Łatvija pakul nie budzie zabaraniać u siabie mašyny ź biełaruskimi numarami
21 sakavika łatvijski Siejm pieradaŭ nazad u adkaznuju kamisiju papraŭki da Zakona ab darožnym ruchu, jakimi mierkavałasia raspaŭsiudzić tyja ž abmiežavańni, što dziejničajuć dla mašyn z rehistracyjnymi numarami Rasii, i na aŭtamabili ź biełaruskimi numarami, paviedamlaje Lsm.lv.
Zakonaprajekt Narodna-haspadarčaja kamisija łatvijskaha Siejma raniej nie ŭchvaliła. Jak patłumačyła raniej jaje staršynia Skajdrycie Abrama, papraŭki byli słaba padrychtavanyja, bo ŭ ich było prosta skapijavana toje samaje, što było ŭ papraŭkach ab mašynach z rasijskimi numarami:
«Treba było praduhledzieć hruntoŭnyja vyklučeńni — naprykład, što ŭciekačy vyvoziać svaje siemji, kab vyratavać ich ad žachaŭ režymu Łukašenki. Prablema i z prapanovami, Što rabić z mašynami — kanfiskoŭvać, błakavać koły? Byli i dyskusii pra štrafy».
Miascovaje MZS ličyć, što heta pytańnie palityčnaj voli — zabaraniać ruch mašyn ź biełaruskimi numarami ŭ Łatvii ci nie. Ministerstva źviartaje ŭvahu, što ŭviedzienyja Jeŭrasajuzam suprać Rasii i Biełarusi sankcyi adroźnivajucca: sankcyi suprać Biełarusi ciapier nie zabaraniajuć uvoz aŭto ź biełaruskimi rehistracyjnymi numarami ŭ Jeŭropu. Nie ŭviali takoj zabarony i Litva dy Polšča.
Ciapier uličvajucca abstaviny paśla nielehitymnych prezidenckich vybaraŭ 2020 hoda ŭ Biełarusi i žorstkija represii suprać hramadzianskaj supolnaści ŭ krainie, nahadvaje MZS. Z-za ich mnohija biełarusy vymušanyja emihravać, na što nieadnarazova źviartała ŭvahu Śviatłana Cichanoŭskaja. Zrešty, u MZS hatovyja dyskutavać ab nieabchodnaści zabarony i ŭmovach jaho ŭviadzieńnia.
Pieramiaščacca pa darohach Łatvii mašynam z rasijskimi numarami zabaroniena z 15 lutaha — pad pahrozaj kanfiskacyi i štrafu. Pieršapačatkova mierkavałasia raspaŭsiudzić zabaronu i na mašyny Respubliki Biełaruś, ale z ulikam składu biełaruskaj dyjaspary (pieravažna ludzi, apazicyjna nastrojenyja da režymu Alaksandra Łukašenki) vyrašyli hetaha nie rabić. U advarotnym vypadku mnostva biełarusaŭ mahli pazbavicca transpartu, bo vyvieźci svoj aŭtamabil adsiul jany nie mohuć, jak i zarehistravać jaho ŭ Łatvii.
Kitaj paprasiŭ Biełaruś narmalizavać adnosiny z Polščaj — krynica6
Kamientary