Čały: Hałoŭnaje adkryćcio, jakoje nas čakaje, — usio adbudziecca raniej, čym my dumajem
Analityk Siarhiej Čały ŭ vypusku «ČiestnOK-LIVE» padzialiŭsia prahnozam, kali čakać pieramien u Biełarusi, raskazaŭ pra staŭleńnie da Aryny Sabalenka i patłumačyŭ, kaho ličyć najhoršym u atačeńni Łukašenki.
«Tam bieznadziejnaja panika»
Padčas hutarki Siarhiej Čały padzialiŭsia svaim mierkavańniem pra situacyju ŭ Biełarusi.
«Tam usio vielmi niaprosta. Z ekanomikaj jany nie viedajuć, što rabić, niahledziačy na ŭsie razmovy. Apošnija zachady absalutna niekampietentnyja. I vykanaŭcaŭ tam niama. I tyja, chto zastaŭsia, na žal, stracili svaju reputacyju. I vialikaha žadańnia dalej ratavać [ekanomiku] u ich niama.
Imkliva paharšajucca mahčymaści samoha Łukašenki. Ja hladžu na jaho, i mnie fizična stanovicca baluča. Ja baču, jak intelektualnyja i fizičnyja siły jaho pakidajuć.
I voś u takoj situacyi kraina žyvie. Praz uvieś flor pra toje, jak usio zdorava, praryvajucca razmovy pra toje, što peŭnaja panika tam prysutničaje. Prablema ŭ tym, što jana bieznadziejnaja».
Čały patłumačyŭ: kali raniej u ciažkich situacyjach možna było znajści ludziej, jakija byli hatovyja zamianić «idyjotaŭ, jakija heta ŭsio navaracili», to ciapier heta značna składaniej.
«Ja dumaju, što hałoŭnaje adkryćcio, jakoje nas usich čakaje, heta toje, što ŭsio adbudziecca raniej, čym my dumajem. A pa-druhoje, nie znojdziecca nikoha, chto voźmiecca razhrabać hetyja aŭhijevy stajni paśla taho, jak jany ich kančatkova zapaskudziać».
«U niejki momant jany vyrašyli, što sami zmohuć abyścisia biez hetych «zdradnikaŭ»-intelektuałaŭ. Potym dla ich vyjaviłasia niečakanym, što hetyja «zdradniki»-intelektuały rabili ŭsiu pracu za ich, a jany ŭmieli tolki kantralavać. Ale ciapier i kantralavać niama kaho, bo achvotnych niama. I nastupny kryzis, jaki adbudziecca, budzie na ich. Bo nichto na siabie adkaznaść nie voźmie. Adsiul hetaja panika. Plus da ŭsiaho čas niaŭmolna sychodzić».
Pa słovach Čałaha, Łukašenka dobra adčuvaje, što sistema paśla jaho nie praciahniecca. «Jana razvalicca ŭmomant. Budzie svoj anałah XX źjezda partyi, kali ŭsie tyja, chto mieŭ dačynieńnie da ŭsich paskudstvaŭ, što rabiŭ Łukašenka ź ich dapamohaj, skažuć, što nasamreč heta byŭ «kult asoby». Heta ŭsio Łukašenka, my pakutavali taksama. Ciapier narešcie my ad hetaha pazbavilisia i budzie adliha».
Pieramieny ŭ Biełarusi, aceńvaje analityk, mohuć adbycca praz 3-4 hady.
Ci radavaŭsia pieramozie Aryny Sabalenka
Čały adznačyŭ, što jamu bolš za finalnuju hulniu Aryny Sabalenka na Australian Open spadabaŭsia paŭfinał. Na jaho pohlad, finał byŭ niecikavy.
«Ja dumaju, što ŭ jaje mocnaja forma, tamu što narešcie jana skazała: «Adstańcie ad mianie, ja hulaju ŭ tenis. Aŭstralija ciapier moj dom. Idzicie ŭsie ŭ zadnicu». I takim čynam jana nabyła narmalny dušeŭny spakoj».
Čały źviarnuŭ uvahu, što ŭ adroźnieńnie ad futbołu tenis — całkam indyvidualnaja hulnia.
«Heta ŭžo dakładna toje, dzie ni dziaržava, ni Łukašenka nijakim čynam akazvać nijakaj dapamohi nie mohuć i nie ŭmiejuć. Ty vałodaješ talentam, ciabie vyvoziać u Ispaniju. Ty tam znachodziš treniera. Ty bolš za pałovu hoda ci navat uvieś hod žyvieš za miažoju, tam treniruješsia. Heta niby tvaja inviestycyja. Potym pačynaješ siamji viartać.
Heta darahi nasamreč vid sportu. Heta indyvidualnyja zasłuhi. Łukašenka pasprabavaŭ siabie da hetaha prymazać. Nu što joj treba było skazać? «Alaksandr Ryhoravič, idzicie nafih»? Nu tak ža nie pracuje».
Apošniaja razmova z Łukašenkam
U 1990-ch Siarhiej Čały ŭvachodziŭ u atačeńnie Łukašenki. Jon zhadaŭ pra svaju apošniuju razmovu ź im.
