U haradzienskaj turmie, dzie trymajuć viadomych palitykaŭ, apynuŭsia fihurant spravy Aŭtuchoviča Pavał Razanovič, jakoha ŭ 2022 hodzie asudzili za «padrychtoŭku da teraryzmu».
Palitviaźnia Paŭła Razanoviča pieraviali z kałonii № 17 u Škłovie ŭ haradzienskuju turmu № 1 u śniežni minułaha hoda. Daśviedčanaja krynica taksama paviedamiła Svabodzie, što ŭmovy ŭtrymańnia Razanoviča stali bolš žorstkimi, ale skarhaŭ ad jaho nie atrymlivali.
«Pieraviali na turemny režym. Ale staŭleńnie ŭ novaj viaźnicy narmalnaje, dachodziać listy, jość spatkańni. Jon nie skardzicca, nastroju nie tracić», — paviedamiŭ surazmoŭca.
Pavał Razanovič maje jurydyčnuju adukacyju, da aryštu ŭvosień 2020 hodu jon pracavaŭ u rajonnym adździele prymusovaha vykanańnia pakarańniaŭ u Breście. Razanoviča asudzili na 19 hadoŭ źniavoleńnia. Jaho pryznali vinavatym pavodle čatyroch artykułaŭ Kryminalnaha kodeksa, u tym liku ŭ padrychtoŭcy da akta teraryzmu.
Na sudzie abvinavačany viny nie pryznavaŭ i paviedamiŭ, što suprać jaho padčas śledstva ŭžyvali fizičnyja i psichałahičnyja katavańni. Z papraŭčaj kałonii ŭ krytuju turmu Razanoviča pieraviali pa pastanovie sudu jak złosnaha parušalnika režymu ŭtrymańnia.
U spravie Mikałaja Aŭtuchoviča ab teraryźmie ŭsiaho fihuravała 12 čałaviek, siarod ich piensijanierka Iryna Mielchier z Bresta. Iryna adbyvaje pakarańnie ŭ homielskaj žanočaj kałonii № 4. Pra situacyju ŭ Iryny Mielchier raskazała asudžanaja, jakaja niadaŭna vyzvaliłasia z kałonii.
«Joj 68 hadoŭ, tamu na pracu jaje nie vodziać. Siadzić u korpusie; maksimum, čym jaje zajmajuć, — dziažurstvam pa atradzie. U jaje prablemy z chrybietnikam, uvohule sa zdaroŭjem nie ŭsio dobra, tamu hetym zajmajecca, niejak lečycca. Nastroj u jaje narmalny, jana maładych padtrymlivaje i pierakonvaje, kali što, dyk nie svarycca. Kaža, što my ŭsie tut u pałonie, tamu treba adpaviedna siabie pavodzić», — raskazała surazmoŭca.
Viadoma, što Iryna Mielchier z čatyroch vystaŭlenych joj abvinavačańniaŭ pryznała vinu tolki ŭ adnym — va ŭdziele ŭ karahodzie, jaki 13 vieraśnia 2020 hodu praviali ŭ Breście demanstranty na znak pratestu suprać falšavańnia prezidenckich vybaraŭ. Sud pakaraŭ žančynu 17 hadami źniavoleńnia.
Pravaabaroncy pryznali Irynu Mielchier, jak i inšych fihurantaŭ spravy Aŭtuchoviča, palitviaźniami.
Kubrakoŭ adpraviŭ na miažu z Ukrainaj AMAP i ŭnutranyja vojski — «kab nie dapuścić praryvu USU»5
Kamientary