Paŭnočnakarejskija firmy tajemna dapamahajuć stvarać kantent dla bujnych zachodnich anłajn-kinateatraŭ i studyj
Daśledčyki pa kibierbiaśpiecy vypadkova vyjavili «paŭnočnakarejski śled» u bujnych prajektach zachodniaj kinaindustryi, asabliva ŭ niekatorych papularnych va ŭsim śviecie anime i multsieryjałach. U centry mahčymaha skandału z-za supracoŭnictva z KNDR u abychod sankcyj apynulisia takija płatformy, jak HBO Max, Amazon Prime i navat telekanał Bi-bi-si.
Amierykanskaje analityčnaje ahienctva pa daśledavańni Paŭnočnaj Karei 38 North uzłamała adzin z paŭnočnakarejskich chmarnych siervieraŭ i vyśvietliła, što niekalki firmaŭ i asobnych śpiecyjalistaŭ pa dyzajnie i animacyi z KNDR udzielničali ŭ stvareńni niekatorych papularnych multsieryjałaŭ i anime dla zachodnich anłajn-kinateatraŭ dy inšych resursaŭ.
Na sierviery, jaki byŭ znojdzieny i ŭzłamany vypadkova z-za niapravilna naładžanaj abarony, daśledčyki vyjavili kancept-arty, animacyjnyja schiemy i inšyja fajły, datyčnyja takich prajektaŭ, jak:
- Multsieryjał dla darosłych «Niaŭraźlivy» (Invincible), jaki vychodzić na płatformie Amazon Prime i zdymajecca amierykanskaj kampanijaj Skybound Entertainment.
- Multsieryjał «Ijanu: Dzicia Cudu» (Iyanu: Child of Wonder), jaki zasnavany na afrykanskich komiksach i ekranizujecca płatformami HBO Max i Cartoon Network. Prajekt vyjdzie tolki ŭ hetym hodzie.
- Multsieryjał «Aktanaŭty» (Octonauts) ad brytanskaha telekanała BBC CBeebies (brend kanała Bi-bi-si), jaki stvarajecca kampanijaj Sony Pictures Television Kids / Silvergate Media.
I inšyja.
«Paśla ŭzłomu sierviera my sačyli za jaho aktyŭnaściu na praciahu miesiaca, i kožny dzień na im źjaŭlalisia novyja masivy danych, jakija źmiaščali ŭ sabie kamientary i instrukcyi pa animacyjnaj pracy na kitajskaj movie, a taksama pierakład hetych instrukcyj na karejskuju movu.
Aproč hetaha, taksama byli niekalki animacyjnych fajłaŭ ź instrukcyjami pa redahavańni śpiecefiektaŭ da niejkaha kitajskaha filma pra baskietboł i jašče niekalki nieviadomych videafajłaŭ na ruskaj movie», — paviedamlajuć analityki 38 North.
Daśledčyki adznačajuć, što za tajemnym udziełam paŭnočnakarejskich śpiecyjalistaŭ u stvareńni zachodniaha kantentu moža stajać «Karejskaja studyja multfilmaŭ imia 26 krasavika Ordena Kim Ir Sena» (jašče viadomaja, jak SEK Studio) — viadučaja animacyjnaja studyja KNDR, jakaja zdymaje prapahandyscki kantent dla patreb siamji Kimaŭ i navat aficyjna ŭdzielničała ŭ stvareńni kultavych multfilmaŭ «Pryncesa Pakachontas» i «Karol Leŭ».
Paŭnočnakarejskaja SEK Studio sapraŭdy pracavała nad mižnarodnymi prajektami sumiesna z bujnymi zachodnimi kinastudyjami, adnak heta doŭžyłasia da 2016 hoda, kali ZŠA ŭviali suprać jaje sankcyi. Paźniej sankcyi ŭzmacnilisia i pad ich stali traplać lubyja kampanii, jakija praciahvajuć supracoŭnictva z SEK Studio.
Akramia SEK Studio, analityki 38 North taksama padazrajuć niekalki paŭnočnakarejskich IT-firm, jakija znachodziacca ŭ kitajskich haradach pobač ź miažoj KNDR i vykarystoŭvajuć VPN.
«Zachodnija kinastudyi mahli daručać niekatoryja etapy stvareńnia prajektaŭ kampanijam z Kitaja ŭ jakaści subpadradu. Adnak heta mahło pryvieści da traplańnia kantraktaŭ u ruki paŭnočnakarejcaŭ, jakija taksama majuć firmy ŭ Kitai. Zatym hetyja firmy mahli pieradać kantrakty napramuju SEK Studio, pra što nie viedali zakazčyki.
Niama nivodnaha dokazu, jaki śviedčyć pra viedańnie zachodnich kinastudyj ab udziele ŭ ich prajektach paŭnočnakarejcaŭ», — padahulnili daśledčyki.
U toj ža čas, jak piša ahienctva Reuters, pradstaŭniki Amazon i HBO admovilisia kamientavać situacyju, a źviazanyja ź ich prajektami zachodnija studyi, jakija pahadzilisia razmaŭlać sa ŚMI, zapeŭnili, što aktyŭna supracoŭničajuć z pravaachoŭnymi orhanami ZŠA.
Kamientary