Ministr abarony Hiermanii Barys Pistoryus abviaściŭ, što Hiermanija pieradaść Ukrainie jašče adnu sistemu Patriot u dadatak da dvuch pieradadzienych raniej.
«Rasijski teror suprać ukrainskich haradoŭ i infrastruktury krainy pryčyniaje nievymiernyja pakuty. Jon pahražaje enierhazabieśpiačeńnie ludziej i razburaje apieratyŭnuju hatoŭnaść Uzbrojenych sił Ukrainy», — pieradaje słovy Pistoryus Bi-bi-si.
Niedachop srodkaŭ SPA ŭ apošnija tydni staŭ adnym z hałoŭnych faktaraŭ pasłableńnia Ukrainy. Z pačatku poŭnamaštabnaha ŭvarvańnia sajuźniki pieradali Ukrainie try kompleksy Patriot. Adnak Rasija pačała šyroka ŭžyvać na linii frontu vielmi razburalnyja kiravanyja bomby, jakija možna zapuskać pa-za radyusam dziejańnia frantavych srodkaŭ SPA.
Adzinym srodkam procidziejańnia ŭjaŭlajucca kompleksy SPA vialikaha radyusu dziejańnia, takija jak Patriot, ale jany nie mohuć pakryć usiu liniju frontu, i da taho ž Ukraina nie moža pakinuć biez abarony bujnyja harady i enierhietyčnuju infrastrukturu ŭ tyle.
U apošnija niekalki tydniaŭ ukrainskija aficyjnyja asoby stali patrabavać ad jeŭrapiejskich krain dasłać jašče siem kompleksaŭ Patriot. Ministerstva abarony Hiermanii nie dalej jak u paniadziełak zajaviła, što heta pakul niemahčyma.
Za heta jaho raskrytykavali apazicyjnyja palityki z centrysckaj partyi CHDS.
U piatnicu ministr zamiežnych spraŭ Ukrainy Dźmitryj Kuleba paviedamiŭ, što Kijeŭ viadzie pieramovy ab kupli jašče dvuch kompleksaŭ Patriot i adnaho SAMP/T, jaki vałodaje mnohimi anałahičnymi mahčymaściami. Jon nie ŭdakładniŭ, ź jakimi krainami viaducca pieramovy, ale pa danych Financial Times, heta Ispanija i Polšča (u vypadku Patriot) i Rumynija — u vypadku SAMP/T.
Kamientary