«Tady, skažu ščyra, žyć na toj zarobak, što byŭ navat u Administracyi, było vielmi ciažka. Realna niejki varjacki Saviecki Sajuz, kali ludzi vystrojvalisia pa praduktovyja zamovy, jak u savieckija časy. Niejkaja kuryca, hrečka. Niejkaja łuchta. I voś paśla hetaha była razmova, jakaja mnie vielmi zapomniłasia.
«Ja ciabie razumieju. Ty chočaš biznes. Ale navošta tabie niejki biznes, u nas ža jość svoj».
Ja padumaŭ: «Nie, chłopcy, chopić užo». Tam byli jašče zachody kštałtu: «Ty tam kaliści za ideju byŭ». «Nie, chłopcy, za ideju ŭ vas takich hrošaj niama».
Pa słovach Čałaha, hetaja sustreča była pieršaj i apošniaj, kali jon byŭ «u vialikim kabiniecie».
Chto najbolšaje zło ŭ atačeńni Łukašenki
Siarhiej Čały adznačyŭ, što Kačanava — prykład usiaho samaha niehatyŭnaha, što moža być z kadravaj palitykaj Biełarusi. Da svajoj pasady, ličyć analityk, jana dajšła «bieź nijakich umieńniaŭ, nie kažučy pra talenty, tolki na liślivaści».
Zhadvajučy Jarmošynu, Čały vykazaŭsia, što jana ŭ adroźnieńnie ad Kačanavaj dobra razumieła, što robić. I ludziej z takoj zdolnaściu padmanvać u adkrytuju vielmi mała.
«Jarmošyna — heta naŭmysnaje zło ŭ čystym vyhladzie», — daŭ acenku analityk.
Havoračy pra Ivana Cierciela, Čały adznačyŭ, što, na jaho pohlad, KDB ciapier maje mienš upłyvu na situacyju, chacia sprabuje aktyŭna viartać stračanyja pazicyi.
«Ciapier usio zło skancentravana ŭ tym hiestapa, jak jany sami siabie nazyvajuć, ci HUBAZiKu. Karpiankoŭ, jaki znajšoŭ sabie narešcie zaniatak. Tamu što arhanizavanaj karupcyjaj zajmacca było niecikava. Adździeł praktyčna rasfarmavali. A voś ciapier narešcie palityčny vyšuk. Jon jaho całkam adabraŭ ad KDB. Tyja choć niejak sprabavali pretendavać na intelektualizm. A hetyja skazali «nafih». Dubinki, zbroja — i napierad.
Paraŭnańnie Karpiankova z Karanikam, na pohlad Čałaha, zaležyć ad kryteryjaŭ:
«Kali havaryć pra złamysnaść, to, zrazumieła, Karpiankoŭ. Kali havaryć pra nastupstvy, to na sumleńni Karanika (chutčej ad słabaści jaho charaktaru) kala 30 tysiač praźmiernych śmierciaŭ biełarusaŭ padčas karanavirusu».
Čały zhadvaje naradu ŭ Łukašenki, jakaja adbyłasia, kali tolki karanavirus pryjšoŭ u Biełaruś. Na joj prysutničali cyvilnyja miedyki i vajskovyja miedyki. Pieršyja havaryli pra nieabchodnaść uviadzieńnia karancinu. Łukašenka dumaŭ, što vajskovyja miedyki vystupiać suprać.
«Ale tyja skazali, što ŭ ich jość pratakoł na vypadak niejkaj bakteryjałahičnaj vajny. Nieabchodna razvaročvać śpiecyjalnuju balnicu, jakaja budzie absłuhoŭvać chvorych. I ŭsie inšyja miery ŭklučna z karancinam. Tady ž prahučała ličba, čaho moža kaštavać niepryniaćcie hetych mier, prykładna 30 tysiač čałaviek.
Hetaja madel, jak i ŭsie, što byli na toj čas, akazałasia strašniejšaj za realnaść, ale potym pa danych, jakija možna było adnavić (da taho, jak statystyku zakryli), dziŭnym čynam heta acenka akazałasia dastatkova dakładnaj», — vykazaŭ svajo bačańnie analityk.
Pa słovach Čałaha, Karanik akazaŭsia słaby charaktaram i nie zdoleŭ pieraŭpeŭnić Łukašenku. Jon vybraŭ stratehiju padyhryvać pamyłkovym pohladam, karjernyja mierkavańni zamiest taho, kab ratavać ludziej.
Čytajcie jašče:
Siarhiej Čały zapuskaje viečarovaje šou
U Alaksandra Ivulina novy jutub-kanał i novaje šou. Što tam cikavaha?
Paśla danosu Bondaravaj raptoŭna admianili vystavu ŭ muziei Janki Kupały. Ciapier jana patrabuje na muziei šyldy pa-rusku19
Paśla danosu Bondaravaj raptoŭna admianili vystavu ŭ muziei Janki Kupały. Ciapier jana patrabuje na muziei šyldy pa-rusku
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu55
Kamientary
baleje za łukašenku... čamu dasiul nie ŭ kamisii pa viartańni? prymuć z raspraściortymi abjaćciami, jak viernaha łukašysta (V 1993 hodu učastvovał v kačiestvie analitika v priedvybornom štabie kandidata v priezidienty Riespubliki Biełaruś Aleksandra Łukašienko. Svojo učastije pozdnieje Sierhiej Viačiesłavovič objaśniał žiełanijem...)