystupy ŭ Olštynie, Urocłavie i Hdańsku. Rajan upeŭnieny, što adzin z najvažniejšych sposabaŭ atrymać papularnaść — umieńnie pravilna prarekłamavać hrupu. Zaroblenyja na kancertach hrošy maładyja ludzi ŭkładajuć u raźvićcio ŭłasnaha brenda — rekłamu, klipy i fotasiesii.
«Ja nie spaŭ načami, kab navučycca prasoŭvać muzyku. Sercy fanataŭ na kancercie vielmi lohka zachapić, ale ich zanadta mała ŭ Biełastoku. Tamu ja staŭ vučycca pravilna raźmiarkoŭvać hrošy na rekłamu — i ŭ mianie atrymałasia vyhadna pradać siabie, svoj vobraz», — raskazvaje biełarus.
U Spotify ciapier u hurta bolš za ŭsio prasłuchoŭvańniaŭ z Amieryki: chłopcy vykonvajuć pieśni pa-anhlijsku. Na kancerty, pa nazirańniach Rajana, prychodziać u asnoŭnym padletki i «staryja mužyki, jakija ŭ maładości słuchali pank».
«Časta byvajuć ema, hoty. I ja vyrašyŭ, raz takaja aŭdytoryja, to atrymlivajecca taki žanr — ema-pank. Choć stavić miežy ja nie chaču, naprykład, muzyka ŭ nastupnym albomie budzie ciažejšaj», — adznačaje biełarus.
Pry hetym sam Rajan nie naležyć ni da jakich subkulturaŭ, nazyvajučy siabie svabodnym čałaviekam.
«Jak byccam usio žyćcio siarod palakaŭ i žyŭ»
Hrać u hrupie z palakami Rajanu kamfortna. Kaža, nie zaŭvažyŭ roźnicy ŭ mientalitecie.
«Jak byccam ja ŭsio žyćcio siarod ich i žyŭ, niejak u nas usio adrazu zakruciłasia. Byvajuć vypadki, što chłopcy nie razumiejuć łakalnyja biełaruskija prykoły, ale ja ich vuču, i jany pacichu pačynajuć razmaŭlać pa-rusku i pa-biełarusku», — raskazvaje Rajan.
U svaju čarhu, astatnija ŭdzielniki hurta vučać biełarusa polskaj — dziakujučy im Rajan užo zasvoiŭ movu na razmoŭnym uzroŭni. Kaža, chłopcy «skłalisia, jak pazł».
Ciapier hurt zapisvaje pieśni na anhlijskaj movie, ale Rajan nie vyklučaje, što ŭ budučyni mohuć źjavicca i biełaruskamoŭnyja pieśni. A voś na polskaj — naŭrad ci.
«Kali ščyra, polskaja jak byccam nie mieładyčnaja mova, ale heta majo subjektyŭnaje mierkavańnie», — kaža Rajan.
Papa Bo: Kancertny mundzir za 5 tysiač jeŭra apłaciŭ našy ŭcioki ź Biełarusi
U Varšavie ŭručyli pieršuju biełaruskuju muzyčnuju premiju ŭ emihracyi
Hurt Nochy prezientavaŭ klip na pieśniu «Pa ščokach»
«Hrošy ŭ ciabie buduć, a kultura moža źniknuć». Jak polskija panki adradžajuć biełaruskija narodnyja pieśni
Pabačyŭšy vajnu, nie viedaŭ, jak žyć dalej. Manałoh biełaruski, jakaja pieražyła suicyd muža
Kamientary