Zhadvajem jaho šlach i raskazvajem niekatoryja nie ahučanyja raniej fakty ź bijahrafii samaha adyjoznaha biełaruskaha prapahandysta, jaki pieraplunuŭ u vysłužvańni pierad režymam Łukašenki svajho baćku.

Upłyŭ baćki — ad knih da muzyki i vybaru budučaj prafiesii

Prykazka «jabłyk ad jabłyni niedaloka padaje» ŭ siamji Azaronkaŭ prajaviła siabie na ŭsie sto. Ryhor naradziŭsia ŭ 1995 hodzie ŭ siamji Lubovi i Juryja Azaronkaŭ i, možna skazać, ź dziacinstva nasyčaŭsia ducham nianaviści da inšadumcaŭ. Jakraz u 1995-m na teleekrany vyjšaŭ dakumientalny film Azaronka-starejšaha «Nianaviść. Dzieci chłuśni», dzie jon paraŭnoŭvaŭ apazicyjanieraŭ z kałabaracyjanistami časoŭ Druhoj suśvietnaj. Paśla hetaha Juryju Azaronku prylacieła aplavucha ad palityka Mikoły Statkieviča.

Adnoj z nastolnych knih u siamji była «Narodnaja manarchija» Ivana Sałanieviča, prasoŭvalnika pieravahi manarchičnaha kiravańnia. Siarod relikvij u domie — poŭny zbor sačynieńniaŭ Lenina. Usio heta, vidavočna, pakinuła adbitak na asobie Ryhora.

Juryj Azaronak. Fota: kp.ru

Juryj Azaronak. Fota: kp.ru

Baćka paŭpłyvaŭ i na muzyčnyja husty syna: Michaił Nožkin, Mikałaj Jemielin, Uładzimir Vysocki, hałoŭnym čynam — błatniak i carkoŭnyja pieśni. Usio heta hubkaj uvabraŭ u siabie małady chłopiec. Što i kazać, praz kolki hadoŭ, kali sam Ryhor vyjdzie na arenu prapahandy, pieśnia Nožkina «Dapamažy im, Boža» stanie saŭndtrekam u adnoj z samych pačvarnych aŭtarskich pieradač «Orden Iudy».

Vučyŭsia Hryša ŭ 192-j staličnaj himnazii. Davalisia jamu lepš humanitarnyja navuki, a voś dakładnyja — nie vielmi. Chłopiec byŭ dosyć zamknionym, ale krychu raźniavolicca jamu dapamoh teatralny hurtok.

Jašče ŭ škole, pa słovach samoha Ryhora, jon asensavaŭ, što padtrymlivaje Łukašenku.

Skrynšot pieradačy «Orden Iudy», jakaja ciapier užo nie vychodzić.

Skrynšot pieradačy «Orden Iudy», jakaja ciapier užo nie vychodzić.

Prasłaviŭsia dziakujučy skandałam

Pa prykładzie baćki syn pastupiŭ i ŭ Biełaruskuju dziaržaŭnuju akademiju mastactva, na režysuru kino i telebačańnia (u 2022-m Azaronak jašče skončyć Akademiju kiravańnia).

Ludzi, jakija vučylisia ź im u tyja hady, kažuć, što padčas navučańnia jon byŭ hetakaj šeraj myškaj: «niama čaho i zhadać»; «pamiataju, što chadziŭ viečna z chłopcam, vielmi padobnym da jaho, i ŭsio». Ale paru historyj, jakija adkryli Azaronka nie z samaha lepšaha boku, zhadvajuć.

«Dla nas Azaronak prasłaviŭsia ŭ 2013 hodzie, padčas fiestyvala «Listapad». Tady raźviarnuŭsia skandał ź filmam «Łuka» («Vylečyć strach», režysior Alaksandr Parchomienka), pryśviečanaha žyćciu śviatara Łuki, archibiskupa Simfieropalskaha i Krymskaha», — zhadvaje adzin z vypusknikoŭ BDAI.

Jak raspaviali «Našaj Nivie» blizkija da kinafestu ludzi, hety film vielmi aktyŭna prapichvali čynoŭniki. Ale pieršapačatkova jaho ŭsio adno nie ŭklučyli ŭ aficyjnuju prahramu «Listapada». Praŭda, na adkryćci fiestyvalu hanarovy staršynia Hienadź Davydźka za śpinaj kamandy zrabiŭ dla presy zajavu, što karcina ŭ konkursie. Kab paźbiehnuć skandału, stužku vyrašyli kampramisna pakazvać na ranišnim sieansie ŭ kinateatry «Centralny». 

