Palitviaźnia druhi raz buduć sudzić za danaty, niahledziačy na kaśmičnyja adkupnyja. Zaraz jamu pahražaje da 15 hadoŭ
Alaksandra Zijazetdzinava vosieńniu 2022 hoda ŭžo asudzili da troch hadoŭ kałonii za pieravod kryptavaluty ŭ «Bajpoł» i inšyja arhanizacyi za niekalki miesiacaŭ da pryznańnia inicyjatyŭ «ekstremisckim farmavańniem». Tady jon zapłaciŭ «adkupnych» 31 bitkojn, albo 775 tysiačaŭ dalaraŭ.
Siužet pra Alaksandra byŭ pakazany ŭ červieni 2023 hoda pa BT.
Tam raskazvali, što prahramista ź Minska vinavacili ŭ danatach kryptavalutaj roznym inicyjatyvam — «Kibierpartyzanam», «MotolkoPomohi», «Bajsoł», «Bajpoł».
Zatrymali letaś, dali 3 hady kałonii, a potym prapanavali adkupicca. U tym siužecie raskazvałasia, što mužčyna abmianiaŭ 31 bitkojn i zaličyŭ sumu na rachunki miedustanoŭ, a taksama padaŭ chadajnictva ab pamiłavańni. Tady adzin bitkojn kaštavaŭ 25 tysiač dalaraŭ (to-bok jon moh «achviaravać» dziaržavie tady sumu ekvivalentnuju 775 tysiačam dalaraŭ).
Zaraz adzin bitkojn naohuł kaštuje 51 800 dalaraŭ.
Tym nie mienš mužčynu pryznali vinavatym pavodle č. 1 art. 361-2 (finansavańnie ekstremisckaj dziejnaści). Adbyvać termin jaho nakiravali ŭ škłoŭskuju kałoniju № 17.
Ciapier stała viadoma, što 29 lutaha Alaksandra znoŭku buduć sudzić u Minskim haradskim sudzie.
Jaho abvinavačvajuć pavodle č. 1 art. 361-2 (finansavańnie ekstremisckaj dziejnaści) i č. 2 art. 290-1 (finansavańnie terarystyčnaj dziejnaści). Ciapier mužčynie pahražaje da 15 hadoŭ kałonii. Spravu budzie razhladać sudździa Alena Šylko, piša «Viasna».
Padtrymać viaźnia: SIZA-1, 220030, Minsk, Vaładarskaha, 2, Zijazetdzinaŭ Alaksandr Zufarjevič
Kamientary