U internecie zabiŭ čarhovy fantan brudu pra ŭnutranaje žyćcio biełaruskich siłavikoŭ.

Na sajcie belaruspartisan.org źjaviŭsia materyjał-hutarka, pryśviečany karupcyi ŭ vyšejšych šerahach biełaruskich pravaachoŭnych orhanaŭ.

U jakaści asoby, jakaja raskryvaje tajamnicy, vystupiŭ były kapitan MUS Viačasłaŭ Dudkin. Nie prosty opier z rajona. Kaliści jon byŭ nabližanym da kiraŭnika ministerstva Uładzimira Navumava i vioŭ spravu ab faktach karupcyi ŭ kankurentnaj struktury KDB.

Adnak Navumava źniali — u vyniku dziejnaści Viktara Łukašenki, śćviardžaje Dudkin, i ŭ mai minułaha hoda kapitan vymušany byŭ uciačy ŭ Rasiju, dzie znachodzicca i ciapier, chavajučysia ad biełaruskaha kamitetu dziaržbiaśpieki, jaki, pavodle słoŭ byłoha kapitana, šukaje jaho «pa admysłovaj schiemie».

Dudkin raspaviadaje šmat cikavaha. Maŭlaŭ, ministr Navumaŭ byŭ adzinym, chto nasamreč uziaŭsia za raskryćcio karupcyi ŭ KDB. I pryvodzić kankretny prykład, jak minskaja biznesvumen Hanna Doŭhaja, trapiŭšy za kraty za ŭłasnyja machinacyi, raspaviała pra svaje suviazi — usialakaha charaktaru — z pałkoŭnikami KDB M.Michałapam i A.Miacielicam. Historyja taja zabłytanaja i nieadnaznačnaja. Ale ŭ vyniku abodva pałkoŭniki trapili ŭ turmu na praciahłyja terminy. Što i paciahnuła za saboj sapraŭdnuju vajnu pamiž KDB i MUS.

U hetuju vajnu ŭciahnutyja samyja roznyja ludzi: ad kiraŭnika dziaržavy, jaki asabista vyzvaliŭ Hannu Doŭhuju z turmy, da kapitana Dudkina.

Raskaz Dudkina zdolny ŭrazić luboha narmalnaha čałavieka. Karcina, apisanaja im, nahadvaje rasijskija palityčnyja detektyvy pačatku 90-ych. Viadoma, što varta krytyčna stavicca da hetaj historyi. U kamientarach niejkaja, biez sumnievu daśviedčanaja, asoba raskazvaje i pra hrachi samaho Dudkina.

Nakolki prahniłaj źjaŭlajecca biełaruskaja dziaržaŭnaja sistema, kali MUS i KDB, jakija pavinny abaraniać zakon i dziaržavu, zmahajucca pamiž saboj ŭ ačarnieńni adno adnoha? Pryčym dla ačarnieńnia vykarystoŭvajuć lubyja mietady. Pieramahaje toj, chto zdoleje dakazać bolšuju kolkaść złačynstvaŭ, ździejśnienych supiernikam.

Mierkavać ab hetaj prychavanaj vajnie my možam tolki pa bolš-mienš hučnych adstaŭkach i pryznačeńniach. Usie akaličnaści zakulisnaj vajny nieviadomyja nikomu.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?