Adnak nie ŭsich zadavoliła i heta. Źvierchu sprabavali dacisnuć, kab stužcy zabiaśpiečyli dadatkovy sieans u nadziei na toje, što za jaje prahałasujuć hledačy i jana atrymaje pryz hladackich simpatyj. Da hetaha ruchu dałučyŭsia i Azaronak.

«Ën pryjšoŭ na ranišni pakaz sa svaim siabram, pahladzieŭ, što ŭ zali było pusta i potym pačaŭ u roznyja instancyi pisać skarhi pra toje, što ŭsio pahana, što taki cudoŭny pravasłaŭny film pastavili na taki čas, na jaki ludzi nie majuć mažlivaści pryjści», — raskazvaje adzin z vypusknikoŭ BDAI.

Ale ŭ vyniku stužka atrymała tolki adnu ŭznaharodu, prezidenckuju — «Za duchoŭnaść i humanizm u mastactvie».

Svaje vajaŭniča pravasłaŭnyja pohlady Azaronak adstojvaŭ tak zaŭziata, što adnojčy paśla sprečki pa hetaj temie ź im nie chacieli jechać u adnym kupe.

«Moj adnahrupnik i mastacki kiraŭnik kursa razam z Azaronkam pajechali na kinafiestyval. Ja nie pamiataju dakładna detalaŭ sprečki, ale jon tady tak ich abodvuch raźjušyŭ, što jany nie chacieli viartacca ź im nazad u adnym kupe. A potym u kantekście hetaj historyi na fakultecie pra Azaronka raskazvali jak pra studenta, miakka skažam, svojeasablivaha i niedalokaha», — raskazvaje jašče adzin z vypusknikoŭ.

Pry padrychtoŭcy dypłomnaj pracy Azaronak pradoŭžyŭ svaju liniju. Jon pryśviaciŭ pracu rasijskamu piśmieńniku-kanśpirołahu Juryju Varabjeŭskamu, źniaŭšy pra jaho dakumientalny film pad nazvaj «Sałdat Chrysta».

Ad «svajho pacana z Malinaŭki» da nievitalnaha

Da prychodu na STB, kudy jon pieršy raz trapiŭ jašče na trecim kursie ŭniviersiteta, Azaronak paśpieŭ papracavać dvornikam, padsobnym rabočym i piedahoham-arhanizataram u škole.

Skrynšot STB

Skrynšot STB

Pa zhadkach byłych kaleh, pry svaim pieršym źjaŭleńni na kanale Azaronak nijak nie vyłučaŭsia siarod inšych studentaŭ ci vypusknikoŭ žurfaka, jakija maryli začapicca za kanał, kab nie adpravicca na raźmierkavańnie ŭ hieahrafična dalokuju rajonku.

«Nichto nie ŭsprymaŭ jaho ni surjozna, ni ź niehatyvam. Niechta byŭ nastrojeny pazityŭna: jon byŭ taki, viedajecie, prosty, zrazumieły, svoj pacan z Malinaŭki. Niedzie navat ścipły. Ën trapiŭ pracavać na samaje dno ŭ razumieńni rabotnikaŭ STB — vykankamaŭskija prahramy «Naviny Minščyny» i «Staličnyja padrabiaznaści».

Paraŭnoŭvajučy Azaronka ź niekatorymi praktykantami ci niadaŭnimi vypusknikami, eks-kalehi adznačajuć, što ź im było jak minimum nie sumna pajechać navat u samuju dalokuju kamandziroŭku, bo zaŭsiody było pra što parazmaŭlać, paspračacca.

«Ën nie durań, dosyć načytany — moh cytavać ruskuju kłasiku, uryŭki z ruskich vieršaŭ. Prablema tolki ŭ tym, što jaho viedy sfakusavanyja na tym, što adpaviadaje jaho pierakanańniam i pohladam.

Jaho pamiać čamuści vyčyščała toje, što nie sychodziłasia z ruskaśvietaŭskaj karcinaj, jon takuju infarmacyju ŭ arhumientach adrazu ihnaravaŭ».

