Heta druhaja častka padborki. U pieršaj — kanały ź intervju.

ČinČinČieneł

Byłyja kupałaŭcy zładzili satyryčny prajekt, što dapamoža pahladzieć na biełaruskuju rečaisnaść ź inšaha boku. U centry — dva vydumanyja biełaruskija čynoŭniki, Siarhiej Mikałajevič i Mikałaj Siarhiejevič, a taksama ich pryhody ŭ varožaj Jeŭropie i ŭ rodnaj stabilnaj Biełarusi. Zoračka prajekta Alena Žałudok vypuskaje humarnyja pieśni (vy dakładna viedajecie «Ščučynščynu»), a «na dyvan» da čynčynaŭ prychodziać viadomyja biełarusy — apošnim, naprykład, byŭ Malavanyč.

Budźma Biełarusami!

Hety prajekt na 43,6 tysiačy padpisantaŭ prapanuje biełaruskamoŭny adukacyjny kantent. U «Budźmy» jość histaryčnaje šou z Kaciarynaj Vadanosavaj, pieradača «Sarmat» pra šlachieckuju kulturu, aryhinalnyja biełaruskamoŭnyja recepty, prajekt «Chruś i papałam» pra stereatypy vakoł našaj nacyi i šmat dziciačaha kantentu. Na kanale bahata archiŭnych rolikaŭ.

Kupałaŭcy

Byłyja akciory Kupałaŭskaha teatra ŭžo daŭno majuć svoj jutub-kanał, praź jaki praciahvajuć rabić našu kulturu kryšačku lepšaj. Hałoŭnaje tut — śpiektakli, ale taksama na kanale jość aŭdyjokniha pa znakamitym «Radziva «Prudok», animacyja «Teatr K. u horadzie M.», «1984» u ahučcy ad kupałaŭcaŭ, asabistyja «Dziońniki emihracyi» i šmat čaho jašče.

ETOT PRUS

Małady žurnalist Ivan Prus i jaho kaleha Hleb Siamionaŭ robiać svajo šou «o(b)suždajem» — i heta kantent, jakoha nam dakładna nie chapała. Abajalnyja chłopcy znachodziać pazityŭ u biełaruskaj miedyjaśfiery, žartujuć ź sielebryci łukašenkaŭskaj raźliŭki i vyšukvajuć nievierahodnyja kryndžovyja historyi, za jakimi chavajecca sumnaja biełaruskaja rečaisnaść.

RUDABIELSKAJA PAKAZUCHA

Niezvyčajny kanał, jaki časam padkidaje cikavyja pierlinki. Błohiery Andrej i Volha Pavuk zvoniać biełaruskim čynoŭnikam i inšym prychilnikam režymu — da prykładu, u ich byli hutarki z Alaksandram Saładucham i siostrami Hruździevymi. A taksama tut vychodziać pieśni satyryčnaha dueta «Krasnaja zieleń», jaki składajecca z Marharyty Laŭčuk i Andreja Pavuka.

Hodna

Pierš za ŭsio, tut vychodzić moŭnaje šou «Trušanka» — u im błohierka Liza Vietrava vučyć havaryć pa-biełarusku navat na aryhinalnyja temy. Taksama na «Hodna» vychodzić pieradača ź Mikitam Bialevičam pra biełaruskuju muzyku. A ŭ 2023-m Liza i Mikita padarožničali pa źviazanych ź Biełaruśsiu miaścinach u Jeŭropie — znajšłosia miesca rolikam pra Vilniu i Šaŭlaj, Varšavu, Padlašša, Hdańsk i nie tolki.

BIEŁSAT HISTORY

Telekanał «Biełsat» robić bahata cikavaha videakantentu. Ale adznačym mienavita jaho histaryčnuju častku. Ciapier na kanale historyk Cimoch Akudovič viadzie pieradaču «Vusy Skaryny» — tut i pra masonaŭ, i pra pieršaha prezidenta Havajeŭ z Mahilova, i pra Barbaru Radzivił. Bolš ambicyjnaja pieradača na kanale — Intermarium, dzie historyki ŭ studyi abmiarkoŭvajuć «baškiryzacyju» Biełarusi, Armiju Krajovu i toje, ci paŭtaraje Biełaruś los Vienhryi.

Ministerstva siepultury

Žurnalist i piśmieńnik Alaksandr Čarnucha maje svoj kanał pra biełaruskuju muzyku, i hety prajekt dakładna pašyryć vašy haryzonty. Jon znachodzić siły skłaści dyskahrafiju siaścior Hruździevych, raskazvaje pra zahadki hurta «Drazdy», ale pry hetym raduje biełaruskaj Bjork i znajomić z bahami biełaruskaha mietała. I ŭsio heta — z tonkim humaram, jaki sam pa sabie zadavalnieńnie.

