Jak vyhladajuć debaty na BT: manałohi kandydataŭ, a paśla dźvie chviliny abmierkavańnia Kurapataŭ
Častkaj vybarčaj kampanii — 2024 źjaŭlajucca debaty kandydataŭ, jakija bałatujucca pa adnoj vybarčaj akruzie. My pahladzieli adny ź ich — z udziełam prapahandysta Alaksandra Špakoŭskaha, jaki ciapier pracuje ŭ biełaruskim pasolstvie ŭ Rasii.
U «debatach» pryniali ŭdzieł try kandydaty ŭ deputaty Pałaty pradstaŭnikoŭ pa Śvisłackaj vybarčaj akruzie №95. Heta Alaksandr Špakoŭski, kamunist, falsifikatar historyi Alaksandr Płavinski, a taksama ablicoŭščyk-plitačnik z ŁDPB Dźmitryj Jurjeŭ.
Zhodna z zakanadaŭstvam, dla teledebataŭ kožnamu kandydatu advodzicca pa 5 chvilin. Jak ich vykarystoŭvać, kožny vyrašaje pa-svojmu. Viadučy rekamiendavaŭ zrabić nievialikaje ŭstupnaje słova i pakinuć čas na zaklučnaje słova, a asnoŭnuju častku advieści na pytańni apanientam i adkazaŭ na sustrečnyja pytańni.
Pieršy svaju pafasnuju pramovu začytvaŭ Dźmitryj Jurjeŭ. Jon paviedamlaŭ pra toje, što takoje Libieralna-demakratyčnaja partyja, jakaja «pracuje kožny dzień na karyść naroda, padtrymlivaje siłavyja struktury, biełaruskuju armiju, i zaŭsiody z narodam».
Kandydat tak zachapiŭsia apoviedam pra svaju hramadskuju pracu sa zvarotami hramadzian i pa realizacyi prajektaŭ ź niepaŭnaletnimi, što viadučamu daviałosia jaho pierabić i papiaredzić, što zastałosia tolki dźvie chviliny dla taho, kab zadać pytańni. Ale Jurjevu było važna dačytać svoj tekst da kanca.
Čarha pierajšła da Alaksandra Špakoŭskaha. Były prapahandyst, a ciapier dypłamat zajaviŭ, što jaho pohlady supadajuć z pałažeńniami prahramy partyi «Biełaja Ruś» — imknieńnie da pabudovy «dziaržavy dla narodu», zachavańnie suvierenitetu Biełarusi i «miratvorčuju misiju» biełaruskaj dypłamatyi. U svajoj akruzie Špakoŭski źbirajecca vyrašać prablemu žylla. Paśla vystupu ŭ prapahandysta zastalisia dźvie chviliny.
Alaksandr Płavinski ŭ svaim vystupleńni zapeŭniŭ, što ŭsie pytańni, jakija buduć uźnikać u jaho vybarščykaŭ, budzie vyrašać «chutka i biezahavoračna». Vystupoŭca adznačyŭ, što jon, jak i jaho partyja, vystupaje za sacyjalna aryjentavanuju dziaržavu, bo «sam naradziŭsia i vyras pry Savieckim Sajuzie i dobra pamiataje, što heta takoje».
Pra Kurapaty
Płavinski adznačyŭ, što šmat zajmajecca vyvučeńniem historyi i vykryćciom histaryčnych falsifikacyj.
A paśla pačaŭ pierakazvać svaju antynavukovuju teoryju nakont Kurapataŭ, jakuju sprabuje prasunuć u hramadskuju śviadomaść. «Nivodnaha dokazu taho, što ŭ Kurapatach lažać achviary NKUS, niama», — davodziŭ hora-historyk.
Nie spyniajučy svajho vystupu (a zastavałasia adna chvilina), Płavinski źviarnuŭsia da Špakoŭskaha: «Chacieŭ by daviedacca Vašu pazicyju adnosna taho, chto i kali rasstrelvaŭ tam ludziej».
Špakoŭski adkazaŭ, što «na siońnia kropka ŭ historyi Kurapat nie pastaŭlena». «Tam stvorany niejki niesankcyjanavany miemaryjał. My na siońnia nie viedajem kankretnaj kolkaści asobaŭ, tam pachavanych, i nie viedajem, chto ŭ hetaj trahiedyi vinavaty», — zajaviŭ Špakoŭski i praciahnuŭ:
«Bolš za toje. Ja dazvolu sabie takoje vykazvańnie, jakoje, moža być, niekamu nie spadabajecca. Ja skažu, što ŭ tak zvanyja stalinskija represii 30-ch hadoŭ daloka nie ŭsie ludzi, jakija padviarhalisia vyšejšaj miery pakarańnia, byli sapraŭdy nievinavatymi i daloka nie ŭsie ŭ dalejšym byli reabilitavanyja. Tamu z hetym pytańniem my pavinny jašče razabracca».
Ale z pohladam Płavinskaha ab niedatyčnaści da rasstrełaŭ u Kurapatach NKUS Špakoŭski nie staŭ salidaryzavacca, zajaviŭšy:
«Sa svajho boku tak adnaznačna ja śćviardžać nie mahu. U Biełarusi jość cełaja škoła ludziej z navukovymi stupieniami, jakija śćviardžajuć, što savieckija orhany dziaržbiaśpieki mieli adnosiny da hetaj trahiedyi».
Na hetym debaty skončylisia. Bolš pytańniaŭ kandydaty ŭ deputaty nie zadavali. Jak zajaviŭ Jurjeŭ, jon aznajomiŭsia z prahramami svaich apanientaŭ: «Našy prahramy ŭ pryncypie blizkija. Niachaj pieramoža macniejšy».
Nieviadoma za kaho prahałasujuć tyja ludzi, jakija dojduć da ŭčastkaŭ, ale pieramožcam abvieściać Alaksandra Špakoŭskaha. Jaho kandydatura była ŭzhodnienaja na vysokim uzroŭni pa kvocie ad Ministerstva zamiežnych spraŭ.
Čytajcie jašče:
Hajdukievič, Hihin, Špakoŭski, Šaŭcoŭ, Barsukoŭ i astatnija. Chto ŭ Minsku sabraŭsia ŭ deputaty
Zakachanyja ŭ Minsku chacieli sabrać z padpisčykaŭ $10 tysiač na viasielle mary. Kolki ž u vyniku im zadanacili?13
Kamientary