Ale toje, što ich kaleha — «vatnik», usie zrazumieli nie adrazu. Heta adkryvałasia z kožnaj novaj sprečkaj nakont Biełarusi, jaje budučyni, Łukašenki.

«Kali koratka patłumačyć, to ŭsie jaho naratyvy zvodzilisia da taho, što Biełaruś — histaryčnaje nieparazumieńnie, jakoje adbyłosia praz padzieńnie Rasijskaj impieryi pad źniešnimi ŭdarami, i hetaha nie pavinna było być.

Dla jaho my — adzin narod z ruskimi i ŭkraincami. A Łukašenka — nie prezident niezaležnaj respubliki, a toj, chto nibyta byŭ suprać raspadu SSSR (choć pry ratyfikacyi ŭ Viarchoŭnym Saviecie Biełaviežskich pahadnieńniaŭ Łukašenka ŭvohule nie hałasavaŭ).

U samim Azaronku niama nijakaha namioku na biełaruskaść, tamu jon i lubić Łukašenku — jon saviecki, blizki jamu pa duchu čałaviek».

U 2020-m Azaronak padtrymaŭ rytoryku vyśmiejvańnia kavidu i antykavidnych mier pa ŭsim śviecie, nazyvajučy heta «marazmam i ŭnutryelitnymi hulniami». A ŭžo nieŭzabavie staŭ nievitalnym navat siarod ludziej, jakija ličylisia jaho tavaryšam.

«Jašče da vybaraŭ atmaśfiera na kanale była dosyć naelektryzavanaja. Treba razumieć, što absalutnaja bolšaść — ja zaraz nie schłušu, nu, pracentaŭ 80, — adkryta krytykavali Łukašenku i vystupali suprać. A Azaronak ža pačaŭ tvaryć dzič u jaho padtrymku. I nie raz nazirałasia takaja karcina. U nas na Kamunistyčnaj, 6 jość unutrany dvoryk, jon vykarystoŭvajecca dla rytuałaŭ — kalektyŭnaha vychadu papalić, pabałbatać. I tam pastajanna niechta siadzić z kavaj i cyharetami.

I nie raz było takoje, što stajać ludzi, šumnaja hamonka. A idzie Azaronak, praciahvaje ruku, a nichto ŭ adkaz jamu nie praciahvaje. I takaja zvonkaja cišynia», — raskazvajuć śviedki.

«Navat jaho najlepšy siabra, ź jakim jany chadzili razam na piva, ad jaho tady adviarnuŭsia i kamunikavaŭ vyklučna ŭ miežach pracoŭnaha zakanadaŭstva: na pratestach u jaho paciarpieŭ brat».

Tryhieram dla kaleh pasłužyła rytoryka prahramy «Tajemnyja spružyny palityki», a ŭžo zusim niedaravalnym staŭ siužet pra toje, jak usio vydatna i ŭtulna na Akreścina, jaki Azaronak vypuściŭ u vieraśni 2020 hoda, kali tam zusim niadaŭna katavali ludziej (a potym i pradoŭžyli ździekavacca).

Hladzicie. Izalatar na Akreścina: novyja ździeki, pryznańni eks-supracoŭnika IČU i pratesty ŭ Biełarusi — film Našaj Nivy 

Što zrabiła Azaronka zaŭziatym prapahandystam?

Eks-kalehi adznačajuć, što nie raz zadavalisia hetym pytańniem u kułuarach:

«Vidać, heta ŭsio zaŭsiody było ŭ im na padśviadomym uzroŭni. I heta jakraz vyłazić u im na kamieru, bo ŭ asabistaj kamunikacyi jon byŭ prostym pacanom z Malinaŭki, jakomu pa kajfu ŭviečary z pacanami pasiadzieć i harełki ci piva papić. Taki ruski Ivan».

Znajomyja admiatajuć, što pryčynaj mahło pasłužyć toje, što ad jaho adviarnulisia mnohija ludzi.

«Ën usprymaŭ heta jak kryž, takoje samaachviaravańnie. U im ža prasočvajecca vajaŭničaje pravasłaŭje. I voś nibyta toje, što jon staŭ pakutnikam u baraćbie za ideju, tolki ŭzmacniła jaho vieru».

