«Maje ŭsie šancy abrynucca na hałavu krytykanam». Dziaržaŭnaje vydańnie isteryčna baronić niepiśmiennaść na minskim čyhunačnym vakzale

Razam z načalnikam čyhunačnaj stancyi «Minsk-Pasažyrski» Alaksandram Drožžam supracoŭnica «Minsk-Navinaŭ» starajecca ŭsialak apraŭdać i praktyku zaklejvańnia nadpisaŭ, i navat dapuščanyja hrubyja hramatyčnyja pamyłki.

Pakolki zmahańnie ź biełaruskaj łacinkaj i anhlijskaj movaj viadziecca ŭdarnymi tempami, to, pavodle słoŭ Alaksandra Drožžy:

«Z ulikam vialikaj kolkaści infarmacyjnych pakazalnikaŭ — bolš za 800 štuk — pry ich vyrabie, na žal, nie ŭdałosia paźbiehnuć pamyłak, jakija nosiać adzinkavy charaktar i, u bolšaści svajoj, źviazanyja z praviłam naroščvańnia ličebnikaŭ. Praca pa abnaŭleńni infarmacyi na techničnych srodkach aryjentavańnia praciahvajecca, a vyjaŭlenyja niedachopy buduć likvidavanyja ŭ najbližejšy čas».

Adnosna pamyłak u biełaruskich nadpisach kamientary daje ŭžo sama Kryścina Kryvaručka, i robić heta ŭ zusim inšym styli:

«Niekatorych cyvilnych mocna aburyła, čamu napisana «pakoi maci i dziciaci» — pravilna ž «pakoj». Chto ciapier pracior vočy i ŭsio jašče nie zrazumieŭ sutnaść pretenzii — sprava ŭ «j». Mnie čysta vypadkova na vočy trapiŭsia nadpis (fota prykładajecca), jaki paćviardžaje: z praviłami napisańnia ŭsie vydatna znajomyja, a prykryja pamyłki druku (tut pieradajem pałymianaje pryvitańnie T9), jakija ciapier likvidujuć, zdarajucca navat u samych zaŭziatych i pravilnych kamientataraŭ».

Pavialičyć

Reahujučy na zaŭvahu žurnalista, što na adnym ź infarmacyjnych tabło, źniščajučy anhlijskuju movu, zaadno likvidavali cełyja pali z patrebnaj karystalnikam tłumačalnaj infarmacyjaj, Kryvaručka śćviardžaje, što heta «pachnie prydzirkami na roŭnym miescy».

Bo, «davajcie ščyra, bolšaść pasažyraŭ prachodziać da ciahnikoŭ praz centralnyja dźviery vakzała, i pierad ich vačyma elektronnaje tabło, da jakoha nijakich narakańniaŭ».

Alaksandr Drožža tłumačyć situacyju z tym tabło bolš spakojna i mudrahielista:

«Što tyčycca nadpisaŭ u infarmacyjnych palach elektronnaha tabło, varta patłumačyć, što, u zaležnaści ad kanstrukcyi, hetyja nadpisy vykananyja roznymi sposabami. U elektronnym vyhladzie — niepasredna na ekranie tabło (śviatłodyjodny modul) i ŭ statyčnym vyhladzie — kanstrukcyi, prymacavanyja na klejevaj asnovie da tabło.

I zamiena apošnich u ciapierašni čas niemahčymaja pa technałahičnych pryčynach, źviazanych ź nizkaj tempieraturaj źniešniaha pavietra. U suviazi z hetym pryniata časovaje rašeńnie pa zaklejvańni infarmacyi na takich tabło. Paśla ŭstalavańnia stanoŭčaj tempieratury źniešniaha pavietra kanstrukcyi buduć zamienienyja. Infarmacyjnyja nadpisy na tabło kala 22-24-ha puciej buduć adnoŭlenyja ŭ najbližejšy čas».

A prapahandystka, zaviaršajučy artykuł, navat prazrysta namiakaje žurnalistu Blizko.by na mahčymyja niepryjemnaści:

«Načalnik čyhunačnaj stancyi taktyčny, a asobna ŭziaty karespandent — nie vielmi. Viadoma, nadpis možna prylapić ciapier, ale jon maje ŭsie šancy abrynucca na hałavu tym ža krytykanam, jakija pilna vyhladvajuć kropku nad «j».

Čytajcie taksama:

Minski vakzał z dapamohaj izalenty pazbaviŭsia anhlijskaj movy. A voś kamandy vypravić pamyłki ŭ biełaruskaj nie było

Na Homielščynie dałažyli pra poŭnuju pieramohu nad łacinkaj

Kala Hrodna łacinku likvidavali navat u nazvach polskich haradoŭ

• 2
• 0
• 6
• 60
• 1
• 4
• 14
• 0