«Až da zvalnieńnia». Dziaržsłužboŭcam razasłali instrukcyju, jak siabie pavodzić

Jak śćviardžaje krynica «Lusterka», instrukcyju pad nazvaj «Infarmacyja pra miery adkaznaści za ŭdzieł u ekstremisckaj dziejnaści» ŭ biudžetnyja arhanizacyi razasłaŭ KDB.

Aznajomicca ź joj i raśpisacca pra heta musiŭ kožny dziaržaŭny słužboviec albo supracoŭnik biudžetnaj arhanizacyi, kaža surazmoŭca. Pavodle jaho słovaŭ, za admovu ad hetaha niazhodnych pahražajuć pakarać «až da zvalnieńnia».

U dakumiencie sabranyja cytaty z roznych zakonaŭ i narmatyŭnych aktaŭ, jakija tak ci inakš datyčać «ekstremizmu». U pryvatnaści, pryvodzicca padrabiaznaje aznačeńnie paniaćcia «ekstremisckaja dziejnaść» zhodna z zakonam «Pra supraćdziejańnie ekstremizmu».

Taksama nahadvajecca pra adkaznaść, praduhledžanuju Kryminalnym i Administracyjnym kodeksami za stvareńnie «ekstremisckaha» farmiravańnia albo ŭdzieł u im (art. 361−1 KK), ich finansavańnie (361−2 KK) i raspaŭsiud «ekstremisckaj» infarmacyi (art. 19.11 KaAP).

Akramia taho, dziaržaŭnych słužboŭcaŭ asobna papiaredžvajuć pra adkaznaść za zakliki da sankcyj (art. 361 KK) i dyskredytacyju Respubliki Biełaruś (art. 369−1 KK).

Asobnaj uvahi zasłuhoŭvajuć vytrymki z ahulnych patrabavańniaŭ słužbovaj etyki dziaržaŭnych cyvilnych słužboŭcaŭ (tak aficyjna nazyvajuć čynoŭnikaŭ roznych uzroŭniaŭ). Hety zbor praviłaŭ — dadatak da Zakona «Ab dziaržaŭnaj słužbie», pryniataha ŭ 2022 hodzie.

Zhodna z dakumientam, dziaržaŭnyja słužboŭcy «nie pavinnyja publična vykazvać u srodkach masavaj infarmacyi svajo mierkavańnie pa pytańniach dziaržaŭnaj palityki i słužbovaj dziejnaści». Ale rabić heta im zabaroniena tolki ŭ vypadku, kali ich asabistaje mierkavańnie nie adpaviadaje «asnoŭnym napramkam palityki dziaržavy».

U svaich akaŭntach u sacyjalnych sietkach čynoŭniki «nie pavinnyja dapuskać raźmiaščeńnie infarmacyi, raspaŭsiud jakoj u ŚMI zabaronieny, a taksama źviestak, zdolnych nanieści škodu ich piersanalnaj reputacyi i aŭtarytetu dziaržaŭnaj ułady ŭ cełym». Pry hetym ni zakon pra dziaržaŭnuju słužbu, ni ahulnyja patrabavańni etyki nie vyznačajuć krytery, pavodle jakich možna akreślić patencyjał naniasieńnia takoj škody.

U ahulnych pałažeńniach patrabavańniaŭ słužbovaj etyki skazana, što jany raspracavanyja ŭ adpaviednaści z Kanstytucyjaj, ahulnapryniatymi ŭ Biełarusi maralna-etyčnymi normami, a taksama Kanviencyjaj AAN suprać karupcyi i Mižnarodnym kodeksam pavodzinaŭ dziaržaŭnych słužbovych asobaŭ.

U dakumiencie havorycca, što za parušeńnie praviłaŭ praduhledžanaja dyscyplinarnaja adkaznaść čynoŭnikaŭ. Pavodle art. 73 zakona, heta moža być zaŭvaha, vymova (zvyčajnaja ci strohaja), papiaredžańnie pra niapoŭnuju słužbovuju adpaviednaść, pazbaŭleńnie premij na termin da hoda i navat zvalnieńnie.

Čytać taksama:

U Breście zatrymlivali i eks-mera Rahačuka, i abłasnoha kiraŭnika Šulejku

Były čynoŭnik raskazaŭ, jak pracavaŭ u vykankamie, nie pajechaŭ na mitynh za Łukašenku i za što chacieŭ by vybačycca

«Kali ŭłada źmienicca, jany ŭsie pieraabujucca». Pavuk raspavioŭ pra biełaruskich čynoŭnikaŭ i daŭ parady, jak ź imi razmaŭlać

• 1
• 0
• 35
• 19
• 2
• 3
• 22
• 0