Nie curaŭsia jeździć «zajcam», kab zekanomić

Fakt taho, što baćka Ryhora taksama pracavaŭ na telebačańni ŭ jakaści prapahandysta, syn nijak nie afišavaŭ. Mnohija kalehi z novaha pakaleńnia pra taho Juryja Azaronka navat i nie viedali. Jak i toje, što pieradača «Tajemnyja spružyny palityki» — heta adrodžanaja viersija adnajmiennaj prahramy Azaronka starejšaha.

«Ja asabista nie byŭ u kursie, chto jaho baćka. Hryša pra jaho nie zhadvaŭ i nijak jaho imia nie vykarystoŭvaŭ. Pra jaho siamju źviestki ŭspłyli ŭ našym asiarodździ bližej da 2020-ha. U Hryšy sprabavali pra baćku niešta pytać, ale jon tolki kazaŭ, što toj pracuje vartaŭnikom i nijakaha dačynieńnia da telebačańnia ciapier nie maje»,— kaža adzin z byłych kaleh.

Maci Ryhora była supracoŭnicaj «Minsktransa», što paviesialiła mnohich, kali stała viadoma, što tvar prapahandy jeździć hramadskim transpartam «zajcam» i maje za heta jak minimum šeść administracyjnych spahnańniaŭ.

«Ën apranaŭsia biednavata, było bačna, što ekanomić. I pa hetaj ža pryčynie jeździŭ u hramadskim transparcie «zajcam».

Praŭda, pa apošnich źviestkach, pieradadzienych «Našaj Nivie» Belpol, maci Ryhora Luboŭ ciapier na piensii, a apošniaje miesca pracy baćki — śpiecyjalist Kiraŭnictva spravami prezidenta.

Kolki kaštuje praca prapahandysta takoha ŭzroŭniu?

Ale akurat u žniŭni 2020-ha Azaronak zmoh dazvolić sabie pryjezdy na pracu na taksi.

«Vidać, jamu nakinuli hrošy za novyja aŭtarskija prahramy, bo zvyčajnyja karespandenty na navinach mahli atrymlivać usiaho 500-600 rubloŭ», — kaža eks-kaleha.

U vyniku za 2020 hod Azaronak zarabiŭ kala $10400, ci pryblizna $865 na miesiac (takija ličby my atrymali na asnovie dadzienych u bazie FSAN, źviestki ź jakoj pradastaviŭ «Biełpoł»). 

Dziaŭčyna, da jakoj padkatvaŭ, akazałasia zmaharkaj

Byłyja kalehi taksama zhadvajuć, što paśla vybaraŭ u kalektyŭnych sprečkach Azaronak niejak pryznaŭ, što bolšaść mahła prahałasavać nie za Łukašenku: «Ale, maŭlaŭ, bolšaść moža pamylacca».

Z hetaj «bolšaściu» Azaronak sutyknuŭsia, kali ŭpieršyniu byŭ zaŭvažany ŭ sprobach pabudavać adnosiny z supraćlehłym połam.

«Padkatvaŭ da adnoj stažorki, klikaŭ pahulać. Ale dziaŭčyna akazałasia «łatentna zmaharskich pohladaŭ», simpatyzavała apazicyjnym varušniakam. Nu, i Azaronku jana admoviła».

U inšych sprobach naładzić ramantyčnaje žyćcio Azaronak zaŭvažany nie byŭ. U adnym ź intervju jon sam kazaŭ, što pakul słužyć krainie, nie da adnosin. Pry hetym na telebačańni viadučy pastajanna zaklikaje biełarusak naradžać dziaciej, krytykuje poźnija šluby i ideałohiju čajłdfry.

Skrynšot: instahram Azaronka

Skrynšot: instahram Azaronka

Nie pajšoŭ u KDB, ale staŭ čekistam u pramym efiry

Nie sakret, što karjeru na STB Ryhor pierapyniaŭ dziela słužby ŭ armii — jon adsłužyŭ u 56-m Tylzickim asobnym ordena Čyrvonaj Zorki pałku suviazi. Jaho vielmi pryvablivała ramantyka vojska, maršy, śpievy. Tam jon realna vysłužvaŭsia.

Paśla jamu prapanavali pajści ŭ KDB, ale, nibyta paraiŭšysia z tahačasnym kiraŭnikom STB Kiryłam Kazakovym, jon vyrašyŭ viarnucca na kanał. Načalnik pierakanaŭ, što ŭ Azaronka budzie mahčymaść pasłužyć radzimie i biez pahonaŭ. «Ale ja doŭha dumaŭ [nakont KDB]: usio ž ramantyka, Štyrlic, čekisty».

