Pad ciskam kankurentaŭ biełaruski vytvorca hruzavikoŭ pastupova hublaje svoj hałoŭny rynak, piša vydańnie «Biełarusy i rynak».
Letaś MAZ pavialičyŭ prodažy hruzavikoŭ na rasijskim rynku, ale razam z tym ich dola na tym ža rynku skaraciłasia.
Pavodle danych Aŭtastata, MAZ letaś pradaŭ u Rasii 6,3 tys. hruzavikoŭ. Amal na 44% bolš, čym hodam raniej. Statystyka vyhladaje davoli simpatyčna.
Ale, niahledziačy na ŭražalnyja pracenty rostu, prodažy biełaruskich hruzavikoŭ u Rasii raśli značna pavolniej za rost rynku. Ahułam letaś u Rasii było pradadziena 143,7 tys. novych hruzavikoŭ. I heta na 70% bolš, čym hodam raniej. I na fonie hetych 70% sarakapracentny rost prodažaŭ MAZaŭ užo nie vyhladaje takim samavitym.
Adpaviedna, dola hruzavikoŭ MAZ na rasijskim rynku letaś źmienšyłasia da 4,4% z 5,2%. Biełaruskija hruzaviki ŭ Rasii adsoŭvajuć kankurenty. Druhoje miesca na rasijskim rynku paśla KAMAZ, zaniaŭ kitajski Sitrac, jaki pavialičyŭ prodažy svaich hruzavikoŭ u 6,4 razy. Na trecim miescy taksama kitajskaja kampanija SHACMAN z rostam prodažaŭ bolš čym u dva razy.
A kitajski Foton pavialičyŭ prodažy svaich mašyn naohuł u 43 razy. Kali ŭ 2022 hodzie heta kampanija pradała ŭ Rasii tolki 145 mašyn, to ŭ 2023 hodzie jana amal dahnała MAZ, pradaŭšy 6,27 tys. aŭtamabilaŭ. Na fonie kitajskich pośpiechaŭ biełaruski rost užo zusim nie ŭražvaje.
Da taho ž pry roście prodažaŭ za hod bolš čym na 40% u śniežni prodaž hruzavikoŭ MAZ u Rasii skaraciŭsia na 5,5%. Kali ŭ śniežni 2022 hoda MAZ pradaŭ 566 svaich hruzavikoŭ, to ŭ śniežni 2023 užo tolki 535. Pry tym, što rynak prodažu hruzavikoŭ u Rasii praciahvaŭ raści. I za śniežań minułaha hoda jon vyras amal na 20%. Na 70% naraściŭ svaje prodažy Sitrac, na 10% — SHACMAN, i amal u vosiem razoŭ — kitajski Foton.
I jašče adna maleńkaja, ale ad hetaha nie mieniej važnaja detal, składajecca ŭ pryčynach, pa jakich rynak rasijskich hruzavikoŭ pakazaŭ taki burny rost. Vidavočna, heta adbyłosia z pryčyny vajennych dziejańniaŭ va Ukrainie. Tamu što dla vajny patrebnyja nie tolki tanki i samaloty. Patrebnyja jašče hruzaviki, kab pieravozić vajennyja hruzy.
Adpaviedna, bolšaja častka pryrostu pryjšłasia na dziaržaŭny abaronny zakaz. Śfieru, u jakoj biełaruskija ŭłady zaŭsiody siabie adčuvali, jak ryba ŭ vadzie. Heta značyć, kitajcy adsoŭvajuć biełaruskich vytvorcaŭ navat tam, dzie palityčnyja mierkavańni, asabistyja suviazi i ŭmieńnie damovicca zaŭsiody pieravažali nad rynačnymi mierkavańniami.
Jak skłałasia žyćcio vunderkinda z Žodzina, jaki ŭ 12 hadoŭ pastupiŭ u miedycynski ŭniviersitet?9
Kamientary