Hramadstva3838

«Chiba što jaho padmanuli. Pytańnie tolki ŭ tym, chto i našto». I apazicyja, i jeŭrapiejcy ździŭlenyja listom Sachaščyka

«Naša Niva» spytała va ŭpłyvovych dziejačaŭ apazicyi i pradstaŭnikoŭ dziaržaŭnych struktur jeŭrapiejskich krain, z čaho ŭziaŭsia list Valeryja Sachaščyka z zaściarohami nakont ataki bieśpiłotnikam pa Biełarusi. Nichto ničoha nie razumieje, prahučali i rezkija acenki.

Valeryj Sachaščyk. Fota OSC

«Tut dva varyjanty: abo sam Sachaščyk padyhraŭ KDB, abo ludzi ŭ jaho atačeńni, jakim jon vieryć, pracujuć na KDB», — skazaŭ «Našaj Nivie» infarmavany aficer-emihrant. Hetaje ž mierkavańnie my pačuli ad absalutnaj bolšaści apytanych nami surazmoŭcaŭ. 

Ale bolš za ŭsio nas cikaviła, ci sapraŭdy Sachaščyk atrymaŭ infarmacyju «z aficyjnych krynic u kampietentnych viedamstvach šerahu zachodnich krain», jak toje śćviardžałasia ŭ liście Departamienta nacyjanalnaj biaśpieki, jaki jon stvaryŭ i ŭznačalvaje? My nie znajšli dokazaŭ hetaha.

U čym była zaduma Sachaščyka z hetym piśmom, jak heta ŭsio razumieć?

My razhladali ŭsie mahčymyja viersii, źviali ich da čatyroch asnoŭnych.

1) Demanstracyja dobraj voli z boku zachodnich śpiecsłužbaŭ. Jany pakazvajuć Minsku, što nie dapuściać nijakich teraktaŭ, i praz Sachaščyka zaścierahajuć radykalnyja elemienty apazicyi ad abvastreńnia situacyi.

2) Demanstracyja dobraj voli Sachaščyka. Sachaščyk hetym listom pakazvaje łukašystam, što jon adkazny hulec i budzie suprać siłavych mietadaŭ i pravakacyj.

3) Šmatchadovaja akcyja Sachaščyka, skiravanaja na dyskredytacyju paramilitarnych kłubaŭ, kab panizić ich upłyŭ i pavysić svoj upłyŭ unutry apazicyi.

4) Ideju Sachaščyku padkinuła ahientura KHB, kab dyskredytavać paramilitarnyja kłuby, bo biełaruski KHB bačyć u ich niebiaśpieku.

Z vaśmi apytanych «Našaj Nivaj» upłyvovych dziejačaŭ apazicyi, byłych i dziejnych siłavikoŭ dy infarmavanych žurnalistaŭ šeść schilajucca da čaćviortaj viersii — što ideju Sachaščyku chtości padkinuŭ u metach, jakija vyhadnyja łukašenkaŭcam.

Jašče dvoje ličać, što Sachaščyk sam zadumaŭ hety list dla ŭzmacnieńnia svaich upłyvaŭ unutry apazicyi.

«Maja viersija, što Sachaščyka prosta skarystali, — kaža adzin z upłyvovych lidaraŭ biełaruskaj apazicyi. — Sachaščyk klaniecca, što jamu heta pryjšło praz zamiežnyja śpiecsłužby, ale niezrazumieła, navošta zamiežnym śpiecsłužbam Sachaščyk, kab danieści infarmacyju. Jany b heta rabili naŭprost — sami painfarmavali b usie zacikaŭlenyja struktury», — kaža hety palityk, jaki maje dobraje razumieńnie miechanizmaŭ kamunikacyj dziaržaŭ Zachadu i biełaruskich apazicyjnych struktur.

Były aficer, ciapier infarmavany emihrant, pajšoŭ dalej: «Tut dva varyjanty: abo sam Sachaščyk padyhraŭ KDB, abo ludzi ŭ jaho atačeńni, jakim jon vieryć, pracujuć na KDB. Jaho (źviazany z kołam Sachaščyka — «NN») kanał «Biełaruskaja vyviedka» taksama ŭ hetuju kanvu pracuje, nahniataje abstanoŭku ŭ Litvie», — skazaŭ aficer.

