Staŭ viadomy novy łaŭreat litaraturnaj premii «Hliniany Viales». Premijaj za 2023 hod uznaharodžany prazaik Jury Stankievič (paśmiarotna) za ahulny ŭniosak u biełaruskuju litaraturu, piša Radyjo Racyja.
Raniej nikoli premija «Hliniany Viales» nie prysudžałasia paśmiarotna. Hetym razam zrabili vyklučeńnie.
Kaža staršynia arhanizacyjnaha kamitetu litaraturnaj premii «Hliniany Viales» Aleś Arkuš:
— Raniej nikoli premija «Hliniany Viales» nie prysudžałasia paśmiarotna. Hetym razam my vyrašyli zrabić vyklučeńnie i ŭšanavać blizkaha nam pa tvorčych, maralnych i žyćciovych pierakanańniach prazaika Juryja Stankieviča. Piśmieńnika nie stała ŭ 2021 hodzie. Dvojčy jaho knihi naminavalisia na Vialesa. Jaho tvory zaŭsiody byli z nami pobač. Hetym razam my chočam vypravić raniejšuju prykruju pamyłku i ŭšanavać premijaj TVŁ Juryja Stankieviča.
«Nam vielmi chaciełasia b, kab imia Juryja Stankieviča było ŭ šerahu našych łaŭreataŭ», — adznačajecca ŭ paviedamleńni arhanizacyjnaha kamiteta premii.
***
Jury Stankievič naradziŭsia 21 studzienia 1945 hoda ŭ Barysavie. Baćka piśmieńnika ŭ 1946 hodzie byŭ represavany pavodle 58-ha artykuła KK i nakiravany ŭ Karłah.
Stankievič byŭ litaraturnym supracoŭnikam, zahadčykam adździeła časopisa «Maładość», zahadčykam adździeła časopisa «Krynica». Z 1990 hoda — siabra Sajuza biełaruskich piśmieńnikaŭ.
Najvažniejšyja knihi: «Lubić noč — prava pacukoŭ» (1998), «Apładnieńnie jołupa» (2005), «Miljard udaraŭ» (2008), «Pjaŭka» (2010).
Pamior 22 kastryčnika 2021 hoda va ŭzroście 76 hadoŭ.
Hliniany Viales — štohadovaja litaraturnaja premija, zasnavanaja ŭ 1993 hodzie členami Tavarystva Volnych Litarataraŭ. Staršynia arhanizacyjnaha kamiteta Aleś Arkuš. Prysudžajecca za najlepšuju mastackuju biełaruskamoŭnuju knihu hoda. Łaŭreat atrymlivaje simvaličnuju ŭznaharodu — hliniany stod apiekuna mastactva. Stać łaŭreatam premii možna tolki adnojčy.
Kavid zabraŭ u Biełarusi 90 tysiač žyćciaŭ, a nie 7 tysiač, jak śćviardžali ŭłady6
Kamientary