«Denacyfikacyja — samaje tupoje, što ja čuŭ» — Takier Karłsan pra intervju z Pucinym
Amierykanski žurnalist, jaki ŭziaŭ intervju ŭ Pucina, padzialiŭsia svaimi ŭražańniami. Adnosna niekatorych pohladaŭ jon kateharyčna suprać.
Takier Karłsan u vialikaj razmovie ź inšym amierykanskim žurnalistam Leksam Frydmanam (Lex Fridman) padzialiŭsia svaimi ŭražańniami ab niadaŭnim intervju Pucina.
Frydman pacikaviŭsia dumkami Karłsana adnosna taho, što Pucin apraŭdvaje vajnu va Ukrainie «denacyfikacyjaj».
«Heta samaja tupaja reč, jakuju ja kali-niebudź čuŭ. Ja tak i nie zrazumieŭ, što heta značyć — «denacyfikacyja», — adkazaŭ Karłsan.
Pa słovach žurnalista, jamu vielmi nie spadabałasia ŭsia taja častka razmovy, u jakoj Pucin havaryŭ pra denacyfikacyju Ukrainy.
«Ja słuchaŭ i dumaŭ, heta samaja niepierakanaŭčaja replika, jakuju jon (Pucin — NN) moh prydumać. Siadzieŭ i słuchaŭ, jak jon havoryć pra nacystaŭ kala 8 chvilin. I ja padumaŭ, što jon sam u heta vieryć», — padzialiŭsia svaimi ŭražańniami Karłsan.
Na pohlad amierykanskaha žurnalista, razmovy ab denacyfikacyi — «sposab źviazać kahości sa złym režymam, jakoha bolš nie isnuje».
Karłsan patłumačyŭ: «Sprava ŭ tym, što «nacyzm», čym by jon ni byŭ, nieadździelny ad niamieckaj nacyi. Heta byŭ nacyjanalistyčny ruch u Hiermanii. Inšych nacystaŭ nie było. (…) Ja rašuča nastrojeny suprać nacystaŭ i chaču skazać, što ŭ 2024 hodzie nie isnuje nijakaha nacysckaha ruchu».
Na jaho dumku, abaznačeńnie kahości «nacystam» zjaŭlajecca prosta sposabam nazvać čałavieka «złom». Pa słovach Karłsana, padčas razmovy z Pucinym u jaho skłałasia ŭražańnie, što
«Pucinu nie padabajecca nacyjanalizm ukraincaŭ. Pucin nienavidzić nacyjanalizm u cełym. U jaho 80 niejkich respublik i jon baicca nacyjanalistyčnych ruchaŭ. Z-za hetaha jon vajavaŭ u Čačni. Ale ŭ mianie inšaje mierkavańnie. Ja za amierykanski nacyjanalizm, tak što ja nie zhodny z Pucinym u hetym pytańni. Ale nazyvać ich (ukraincaŭ — NN) nacystami, heta niejak vielmi pa-dziciačy».
Nahadajem, intervju Uładzimira Pucina Takieru Karłsanu adbyłosia 6 lutaha. Jano stała pieršaj takoha kštałtu razmovaj z zachodnim žurnalistam za apošnija niekalki hadoŭ. Karłsan viadomy siabroŭstvam z Donaldam Trampam i dobrazyčlivym staŭleńniem da Rasii. Ale jak bačym, pry ŭsioj svajoj łajalnaści i jon niekatoryja pohlady Pucina kateharyčna nie padzialaje.
Čytajcie jašče:
Jakija histaryčnyja dakumienty pra Ukrainu Pucin pakazaŭ Karłsanu
Pucin u intervju Karłsanu abvinavaciŭ Kijeŭ i Zachad u pačatku ciapierašniaj vajny va Ukrainie
Na zimu zapłanavanyja masavyja zatrymańni, składzienyja «pieršy i druhi śpisy»29
Kamientary