Ofis UKantakcie ŭ Minsku VK office in Minsk Ofis VKontaktie v Minskie

Ofis UKantakcie ŭ Minsku. Fota: vk.com 

Rasśledavańnie adnosna UKantakcie praviali žurnalisty vydańnia The Bell. Jany źviartajuć uvahu na toje, što dva hady nazad UKantakcie źmianiła akcyjanieraŭ i kiraŭnictva. Zamiest miljardera Ališera Usmanava ŭładalnikami płatformy stali siabar Pucina Juryj Kavalčuk i «Hazprom-miedyja», a hiendyrektaram — syn namieśnika kiraŭnika Administracyi prezidenta Rasii Siarhieja Kiryjenki Uładzimir.

Na toj čas u adroźnieńnie ad modnaj sacsietki časoŭ Paŭła Durava płatforma mahła pachvalicca tolki kolkaściu karystalnikaŭ, a voś pa ŭciahnutaści i časie, jaki pravodziŭsia ŭ sietcy (time spent) jana značna prajhravała zachodnim kankurentam.

Z prychodam novych uładalnikaŭ i hiendyrektara źmieny nie prymusili siabie doŭha čakać. Hałoŭnaj zadačaj stała pazbavicca ad niaprofilnych aktyvaŭ i kansalidavać usio, što pryciahvaje naviedvalnika z metaj pabudovy tak zvanaha «Pieršaha kanału ŭ ličbie».

Uładzimir Kiryjenka pazbaviŭsia ad samych stratnych aktyvaŭ UKantakcie, a servis dastaŭki Delivery Club byŭ abmienieny na miedyjnyja aktyvy Jandeksa — «Novosti» i «Dzen», a taksama servis yandex.ru.

Palityčnaja rekłama

Za palityčny kantent na płatformie adkazvaje śpiecyjalnaje padraździaleńnie, jakoje z 2017 hoda i da niadaŭniaha času ŭznačalvaŭ Ściapan Kavalčuk — unuk rodnaha brata Juryja Kavalčuka. Struktura naličvaje kala sotni čałaviek i, pa słovach žurnalistaŭ, uzajemadziejničaje z Administracyjaj prezidenta i Instytutam raźvićcia internetu, praź jakoje idzie ščodraje finansavańnie patryjatyčnaha kantentu ŭ sacyjalnych sietkach.

Jak raspaviała adna z krynic vydańnia, piać hadoŭ tamu kalakramloŭskija struktury pačali vykuplać papularnyja pabliki va ŭładalnikaŭ na dobrych umovach. Pry hetym sami hrupy ŭ adminaŭ nie zabirali, a prasili vieści ich dalej — tamu što razumieli, što rabić heta sami nie zmohuć. Ale kupla dazvalała stavić adzin-dva nieabchodnyja dopisy na dzień.

Dla prasoŭvańnia dopisaŭ z hetych staronak byli navat stvoranyja śpiecyjalnyja instrumienty. Naprykład, jany stavilisia zamiest rekłamnych błokaŭ tolki biez paznaki «rekłama». A videa prasoŭvali za košt taho, što roliki stavili na aŭtaprajhravańnie ŭ stužku ŭ śpiecyjalnaje akienca. Usio heta, jak śćviardžajuć śpiecyjalisty, dazvalała atrymlivać nieabchodnuju ličbu prahladaŭ.

Adnačasova z pracaj u supolnaściach kamanda Kavalčuka adkazvała za kropkavuju padtrymku prykładna 20 najbujniejšych rasijskich ŚMI. Ich kantent pačaŭ intehravacca ŭ stužku rekamiendacyj, a redakcyjam pačali vydavać «kupony na rekłamu», kab jany mahli biaspłatna prasoŭvać svaje materyjały ŭ sacsietkach.

