Hałasuje ŭ «Adnakłaśnikach» u apytańniach pra Ukrainu, žonka była pradaŭcom. Piać faktaŭ pra novaha ministra ekanomiki

Pracavaŭ z rasijskimi inviestarami

Juryj Čabatar vykonvaŭ abaviazki ministra ekanomiki ź listapada 2023 hoda, kali jaho papiarednik Alaksandr Čarviakoŭ byŭ adpraŭleny Łukašenkam pasłom u Kitaj.

Pavialičyć

U viedamstvie Čabatar adkazvaŭ za impartazamiaščeńnie, a taksama pracavaŭ z rasijskimi inviestarami. U svaich intervju jon kazaŭ pra «indyvidualny padychod u pracy z rasijskimi rehijonami».

«My raźličvajem, što realizacyja sumiesnych prajektaŭ u ramkach prahramy «Biełaruś — Rasija» daść mahčymaść uzmacnić intehracyju našych rehijonaŭ, raźvivać i ŭmacoŭvać ich vytvorčy, łahistyčny, demahrafičny i sacyjalny patencyjały», — kazaŭ jon letaś u červieni.

U listapadzie na biełaruskim inviestycyjnym forumie ŭ Maskvie čynoŭnik davodziŭ, što «siońnia inviestklimat krainy hatovy mianiacca pad zapyty rasijskich partnioraŭ».

U Ministerstvie ekanomiki — 21 hod

Juryj Čabatar naradziŭsia ŭ Minsku ŭ 1979 hodzie. Vučyŭsia ŭ Sierabrancy ŭ škole № 123.

Jon vypusknik ulikova-ekanamičnaha fakulteta Biełaruskaha dziaržaŭnaha ekanamičnaha ŭniviersiteta (2002 hod).

Jak i bolšaść čynoŭnikaŭ, jakija imknucca zrabić u ciapierašniaj dziaržaŭnaj sistemie karjeru, maje dypłom Akademii kiravańnia (2008).

Ź ministerstvam ekanomiki Čabatar źviazany z 2002 hoda. Jon pačynaŭ małodšym navukovym supracoŭnikam navukova-daśledčaha ekanamičnaha instytuta Ministerstva ekanomiki. Paśla pracavaŭ u roznych adździełach viedamstva. U 2016-m staŭ namieśnikam ministra.

Pavialičyć

U razhar pieradvybarčaj kampanii 2020 hoda jon pierasieŭ u kresła pieršaha namieśnika ministra ekanomiki.

U 2015 hodzie Juryj Čabatar byŭ uznaharodžany miedalom «Za ŭkład u stvareńnie Jeŭrazijskaha ekanamičnaha sajuza». A ŭ 2023-m premjer Raman Hałoŭčanka ŭručyŭ jamu miedal «Za pracoŭnyja zasłuhi».

Udzielničaŭ u apytańniach pra Ukrainu ŭ «Adnakłaśnikach»

Juryj Čabatar z 2011 hoda maje akaŭnt u sacyjalnaj sietcy «Adnakłaśniki». Jana poŭnicca pieravažna vinšavańniami. Na zastaŭcy fota ź viasiołym čynoŭnikam na niečym viasielli.

Pavialičyć

U 2012 hodzie jon pachvaliŭsia fotazdymkam z savieckim HAZam i prakamientavaŭ jaho «Vpieried! Na cielinu».

Paśla poŭnamaštabnaha ŭvarvańnia Rasii va Ukrainu Čabatar prahałasavaŭ u apytańni, prymierkavanym da pryznańnia Pucinym niezaležnaści «DNR» i «ŁNR». Pytańnie było, ci sočycie vy za padziejami va Ukrainie. Jak adkazaŭ čynoŭnik, nie bačna.

Pavialičyć

Žonka pradaviec

Pavodle źviestak sa staronki čynoŭnika ŭ sacyjalnaj sietcy, jaho žonka Kaciaryna Čabatar, u dziavoctvie Boda, pracavała pradaŭcom na Minskim aŭtamabilnym zavodzie. Jana vypusknica Minskaha handlovaha kaledža.

Kaciaryna taksama rabiła pradaŭcom u Starych Darohach, piša «Radyjo Svaboda» na padstavie źviestak ad «Biełpoł».

Siamja žyvie ŭ mikrarajonie Kamiennaja Horka ŭ Minsku, haduje dvaich dziaciej-školnikaŭ.

Baćka — inžynier, maci — fiłołah ź Instytuta movaznaŭstva

Jak daviedałasia «Radyjo Svaboda», baćka čynoŭnika Adam Čabatar pracavaŭ viadučym inžynieram-kanstruktaram na AAT «KBTEM-OMA». Pradpryjemstva zajmajecca raspracoŭkaj śpiecyjalnaha optyka-miechaničnaha, technałahičnaha i kantrolna-vymiaralnaha abstalavańnia.

Maci Juryja Čabatara Nadzieja Andrejeŭna pracavała ŭ Instytucie movaznaŭstva NAN. Jana sumiesna z Hannaj Arašonkavaj skłała «Tłumačalny słoŭnik admietnaj leksiki ŭ tvorach Jakuba Kołasa». Taksama ŭ jaje šmat inšych publikacyj, pryśviečanych roznym aśpiektam movy Jakuba Kołasa.

Pa pryznačeńni na ministerskuju pasadu Čabatar zajaviŭ, što ekanomika adaptujecca da ciapierašnich vyklikaŭ i składanaściaŭ, dziakujučy rašeńniam Łukašenki i ŭradu.

Pavodle novapryznačanaha ministra, u pieryjad elektaralnaj kampanii 2024 hoda Ministerstva ekanomiki pavinna hučać, vychodzić ź inicyjatyvami.

Hladzicie taksama:

Nivodzin biełaruski rehijon nie vykanaŭ metavych pakazčykaŭ — Hałoŭčanka

Hałoŭčanka zaklučyŭ pahadnieńnie ab humanitarnaj dapamozie Danbasu

Ministerstva ekanomiki: Biełaruś moža stracić 20 młrd dalaraŭ u vyniku sankcyj ES

Što Biełarusi vyhadniej ekanamična — imknucca ŭ ES abo zastavacca ŭ sajuzie z Rasijaj?

• 6
• 0
• 14
• 9
• 2
• 2
• 5
• 0