Piacikłaśnica patraciła źbieražeńni baćkoŭ, a potym i dziaduli — tysiačy dołaraŭ
Maleńkaja školnica krała pa 100 dołaraŭ z zanački baćkoŭ. Mianiać ich na rubli ŭziałasia mama jaje siabroŭki, ale brała sabie dolu. Čym skončyłasia kryminalnaja historyja, piša «Minsk-Naviny».
U niepryjemnaj situacyi apynułasia siamja z Mahilova, čyja dačka znajšła ŭ kvatery schavanuju baćkoŭskuju zanačku: 3,5 tys. dołaraŭ, atrymanyja ad prodažu aŭtamabila.
Spačatku dziaŭčynka nie nadała značeńnia svajoj znachodcy, ale praź niejki čas vyrašyła skarystacca situacyjaj. «Adnoj papierkaj mienš, adnoj bolš, adrazu tak i nie zaŭvažyš», — vyrašyła piacikłaśnica i vyciahnuła banknotu. Jak akazałasia, naminałam 100 dołaraŭ.
Razam z najlepšaj siabroŭkaj-adnakłaśnicaj, jakoj jana pa vialikim sakrecie raskazała, dzie ŭziała hrošy, junaja pradprymalnica adpraviłasia na šopinh. Tolki nie viedała, što adziny zakonny srodak płaciažu na terytoryi krainy — biełaruski rubiel. Nabraŭšy poŭny košyk tavaraŭ u mahazinie, pakłała na pryłavak dołary i była mocna ździŭlena admovaj kasira pryniać dla apłaty zamiežnuju banknotu.
Trochi źniervavaŭšysia, dziaŭčynki vyrašyli pašukać ščaścia ŭ inšaj kramie. Ale i tam ich napatkała rasčaravańnie. Tolki ŭ treciaj kramie im patłumačyli, što dołary treba abmianiać na biełaruskija rubli. Dzieci, jakija ažyćciaŭlajuć abmien hrošaj, pryciahnuli b niepatrebnuju ŭvahu z boku supracoŭnikaŭ banka. I tady siabroŭka ŭładalnicy zamiežnaj valuty prydumała vyjście: jaje maci zmoža abmianiać hrošy.
Taja sapraŭdy pahadziłasia dapamahčy.
Atrymaŭšy pa kursie 312 biełaruskich rubloŭ, siabroŭki chutka znajšli im prymianieńnie: nakupili kaśmietyki, prysmakaŭ, navat niejkuju sumu pazyčyli adnakłaśnikam. Ale bahataje žyćcio chutka skončyłasia i ničoha nie zastavałasia, jak iznoŭ zaleźci ŭ baćkoŭskuju zanačku.
Mama siabroŭki znoŭ pahadziłasia abmianiać hrošy. Ale na hety raz žančyna paprasiła ŭklučyć jaje ŭ dolu, bo dačka raskryła sakret siabroŭki i ahučyła kolkaść najaŭnych hrošaj. Jana prapanavała 100 dołaraŭ dać padletkam na vydatki, a jašče sotniu zabrać sabie za toje, što nie raskaža baćkam dziaŭčynki ab jaje drennym učynku. Paśla abmienu žančyna padzialiła biełaruskija rubli na traich.
Praź niejki čas i hetyja hrošy taksama skončylisia. Iznoŭ vyrašyli źviarnucca da adpracavanaj schiemy. Tolki z kožnym razam apietyty mamy siabroŭki raśli. I za svajo maŭčańnie jana ŭžo prasiła ŭsio bolšuju sumu.
Kali ŭ schovancy zastavałasia kala 600-800 dołaraŭ, žančyna nahadała adnakłaśnicy dački, što jaje dzied zachoŭvaje kala 3,5 tys. dołaraŭ. Ab hetym svajoj maci prabałbatałasia dačka, vydaŭšy jašče adzin sakret siabroŭki-adnakłaśnicy. I toj nie zastavałasia ničoha, jak naviedacca ŭ hości da dziaduli. Paśla takich pachodaŭ jaho schovanka chutka apuścieła.
Kolki b doŭžyłasia hetaja historyja — nieviadoma, ale dziadula vyrašyŭ pieraličyć svaje nazapašvańni. Vyjaviŭšy prapažu, jon patelefanavaŭ synu — baćku dziaŭčynki, i toj taksama znajšoŭ adsutnaść hrošaj. Darosłyja chutka vykryli «złačynnuju schiemu».
Dalej historyja pajšła ŭ inšym kirunku.
Maci siabroŭki, prycisnutaja faktami i pryznańniem dziaŭčynki, admaŭlacca nie stała i paabiacała pakryć škodu. Tolki nie prydumała ničoha lepšaha, jak pajści na rabavańnie. Navat miesca vybrała: viosku svajho dziacinstva. Tamaka jana daŭno nie zjaŭlałasia, i susiedzi ŭžo nie pamiatali jaje ŭ tvar. Achviaru vybrała naŭzdahad: nočču śviatło hareła tolki ŭ adnoj viaskovaj chatcy.
Na jaje stuk dźviery adčyniła 84-hadovaja babulka. Niadoŭha dumajučy, žančyna raspyliła joj u vočy sprej. Ale prystupić da pošuku hrošaj nie paśpieła: da chaty padjechała mašyna, i taja zmušanaja była biehčy. Paciarpiełaja vyklikała milicyju, na ščaście, miedycynskaja dapamoha joj nie spatrebiłasia.
Žančynu apieratyŭna zatrymali. Jak vyśvietliłasia, u bijahrafii abvinavačanaj heta nie pieršaja pravina — 35-hadovaja maci čatyroch dziaciej užo była raniej sudzimaja za ŭčynieńnie majomasnych złačynstvaŭ. Ciapier dziaciej pieradali na vychavańnie babuli i dziadulu (baćkam abvinavačanaj).
Śledčyja Mahiloŭskaha rajonnaha adździeła SK pradjavili joj abvinavačańnie pa troch artykułach KK:
č. 3 art. 205 («kradziež, učynieny ŭ bujnym pamiery»);
č. 3 art. 172 («uciahvańnie niepaŭnaletniaha ŭ ździajśnieńnie ciažkaha złačynstva»);
č. 1 art. 14, č. 2 art. 206 («zamach na rabavańnie, učynieny paŭtorna»).
Kamientary