U pryncypie jaho zachapleńnie čekistami cudoŭna raskryłasia ŭ žyvym efiry: jon nie tolki dazvalaje sabie vynosić prysudy biez suda za hrošy biełaruskich padatkapłatnikaŭ, zaklikaje da raspravaŭ nad apanientami, ale i tyražuje videa z pakajańniami biełarusaŭ. U niekatorych jon navat paŭdzielničaŭ sam: naprykład, z zatrymanym paśla tvita «fu, sa mnoj u trenažorcy Azaronak» Andrejem Hureŭskim.

Azaronka nie raz sprabavali pryciahnuć da adkaznaści za raspalvańnie sacyjalnaj varažniečy (art. 130 KK), ale, na žal, siońnia zakon u Biełarusi ŭ takich vypadkach dziejničaje tolki ŭ adzin bok, karajučy tych, chto nie padtrymlivaje režym. Jaho ž słužkam zakony mohuć być nie pisanyja.

Davoli čakana Azaronak padtrymlivaje vajnu va Ukrainie: jon nieadnarazova naviedvaŭ akupavanyja terytoryi, rabiŭ repartažy z Danbasa.

Fota: instahram Ryhora Azaronka

Fota: instahram Ryhora Azaronka

Kali ŭ adnym z efiraŭ u Azaronka spytali, što značyć litara Z u jaho na hrudziach, jon vybuchnuŭ manałoham:

«Litara «Z» — znak śpiecyjalnaj vajskovaj apieracyi (SVA), jakuju pravodzić Rasija. Heta znak supraćstajańnia hłabalnamu marazmu, u jakim źbiehłyja vyradki na samym dnie charčovaha łancužka. Dzie jany ablizvajuć adzin adnaho, a litoŭcy — palakaŭ, palaki — anhielcaŭ, anhielcy — amierykancaŭ, i ŭsie razam tonuć u hetym kołazvarocie atručanaj śliny».

Chto prydumaŭ adrezać jazyk Azaronku?

Pa słovach prapahandysta, samy ščaślivy momant jaho žyćcia — taja situacyja, kali Łukašenka raskazvaŭ na ŭsiu krainu pra sprobu «zamachu» na Azaronka. «Nie dumaju, što niejkaje ŭražańnie ŭ žyćci pierabje heta», — pryznajecca Ryhor.

«Vyvieźci ŭ les u samaje hłuchoje miesca, adrezać jazyk. Uziać nažnicy, kab sam heta zrabiŭ. Kali nie zrobić sam — toj, chto byŭ naniaty za dziesiać tysiač dalaraŭ, pavinien byŭ ažyćciavić hetuju apieracyju, zaśniać na kamieru i vykłaści ŭ internet. Kali nie atrymajecca — zabić», — z takoj pramovaj Łukašenka vystupaŭ napiaredadni 3 lipienia.

Zrazumieła, usio było nie zusim tak. Ideja zamachu na Azaronka naležała Atradam hramadzianskaj samaabarony, stvoranym u telehramie vychadcam z Rasii Dzianisam Chromavym pa mianušcy «Dzis». Supracoŭniki KDB ukaranilisia ŭ hrupu ad samaha pačatku jaje isnavańnia. Jany pravakavali ludziej na radykalnyja dziejańni, dla mnohich heta skončyłasia žorstkimi prysudami — až da 20 hadoŭ źniavoleńnia. A sam «Dzis» prosta źnik ź interneta.

Čytajcie. «Sprava AHSB»: jak KDB arhanizoŭvaŭ «terakty»

Što da napadu na Azaronka, abvinavačanym pa spravie staŭ lidski taksist Dźmitryj Sasnoŭski. Kedebisty zabrali jaho na svajoj mašynie, vydali jamu elektrašokier, pryvieźli na miesca «złačynstva». Supracoŭnik KDB uziaŭ z saboj pistalet.

Padčas napadu vidać, jak niaŭzbrojeny Sasnoŭski pačynaje nierašuča iści śledam za Azaronkam, a pierad im upeŭniena rušyć uzbrojeny supracoŭnik KDB. Siłavik kidajecca na Azaronka, a Sasnoŭskaha adrazu skručvajuć inšyja supracoŭniki.

