«Tajemny klijent» sačyŭ za haściami «vostrava piedafiłaŭ» Epštejna pa sihnale ich telefonaŭ
Ładziłasia sačeńnie praz skandalna viadomuju ŭ ZŠA brokierskuju firmu, ale pad uvahaj akazalisia nie ŭsie hości, raskazvaje ŭ svaim novym rasśledavańni vydańnie Wired.
Vydańnie Wired atrymała dostup da ŭnutranaj dakumientacyi mižnarodnaj brokierskaj firmy Near Intelligence, pavodle jakoj taja aktyŭna sačyła za naviedvalnikami sumna viadomaha «vostrava piedafiłaŭ» miljardera Džefry Epštejna, abvinavačanaha ŭ seks-handli ludźmi i piedafilii (jon skončyŭ žyćcio samahubstvam u turmie).
Sačeńnie ažyćciaŭlałasia pry dapamozie sihnałaŭ telefonaŭ samich haściej pryvatnaha vostrava, siarod jakich byli mnohija suśvietnyja znakamitaści.
Jak adznačaje Wired, Near Intelligence źbirała danyja hieałakacyj pieravažna amierykanskich haściej Epštejna, bo zakony ZŠA ab kanfidencyjnaści nie abaraniajuć jaje hramadzian ad sačeńnia naležnym čynam (tamu ŭ firmy niama danych ab pierasoŭvańniach jeŭrapiejskich naviedvalnikaŭ vostrava Epštiejna, bo ŭ Jeŭropie pryvatnaść hramadzian abaroniena zakonam macniej).
Akramia taho, pierachoplenyja sihnały telefonaŭ taksama pakazvali na haściej z Aŭstralii, Kajmanavych vyspaŭ, Ukrainy i inšych krain.
Naprykład, danyja ab sačeńni za telefonami ŭkazali na amierykanskich naviedvalnikaŭ vostrava Epštejna, jakija pražyvajuć u 80 haradach i 26 štatach krainy. Niekatoryja damy naviedvalnikaŭ kaštujuć miljony dalaraŭ.
Jak paćvierdziła vydańniu Wired pradstaŭnica firmy Near Intelligence, kampanija źbirała danyja ab haściach «vostrava piedafiłaŭ» naŭmysna, ale pry hetym nie stała raskryvać zakazčyka sačeńnia.
Sama firma Near Intelligence maje indyjskija i sinhapurskija karani. Jana zajmajecca zboram i prodažam infarmacyi, a taksama moža pachvalicca patencyjnym achopam sačeńnia za kala 1,6 miljarda čałaviek u 44 krainach śvietu.
U dadzieny momant kampanija pamianiała nazvu na Azira, bo mieła prablemy z sudovymi iskami i daŭhami, u tym liku vyklikanymi skandałam z masavym sačeńniem za pacyjentkami 600 klinik repraduktyŭnaha zdaroŭja ZŠA, jakija rabili tam aborty nasupierak zakonam ich chatnich štataŭ, dzie padobnaja praktyka zabaroniena.
Vydańnie Wired taksama padkreślivaje, što takija firmy, jak Near Intelligence (Azira) patencyjna mohuć pradavać kanfidencyjnyja danyja ludziej takim krainam, jak Rasija, Kitaj, Iran i Paŭnočnaja Kareja.
Paśla pryjomu ŭ ministra Kubrakova aryštavali žančynu, jakaja šmat hadoŭ zmahajecca z «piedafilskim łobi»5
Paśla pryjomu ŭ ministra Kubrakova aryštavali žančynu, jakaja šmat hadoŭ zmahajecca z «piedafilskim łobi»
«Samaje hałoŭnaje ciapier — zabiaśpiečvać subjektnaść Biełarusi». Franak Viačorka raskazaŭ, ci jość stratehija ŭ demsiłaŭ i na što ŭpłyvaje Cichanoŭskaja1919
Kamientary