«Zachodnija dypłamaty pakazvali mnie toje, z čym prychodzić da ich Sachaščyk — heta vytrymki z kanśpirałahičnaha telehram-kanała «Biełaruskaja vyviedka», jakuju jon padnosiŭ jak aktualnyja źviestki ź Biełarusi. Davodziłasia heta dezavujavać, chacia ŭsio i tak było jasna, pytańnie było chutčej u tym, navošta jon nosić zachodnikam hetaje tryźnieńnie», — raskazvaŭ «Našaj Nivie» raniej adzin z papularnych biełaruskich palityčnych analitykaŭ.

«Vakoł Sachaščyka sapraŭdy jość ludzi, jakija majuć padazronuju reputacyju. Asobnyja ź ich šukali davieru tady jašče «Bajpoła» praz padvod tudy «charošaha chłopca» Artura Hajko (ahient HUBAZiKa, jaki byŭ u vyniku infiltravany ŭ «Infapojnt» — «NN»). Sachaščyk viedaje heta i mnohija inšyja epizody, ale trymaje takich ludziej kala siabie i daviaraje im», — raskazaŭ «Našaj Nivie» aficer z koła «Bajpoła»-«Biełpoła».

Niekalki apytanych pabačyli ŭ liście Sachaščyka sprobu prybrać aktyŭnych ludziej ź siłavoha pola rukami litoŭcaŭ i palakaŭ.

«Sachaščyk padstaŭlaje biełaruskija emihracyjnyja spartyŭna-patryjatyčnyja kłuby — usim skopam, darečy: «Paspalitaje rušeńnie», «Lićviny» i im roŭnyja», takaja ž tam farmuloŭka — pad padazreńni ŭ vačach zachodniaha adrasata», — zaŭvažaje dziejny aficer biełaruskich siłavych struktur.

«Naniasieńnie ŭdaru pa «abjekcie krytyčnaj enierhietyčnaj infrastruktury» sčytvajecca mnoj jak udar pa AES — heta adziny enierhietyčny abjekt krytyčnaj infrastruktury, da jakoha možna daciahnucca bieśpiłotnikam z terytoryi Litvy ci Polščy, — kaža biełaruski aficer. — Takija mety tyja, chto choča viarnucca dadomu, pierad saboj stavić nie buduć. Heta mety terarystyčnaj arhanizacyi, tamu vysnova: pad listom Sachaščyka moh by lohka padpisacca Cierciel», — skazaŭ «Našaj Nivie» aficer.

«Nasamreč, kali b niejkija śpiecsłužby viedali, što ŭ biełaruskich asiarodkach Litvy i Polščy adbyvałasia niešta niebiaśpiečnaje, jany b prainfarmavali pra heta naŭprost, a nie praz Sachaščyka, — adznačaje inšy siłavik, emihrant. — Sachaščyk tupa i hruba nabivaje sabie canu. Ale nasamreč jon siabie dyskredytuje hetym», — miarkuje jon.

Ale samaje istotnaje nam skazali pradstaŭniki dziaržaŭnych struktur jeŭrapiejskich krain, bo ž nibyta ad ich pachodziła infarmacyja pra mahčymy ŭdar bieśpiłotnikam.

«Chiba što Sachaščyka padmanuli. Pytańnie tolki ŭ tym, chto i našto», — skazaŭ nam vysokapastaŭleny i infarmavany polski čynoŭnik.

Inšy vysokapastaŭleny jeŭrapiejski dypłamat byŭ bolš rezkim: «Pravakacyja KDB, u jakoj uziaŭ udzieł Sachaščyk. Abo byŭ vykarystany».

Nahadajem, što ź lista Valeryja Sachaščyka, razasłanaha ŭ značnuju kolkaść struktur, jaki paśla vyciek i ŭ ŚMI, vynikała, nibyta biełarusy ź Litvy i Polščy, jakija źviazanyja z vajskova-patryjatyčnymi kłubami «Paspalitaje rušańnie» i «Lićviny», rychtavali ŭdarny bieśpiłotnik dla taho, kab atakavać abjekty enierhietyčnaj infrastruktury ŭ Biełarusi.

Adnak «Paspalitaje rušańnie» i «Lićviny» kateharyčna zajavili, što ničoha nie viedajuć ni pra jakuju padrychtoŭku bieśpiłotnika.

U toj ža čas anałahičnuju temu padniaŭ u svajoj pramovie na Usiebiełaruskim narodnym schodzie 25 krasavika staršynia Kamiteta dziaržaŭnaj biaśpieki Biełarusi Ivan Cierciel. Jon pajšoŭ dalej i zajaviŭ, što heta KDB pravioŭ šerah «vostrych mierapryjemstvaŭ», kab praduchilić ataku bieśpiłotnikami z terytoryi Litvy pa abjektach pad Minskam.