Dyj adrazać jazyk nichto nie źbiraŭsia — u sudzie vyjaviłasia, što zmoŭščyki źbiralisia pradstavicca supracoŭnikami HUBAZiK, zabrać prapahandysta z saboj u mašynu i zapisać ź im «pakajannaje videa» ŭ hubazikaŭskim styli.

Dziaržaŭnyja ŚMI publikavali pakajalny list Sasnoŭskaha ź SIZA. Adnak u sudzie jon nie pryznaŭ vinu i atrymaŭ 20 hadoŭ źniavoleńnia.

Cikava, što kali ŭ 2021-m sudzili pierakładčycu Volhu Kałackuju, jakaja dała Azaronku dźvie aplavuchi, jon vystupaŭ za spynieńnie kryminalnaj spravy. U sudzie Ryhor kazaŭ, što zajavu na Kałackuju nie pisaŭ i ŭvohule nie ličyć, što žančyna jaho abraziła: «Pra epizod ja zabyŭsia ŭ toj ža viečar. Ja chadajničaŭ ab spynieńni kryminalnaha pieraśledu i nastojvaŭ ab spynieńni spravy. Padtrymlivaju hetuju svaju pazicyju i ciapier».

Kałackaja tady atrymała 2 hady chatniaj chimii. Admietna, što Azaronak paličyŭ hety termin žorstkim i zajaviŭ, što prysud budzie vykarystoŭvacca suprać jaho dla nahniatańnia abstanoŭki.

«Mara: praz 10 hod źniać film pra Łukašenku»

Na fotazdymkach u asabistych sacsietkach Azaronak to z supracoŭnikami milicyi, to z vajskoŭcami, to z prapahandystami, to z Łukašenkam. U adnym ź intervju jon sam pryznavaŭsia, što volnaha času ŭ jaho asabliva i niama: «Navat u śnie baču siužety pieradač». I možna było b paradavacca za biełarusa, jaki znajšoŭ svaju ŭlubionuju spravu, kali b heta nie było pracaj u imia adnaho čałavieka.

Voś usiaho tolki niekalki cytat:

«Kali pašancavała słužyć takomu čałavieku (Łukašenku), heta samaja sapraŭdnaja ŭdača ŭ žyćci».

«Prezident dla mianie — uzor».

«Łukašenka — samy mocny palityčny lidar na jeŭrapiejskim kantyniencie».

«Mara: kali praz 10 hod daručać zrabić dobry film pra čarhovyja pieramohi prezidenta, ja budu rady».

Kruciejšy za Łukašenku dla Azaronka tolki boh i Stalin — jašče adzin jaho kumir. Ale jamu ŭžo na hetym śviecie nie paprysłužvaješ.

Navat na ŭznaharodžańnie premijaj «Televiaršynia-2022» Azaronak pryjšoŭ u majcy z Łukašenkam, u toj momant kali jaho kalehi apranuli hłamurnyja stroi

Navat na ŭznaharodžańnie premijaj «Televiaršynia-2022» Azaronak pryjšoŭ u majcy z Łukašenkam, u toj momant kali jaho kalehi apranuli hłamurnyja stroi

Takaja viernaść dyktatury znachodzić svaju acenku: spačatku Łukašenka zaprasiŭ Azaronka razam śviatkavać Novy hod, a potym uznaharodziŭ miedalom «Za advahu», źviazanaj ź jaho viernaściu padčas vybaraŭ-2020 i paśla ich. «Lubimy» ž Azaronkam Zachad uznaharodziŭ jaho sankcyjami. Na jutubie jaho kanał vydalaŭsia ŭžo šeść razoŭ.

Čytajcie taksama:

Byłaja supracoŭnica STB: Azaronak adnym ź pieršych skinuŭsia hrašyma apierataru na Akreścina, a Pustavy spravazdačyŭsia mamie, što pajeŭ

Jak prapahandyst Ihar Tur staŭ lubimčykam Łukašenki i kolki zarabiŭ u 2020-m

Chto taki Andrej Alaksandraŭ — prapahandyst ANT, jaki stažyravaŭsia ŭ «Žoŭtych źlivach» i jeździć na zatrymańni

Клас
48
Панылы сорам
54
Ха-ха
25
Ого
16
Сумна
31
Абуральна
114