Ovoŝievoz

Vielizarny kanał na 228 tysiač padpisantaŭ pryśviečany muzycy i viktarynam pa joj. U hości da prajekta prychodziać i viadomyja biełarusy — naprykład, tam byvali salistki hurtoŭ NAVIBAND i VAL. 

Noč s Čałym

Apošnija miesiacy analityk Siarhiej Čały sprabuje siabie ŭ žanry late-night show, jakoha ŭ biełaruskim jutubie, zdajecca, dahetul nie było. Jon raskazvaje pra apošnija naviny, sustrakajecca ŭ studyi ź viadomymi biełarusami i, jak zaŭsiody, prezientuje bahata razvahaŭ. Fienomien dakładna varty abmierkavańnia.

ČASIKI TIKAJUT

Nievialiki (3,5 tysiačy padpisantaŭ) prajekt časam raduje vialikimi hutarkami: tut pra toje, ci biełarusy — hamafoby, chto praciahnie daŭžej — Pucin abo Łukašenka i jak varta stavicca da vybaraŭ-2024 u Biełarusi. Usiu hetuju aktualščynu abmiarkoŭvajuć žurnalistka Jaŭhienija Suhak i analityki Ryhor Astapienia i Arciom Šrajbman.

Mnie tožie nie nravitsia

Jašče adzin prajekt ad Jaŭhienii Suhak. Śpis udzielnikaŭ nieabmiežavany: u hości da šou prychodzili eks-aktrysa Kupałaŭskaha Kryścina Drobyš, žurnalist «Radyjo Svaboda» Vital Cyhankoŭ, paet Pavieł Horbač, eks-dypłamat Pavieł Śluńkin i bahata inšych surazmoŭcaŭ. A hutarać tut, naprykład, pra toje, kali narešcie padzie režym ci ŭ čym pryčyna kanfliktaŭ u biełaruskaj apazicyi.

panstandup

Achova kamiedyi Baćkaŭščyny! Hety kanał stvaryli maładyja biełaruskija komiki, i na im jany vykładajuć ułasny stendap na rodnaj movie. Pakul prajekt na paŭzie, ale tam užo jość 43 videa — chopić nie na adzin viečar u łampavaj atmaśfiery. Da taho ž, jość nadzieja, što chłopcy adnoviać kanał.

Žienŝiny tiažiełoho poviedienija

Kaciaryna Rajeckaja, Nastaśsia Karasiova i Maryna Mientusava zładzili šou, dzie sprabujuć hutaryć pra važnaje dla žančyn. Niekatoryja z apošnich temaŭ — žyćcio karalevaŭ pryhažości, finansavaja piśmiennaść i chatni hvałt. U hości prychodzili, naprykład, aktyvistki Stasia Hlinik i Nadzieja Siadun, rasijskaja fieministka Zalina Maršankułava i jurystka Hanna Ryvina.

CHADANOVIČ | CHADANOVIČ

Paet i pierakładčyk Andrej Chadanovič znajomić sa śvietam biełaruskaj litaratury.

«Raspaviadaju pra litaraturu, jakaja stała aktualnaj u našy časy, pra litaraturu, u jakoj my z vami ciapier žyviom», — tłumačyć jon u apisańni kanała.

Tut jość i pra Baradulina ź Mickieviča, i pra biełaruskaje fentezi, i pra tvor «Bieły špic».

Obyčnoje utro

Mahčyma, samaja emacyjnaja biełaruskaja pieradača ŭ infarmacyjnym žanry. Kožny budny ranak u 10 lehiendarnyja viadučyja Kanstancin Kavieryn i Ludmiła Miłasłaŭskaja vychodziać u efir, kab pahutaryć z haściami, abmierkavać nadzionnyja prablemy i dazvolić sabie troški vypuścić paru — žadańnie, jakoje zrazumieje kožny ź biełarusaŭ.

«Około Kultury» s Nikitoj Moničiem

Biełaruski kanał pra toje, jak atrymlivać zadavalnieńnie ad kulturnych praduktaŭ i razumieć kulturu. Viadomy hid Mikita Monič, jaki raniej pracavaŭ u Nacyjanalnym mastackim muziei, a ciapier žyvie ŭ Madrydzie, lohka i dastupna tłumačyć, u čym hienijalnaść Sucina, jak vajna ŭ minułym stahodździ źmianiła mastactva, i raskazvaje pra biełaruskija muziei, ad jakich zachopić duch.

A što hladzicie vy?

«Što havorać, toje i rablu». Vebkam-madeli — pra zarobki, fietyšystaŭ i Słavu Kamisaranku

Jak ciapier žyvie bajanist Vital Varanko, jaki ŭ 2020 hodzie nazyvaŭ Łukašenku supierhierojem?

«ČynČyny ŭ mundzirach». Zapuścili antyvajenny satyryčny sieryjał

Клас
45
Панылы сорам
2
Ха-ха
2
Ого
0
Сумна
3
Абуральна
3

Chočaš padzialicca važnaj infarmacyjaj ananimna i kanfidencyjna?