Rasijski palitviazień Illa Jašyn: Zabojstva Navalnaha było spłanavana śpiecsłužbami RF, i momant pierad vybarami abrany śviadoma

Pra hibiel Alaksieja Navalnaha

«Da apošniaha ja spadziavaŭsia, što heta tolki čutki i moj siabra žyvy. <…> Ja byŭ ahałomšany. Skažu ščyra: u hłybini dušy ŭsie my, viadoma, razumieli, što Pucin moža zabić Navalnaha. Adnojčy jon užo sprabavaŭ heta zrabić, i Alaksiej tady cudam pieražyŭ atručeńnie. <…> Ale ŭsio roŭna zdavałasia, što Pucin nie aśmielicca, nie vyrašycca. Bo ŭsim budzie bačna, što jon zabiŭ. <…>

Adnak jon rašyŭsia. I kali ja daviedaŭsia pra heta, u mianie paciamnieła ŭ vačach ad žachu i hora. <…> Ja nie sumniavajusia, što zabojstva Alaksieja było dakładna spłanavana śpiecsłužbami i što momant pierad vybarami abrany śviadoma.

Mienavita hetaja pakazalnaja rasprava, pavodle zadumy Kramla, pavinna stać realnym simvałam padaŭžeńnia ŭłady Pucina na termin, roŭny astatku jaho žyćcia».

Pra bojaź za ŭłasnaje žyćcio

«U śviadomaści źniavolenych i achoŭnikaŭ, jakija mianie atačajuć, ukaraniłasia razumieńnie taho, što być u apazicyi ŭłady — značyć padviarhać siabie śmiarotnaj niebiaśpiecy. I ŭ hetym sensie hibiel Navalnaha ŭjaŭlajecca im całkam łahičnaj. <…>

Ździŭleńnie sukamiernikaŭ vyklikaje chutčej toje, što ja da hetaha času žyvy.

I za apošnija dni ja rehularna čuŭ ad ich pytańnie: «Jak dumaješ, a čamu ciabie jašče nie zabili?» U aficyjnuju viersiju pra tromb, jaki adarvaŭsia, i naturalnuju śmierć Alaksieja, padobna, tut naohuł nichto nie vieryć. <…>

Ja ŭśviedamlaju svaje ryzyki. Za kratami nichto nie moža harantavać biaśpieku, majo zdaroŭje i majo žyćcio zaležać vyklučna ad voli Pucina.

Pry hetym razumieju, što ja zastajusia razdražnialnikam dla Kramla i śpiecsłužbaŭ, bo, jak i Navalny, nie zamoŭk paśla aryštu. <…> Zrazumieła, heta pieratvaraje mianie ŭ patencyjnuju mišeń.

Mnie taksama viadoma pra niebiaśpieku, jakuju ŭ adnym ź intervju ahučyŭ žurnalist-rasśledavalnik Chrysta Hrozieŭ, jaki ŭ 2020 hodzie vyličyŭ atrutnikaŭ Navalnaha z FSB. Spasyłajučysia na svaje krynicy, Hrozieŭ papiaredziŭ, što paśla raspravy nad Alaksiejem u Rasii moža pačacca chvala represij i zabojstvaŭ, što ŭ Pucina «asablivyja płany» na apazicyjnych lideraŭ i što ŭ asabliva ŭraźlivym stanoviščy zaraz znachodziacca Uładzimir Kara-Murza i ja.

Zrazumieła, usio heta mocna niepakoić. Ale dla mianie heta ničoha nie mianiaje. Maŭčać ja ŭsio roŭna nie źbirajusia i lubuju dastupnuju mnie mahčymaść vykarystoŭvaju, kab raskazvać pra złačynstvy Pucina i zaklikać da vyvadu rasijskich vojskaŭ z Ukrainy».

Pra admovu šyć formu dla sałdat va Ukrainie

«Paśla karancinu ŭ kałonii miascovaja administracyja sprabavała prymusić mianie pracavać na budaŭnictvie novaha łahiernaha baraka ci ŭ šviejnym cechu, dzie vyrablajucca spalnyja miaški i adzieńnie častak rasiejskaha vojska, jakija vajujuć va Ukrainie.

Ja vietliva admoviŭsia, rastłumačyŭšy, što takaja praca supiarečyć maim pierakanańniam. <…> Admova ad pracy stała farmalnaj padstavaj dla pieravodu mianie na strohija ŭmovy ŭtrymańnia ŭ zamykanym pamiaškańni».

Pra ŭmovy ŭtrymańnia

«Ciapier tut sa mnoj siadziać šaściora mužčyn. Usie jany asudžanyja za hvałtoŭnyja złačynstvy: rabavańni, rekiet, źbićcio ludziej…. Zrešty, ja zmoh vybudavać sa ŭsimi karektnyja adnosiny i paźbiahaju kanfliktnych situacyj. Ježu nam prynosiać try razy na dzień: jak praviła, kašu, bulbu z kapustaj i rybnyja kansiervy. <…> Umovy ŭ mianie, zrazumieła, niaprostyja, ale ja viedaju, što Navalny siadzieŭ značna horš. Jaho faktyčna katavali karcaram i hoładam»

Pra Juliju Navalnuju

«My šmat hadoŭ siabravali i pracavali razam z Navalnym, i jon paznajomiŭ mianie sa svajoj žonkaj bolš za 20 hadoŭ tamu. Ja vielmi ciopła da jaje staŭlusia i viedaju, što jana była nie tolki žonkaj, ale i važnym daradcam Alaksieja, čyjo mierkavańnie jon zaŭsiody vielmi šanavaŭ.

Jula — čałaviek z mocnym charaktaram, mahutnym unutranym stryžniem i nievierahodnaj charyzmaj. Nie sakret, što jana nikoli nie chacieła być palitykam.

Ale ja ščyra rady, što Jula akazałasia hatova padchapić ściah svajho zahinułaha muža. I, viadoma, jana zaŭsiody moža raźličvać na maju padtrymku».

• 16
• 0
• 1
• 4
• 2
• 4
• 6
• 0