Klijentami jaho firmy byŭ Nacbank, Minpracy. Što viadoma pra palitviaźnia Vadzima Chraśko, jaki pamior u kałonii

Palitviazień Vadzim Chraśko pamior u noč na 9 studzienia ad zapaleńnia lohkich. Jaho dastavili z kałonii «Vićba» ŭ špital, ale vyratavać žyćcio mužčyny lekaram nie ŭdałosia. Mužčynu pachavali ŭ Miensku. Jamu było 50 hadoŭ.

Pracavaŭ u IT-firmach, zarehistravanych u pačatku 1990-ch

Pavialičyć

Pavodle infarmacyi, jakuju možna znajści ŭ sacyjalnych sietkach Vadzima, jon spačatku chadziŭ u škołu ŭ Zasłaŭi, potym u Miensku. Prafiesijnaja adukacyja paznačanaja jak niaskončanaja. Jahony baćka Navum, imavierna, moh pachodzić z Łatvii. Čałaviek z takimi imiem i proźviščam jość u śpisach KPSS u łatvijskim archivie.

Vadzim žyŭ u Miensku. Pracavaŭ u śfiery IT, u firmach, jakija zajmalisia raspracoŭkaj prahramnaha zabieśpiačeńnia z pačatku 1990-ch hadoŭ. Adno ź pieršych miescaŭ pracy — zamiežnaje pradpryjemstva «Łappa IP», jakoje isnavała z 1991 hoda. Ofis mieściŭsia na terytoryi Akademii navuk.

Apošnim miescam pracy Vadzim paznačyŭ kampaniju «Aviest». Jon byŭ kiraŭnikom hrupy. Tam jon pracavaŭ z 2000 hoda. Heta pryvatnaja kampanija, jakaja raspracoŭvała prahramnaje zabieśpiačeńnie kryptahrafičnaj abarony infarmacyi, abaraniała biznesy ad kibieratakaŭ. Jejnymi klijentami byli Nacbank, Ministerstva padatkaŭ i zboraŭ, Fond sacyjalnaj abarony nasielnictva, Ministerstva pracy, Biełaruskaja čyhunka, Biełahramprambank i niekatoryja inšyja banki.

Vioŭ siamiejny Youtube-kanał, hladzieŭ «Žyćcio-malina»

Vadzim vioŭ staronku ŭ sacyjalnych sietkach na rasiejskaj movie. Publikavaŭ tam u asnoŭnym fota i videa z žonkaj i starejšaj dačkoj. Jahonaja žonka pachodzić z Tatarstana, tam ža para ŭziała šlub. U siamji dvoje dziaciej, 5 i 9 hadoŭ.

Mužčyna navat mieŭ svoj nievialiki Youtube-kanał ź siamiejnymi videa. Jon fiksavaŭ, jak starejšaje dzicia pačynaje chadzić, bavicca, śviatkuje narodziny. «Pramień sonca załatoha», — padpisaŭ jon adzin z fotazdymkaŭ z dačkoj. Apošniaja jahonaja publikacyja ŭ sietkach była ŭ 2017 hodzie.

Pavialičyć

Vadzim hladzieŭ biełaruski Youtube-kanał Mikity Miełkaziorava «Žyćcio-malina», pieradačy rasiejskaha žurnalista Ilji Varłamava i dakumientalnyja filmy pra pryrodu. Słuchaŭ hurt Depeche Mode i cikaviŭsia, jak možna zrabić plaž z basiejnam doma.

Adpravili na try hady ŭ kałoniju za niekalki danataŭ

Vadzima Chraśko zatrymali letaś u krasaviku niezadoŭha da jahonaha dnia naradžeńnia. U žniŭni jaho asudzili na 3 hady kałonii ahulnaha režymu za niekalki danataŭ. Artykuł hučyć jak «finansavańnie dziejnaści ekstremisckaha farmavańnia». Detali spravy nieviadomyja, ale takoj arhanizacyjaj moh być, prykładam, Bajsoł, jaki źbiraje hrošy dla represavanych biełarusaŭ, abo połk Kalinoŭskaha, jaki vajuje na baku Ukrainy.

Pavialičyć

Chraśko sprabavaŭ abskardzić prysud u Viarchoŭnym sudzie, ale jaho pakinuli ŭ sile, niahledziačy na surjoznaje zachvorvańnie mužčyny. Da taho ž MUS uniesła jaho ŭ «śpis ekstremistaŭ».

Palitviaźnia nakiravali ŭ kałoniju pad Viciebskam, dzie siadzić šmat byłych čynoŭnikaŭ, siłavikoŭ, ekanamičnych złačyncaŭ. Tam jon prabyŭ kala dvuch miesiacaŭ.

Pavodle infarmacyi pravaabaroncaŭ, heta ŭžo čaćviortaja śmierć u źniavoleńni asudžanaha pa palityčnych matyvach. 21 traŭnia 2022 hoda ŭ škłoŭskaj kałonii № 17 (Mahiloŭskaja vobłaść) pamior 50-hadovy aktyvist i hramadski dziejač Vitold Ašurak, 7 traŭnia 2023-ha ŭ viciebskaj kałonii — 61-hadovy błohier i aktyvist Mikałaj Klimovič z chvorym sercam. 11 lipienia 2023 — pryviezieny ŭ balnicu z haradzienskaj turmy № 1 57-hadovy mastak Aleś Puškin, u jakoha dyjahnastavali prabadnuju jazvu.

• 7
• 0
• 1
• 2
• 0
• 37
• 38
• 0