Maci i advakataŭ Navalnaha nie puskajuć u morh, dzie, imavierna, znachodzicca cieła palityka
Pres-sakratarka Alaksieja Navalnaha Kira Jarmyš napisała ŭ sacsietkach, što maci palityka i advakaty ranicaj u paniadziełak pryjechali da morha ŭ Salechardzie. Ale ŭnutr ich nie puskajuć.
«Adnaho z advakataŭ litaralna vyšturchali. Na pytańnie, ci tam cieła Alaksieja, supracoŭniki nie adkazvajuć», — napisała jana ŭ X.
«Miedyjazona», praanalizavaŭšy videazapisy z kamier nazirańnia, vyjaviła kartež FSVP, jaki moh pieravozić cieła Navalnaha ŭ Salechard u noč z 16 na 17 lutaha.
Za try dni, jakija prajšli z momantu śmierci Navalnaha, jaho siamja tak i nie atrymała cieła.
«Novaja hazieta Jevropa» sa spasyłkaj na krynicu pisała, što cieła Navalnaha znachodzicca ŭ morhu akruhovaj kliničnaj balnicy Salecharda. Pavodle infarmacyi vydańnia, cieła palityka dastavili ŭ balnicu ŭviečary 16 lutaha. Pa stanie na 17 lutaha, uskryćcio nie pravodziłasia.
Maci i advakataŭ Navalnaha, jakija na minułym tydni pryjechali ŭ kałoniju ŭ Charpie, adpravili ŭ morh Salecharda. Ale tam im skazali, što ŭ ich cieła niama. A ŭ śledčym upraŭleńni, pavodle źviestak paplečnikaŭ Navalnaha, zajavili, što dahetul vyśviatlajuć pryčyny śmierci i nie skončać pravierku raniej, čym na nastupnym tydni.
«Čym daŭžej ciahnuć z uskryćciom cieła Navalnaha, tym mienš vierahodnaj ujaŭlajecca naturalnaja pryčyna jaho śmierci», — skazaŭ VVS zahadčyk adździeła paślaapieracyjnaj miedycyny ŭ adździaleńni aniestezijałohii i reanimacyi kliniki Tufts Medical Center u ZŠA Kanstancin Bałonaŭ.
Zakachanyja ŭ Minsku chacieli sabrać z padpisčykaŭ $10 tysiač na viasielle mary. Kolki ž u vyniku im zadanacili?10
Kamientary