Aryštavany rasijski namieśnik ministra abarony vałodaje dvaranskaj siadzibaj u Maskvie. Čym jana admietnaja?
Cimur Ivanoŭ, zatrymany za chabar, paralelna z budaŭnictvam dla Ministerstva abarony adnaviŭ dla siabie siadzibu XIX stahodździa. Pa adnoj ź viersij daśledčykaŭ tvorčaści Michaiła Bułhakava, mienavita ŭ padvale hetaha asabniaka zdymaŭ kvateru hałoŭny hieroj ramana «Majstar i Marharyta».
Na asobu namieśnika ministra abarony Cimura Ivanova, jaki adkazvaŭ za bujnyja viedamasnyja budoŭli, i jaho žonku źviarnuła ŭvahu kamanda Navalnaha, jakaja ŭ kancy 2022 hoda vypuściła rasśledavańnie.
Pa infarmacyi rasśledavalnikaŭ, jakija atrymali dostup da elektronnaj pošty žonki Ivanova Śviatłany Manijovič, z 2010 pa 2018 hod siamja kožnaje leta zdymała viły ŭ Sien-Trapie, vydatkavaŭšy na heta jak minimum 850 tysiač jeŭra. Jašče 250 tysiač jeŭra pajšło na arendy jacht i 200 tysiač — na kuplu i absłuhoŭvańnie adrestaŭravanaha Rolls-Royce Corniche 2001 hoda vypusku, jaki aformili na luksiemburhskuju firmu.
U pasiołku Uśpienskaje na Rubloŭskaj šašy Ivanoŭ adbudavaŭ sabie daču płoščaj 1600 kvadrataŭ.
Ale najbolšuju cikaŭnaść ujaŭlaje siadziba ŭ Čystym zavułku ŭ Maskvie, jakuju adšukała kamanda Navalnaha.
Trochpaviarchovy asabniak byŭ pabudavany ŭ 1821 hodzie. Pieršaj uładalnicaj siadziby była kniahinia Sofja Vałkonskaja — siastra dziekabrysta Siarhieja Vałkonskaha. U kancy 19 stahodździa ŭładalnicaj doma stała Hanna fon Miek — žonka bujnoha pramysłoŭca.
Pa adnoj ź viersij daśledčykaŭ tvorčaści Michaiła Bułhakava, mienavita ŭ padvale hetaha asabniaka zdymaŭ kvateru hałoŭny hieroj ramana «Majstar i Marharyta».
Da 2012 hoda abjekt naležaŭ departamientu kulturnaj spadčyny Maskvy, ale byŭ pradadzieny pryvatnaj kampanii «Dvaranskaje hniazdo». Jak vyśvietliła kamanda Navalnaha, za hetaj kampanijaj staić Cimur Ivanoŭ. Firma była zapisana na vadziciela namieśnika ministra abarony Rasii — Stanisłava Kuźniacova.
Niahledziačy na toje, što aficyjna rekanstrukcyjaj i ramontam budynka zajmałasia kampanija «Dvaranskaje Hniazdo», usie kaštarysy, pytańni, rachunki prychodzili na elektronnuju poštu Śviatłany Manijovič. U jaje pošcie byli znojdzieny listy adnosna ramontu kaminaŭ, prapanovy pa ŭstanoŭcy lusterkaŭ. Jana vybirała lift i afarmleńnie ścien, uzhadniała źniešniaje aśviatleńnie budynka. A voś płan azielanieńnia byŭ nakiravany Cimuru Ivanovu.
U pošcie Śviatłany byli listy, źmiest jakich dapamoh zrazumieć, što znachodzicca ŭnutry budynka: spa ź vialikim chamamam, minibasiejnam, masažnaj i raspranalniaj. Na kuchni abstalavany stoł šef-kuchara, unizie, u padvale, — pamiaškańnie dla pralni i prasavańnia, skład praduktaŭ, rečavy skład, siejfavaja, błok dla piersanału i pakoj dla achovy.
Siadziba była napoŭniena pradmietami antykvaryjatu, jakija žonka namieśnika ministra zakuplała ŭ vialikich abjomach.
Adpaviedna aktu historyka-kulturnaj ekśpiertyzy, raźmieščanamu na partale Maskvy, viasnoj 2023 hoda raboty pa restaŭracyi i prystasavańniu fasadaŭ i interjeraŭ abjekta kulturnaj spadčyny byli praktyčna zavieršany.
Jašče adzin dom Ivanova, jaki adšukała kamanda Navalnaha, znachodzicca ŭ Ćviarskoj vobłaści na bierazie Vołhi. Hety asabniak płoščaj 2900 kvadratnych mietraŭ aformleny na kampaniju «Vołžski bierah». U im raźmiaščajucca składy antykvarnaj mebli, kaminny pakoj, 100-mietrovaja biljardnaja, 40-mietrovy vanny pakoj, harderobnyja, stałovaja i pamiaškańnie z nazvaj «chulihanskaja haścioŭnia».
U rasśledavańni śćviardžałasia, što Ivanoŭ z žonkaj u hod zarablali kala 25 miljonaŭ rubloŭ, a vydatkoŭvali kala 90 miljonaŭ.
U červieni 2022 hoda Ivanoŭ raźvioŭsia. Ale rasśledavalniki miarkujuć, što zroblena heta było tolki dla taho, kab žančyna nie patrapiła ŭ sankcyjny śpis Jeŭrasajuza.
Učora stała viadoma, što Śledčy kamitet Rasii zatrymaŭ namieśnika ministra abarony Rasii Cimura Ivanova pa padazreńni ŭ atrymańni chabaru. Jon nie pryznaŭ vinu. Jaho adpravili ŭ SIZA na dva miesiacy.
«Siarhiej» nie adzin. Voś jak KDB prapanuje zarabić na sačeńni za biełaruskimi emihrantami2
Kamientary