Pradstaŭnik departamienta stratehičnych kamunikacyj Uzbrojenych sił Litvy major Hintaŭtas Čunis u kamientary LRT nie prosta abvierh hetyja paviedamleńni, a nazvaŭ ich tryźnieńniem.

«Ja mahu na 100% śćviardžać, što heta dezynfarmacyja. Heta tryźnieńnie, što Litva naniasie ŭdar ź bieśpiłotnika pa Biełarusi, inšaha słova ja nie mahu padabrać», — skazaŭ jon.

Jon adznačyŭ, što takija zajavy z boku Biełarusi «vyklikajuć u mianie tolki ŭśmiešku».

MZS Litvy, u svaju čarhu, uručyła Biełarusi notu pratestu z nahody zajavaŭ Cierciela.

A «Paspalitaje rušańnie» paraiła Sachaščyku «bolš staranna praviarać infarmacyju, jakaja pastupaje da ich, pierš čym raspaŭsiudžvać jaje».

Valeryj Sachaščyk nazvaŭ metaj lista apaviaščeńnie pra mahčymyja nastupstvy «ŭsich, chto moh być niejak źviazany z hetaj situacyjaj».

«My nie abvinavačvali i nie škodzili imidžu adrasataŭ, a naadvarot, zrabili ŭsio, što ŭ našych siłach, kab praduchilić vielmi niehatyŭnyja dla ich nastupstvy z boku zachodnich krain-partnioraŭ, pryčym vyklučna ŭ kanfidencyjnym paradku», — padkreślivaŭ Sachaščyk.

Pavodle jaho, «havorka išła pra prafiłaktyčnaje pravavoje infarmavańnie, abaronu žyćciaŭ biełarusaŭ i praduchileńnie vajennaj eskałacyi, jakaja vyklučna ŭ intaresach Rasii».

Kamientary38

  • Brest siła
    30.04.2024
    Nu voś, bolš-mienš jasna stała
  • Voś heta
    30.04.2024
    «Pravakacyja KDB, u jakoj uziaŭ udzieł Sachaščyk. Abo byŭ vykarystany».
  • Vasia
    30.04.2024
    Ostałoś uznať dla čieho Zienon s nim aktivno był na śviazi. Sudia po vsiemu łukašisty očień silno bojatsia siłovych diejstvij i vsie eti zienony, sachaŝiki rabotajut čtoby etoho nie dopustiť.

Siłaviki prosiać u biełarusaŭ za miažoj paviedamić svoj adras ci vysłać damovu arendy. Što viadoma?16

Siłaviki prosiać u biełarusaŭ za miažoj paviedamić svoj adras ci vysłać damovu arendy. Što viadoma?

Usie naviny →
Usie naviny

Jašče adna achviara niepahadzi: u Mahiloŭskim rajonie zahinuła 5-hadovaja dziaŭčynka

Na biełaruska-litoŭskaj miažy upieršyniu za doŭhi čas źjaviłasia čarha z aŭtobusaŭ1

Ryžankoŭ: Biełaruś hatova da dyjałohu z Polščaj pa situacyi na miažy20

U załatoj bucy na Jeŭra-2024 adrazu niekalki ŭładalnikaŭ

Jak adroźnivajucca ŭmovy pracy dla IP u Biełarusi i Litvie? 1

Anioł Śmierci. Historyja biełaruski, jakaja paviedamlaje rodnym zahinułych kalinoŭcaŭ pra ich hibiel3

Arhiencina vyjhrała Kubak Amieryki pa futbole — i heta taksama rekord

Jak adrazu paśla zamachu na Trampa sacsietki zapoŭnili teoryi zmovy i pry čym tut Iłan Mask32

U Breście zakansiervujuć ruiny 400-hadovaha klaštara. Heta adzinaje zbudavańnie, što zastałosia ad histaryčnaha Bieraścia4

bolš čytanych navin
bolš łajkanych navin

Siłaviki prosiać u biełarusaŭ za miažoj paviedamić svoj adras ci vysłać damovu arendy. Što viadoma?16

Siłaviki prosiać u biełarusaŭ za miažoj paviedamić svoj adras ci vysłać damovu arendy. Što viadoma?

Hałoŭnaje
Usie naviny →