Pry hetym palityčnaja rekłama ŭ sacsietkach UKantakcie aficyjna zabaroniena. Prasoŭvać dopisy z ahitacyjaj možna tolki ad zarehistravanych CVK kandydataŭ i tolki ŭ pieradvybarčy pieryjad. Ale pa fakcie, jak paćvierdzili vydańniu niekalki surazmoŭcaŭ, hetyja abmiežavańni nie pracujuć.

U vyniku dla palityčnaj rekłamy ŭ kampanii źjaviłasia asobnaja kamanda maderataraŭ. A čynoŭniki z dapamohaj rekłamnych instrumientaŭ UKantakcie atrymali mahčymaść samastojna tarhietavać svoj kantent.

Jak śćviardžajecca ŭ materyjale, sacsietki UKantakcie i «Adnakłaśniki» buduć hałoŭnymi ahitatarami prezidenckaj pieradvybarnaj kampanii, bo dajuć mahčymaść pracavać z elektaralnymi hrupami i dabivacca nieabchodnych damoŭlenaściej ź lidarami hramadskich mierkavańniaŭ.

Za pracu z aŭdytoryjaj budzie adkazvać usierasijski centr kampietencyj u śfiery interniet-kamunikacyj «Dyjałoh». Jaho supracoŭniki buduć vyvučać pabliki ŭ sacsietkach i prapanoŭvać napramki pracy z elektaralnymi hrupami.

Klikać na vybary buduć i praz asabistyja staronki čynoŭnikaŭ, ministerstvaŭ i ŭstanovaŭ. Jak śćviardžajecca, supracoŭniki «Dyjałohu» majuć paroli da ich staronak i ŭ vypadku nieabchodnaści robiać masavuju rassyłku patrebnaha materyjału.

Prasoŭvańnie dziaržaŭnaha paradku dnia viadziecca praz 146 tysiač akaŭntaŭ z sacsietki UKantakcie, jakija pa danych na červień 2023 hoda byli padklučany da sistemy «Dyjałoh» i mieli 118 miljonaŭ padpisčykaŭ.

Jak adznačajuć krynicy vydańnia, u płanach «Dyjałohu» uklučeńnie pieradvybarčaj kantekstnaj rekłamy ŭ piersanalnuju stužku karystalnika UKantakcie. Što dazvolić, pa słovach adnaho z palittechnołahaŭ, «pchać rekłamu vybaraŭ pamiž paravarkami».

Fabryka trolaŭ, šou i sieryjały

Jak śćviardžajuć žurnalisty, sotni miljonaŭ rasijskich rubloŭ na vytvorčaści prapahandysckaha kantentu dla UKantakcie asvojvaje kampanija «Da-Cim Pradakšn». Z pačatkam vajny jana istotna pašyryła svoj štat, nabraŭšy redaktaraŭ telehram-kanałaŭ, administrataraŭ supołak, kapirajtaraŭ, veb-raspracoŭščykaŭ, smm-ščykaŭ, biznes-kansultantaŭ, psichołahaŭ, jurystaŭ, sacyjołahaŭ. Kampanija stvaryła svoj daśledčy centr dla manitorynhu sacsietak.

Adna z krynic vydańnia śćviardžaje, što «Da-Cim» źbirajecca pierad prezidenckaj kampanijaj stvaryć svaju «fabryku trolaŭ», jakaja budzie pracavać u supołkach UKantakcie, a taksama zojmiecca stvareńniem «patryjatyčnych pablikaŭ» i supołak «dla raspalvańnia varožaści ŭ inšych krainach».

Akramia hetaha, ź niadaŭniaha času płatforma stała bolš uvahi nadavać stvareńnia tak zvanaha «doŭhaha kantentu» — šou i sieryjałaŭ.

Ściapan Kavalčuk u vieraśni ŭznačaliŭ sacsietku UKantakcie i svaim asnoŭnym prajektam abraŭ płatformu «VK Videa». Ź jaje jon choča zrabić «zabojcu YouTube». Dla dasiahnieńnia mety robicca staŭka na błohieraŭ, zorak i ekskluziŭny kantent.

Dla hetaha hod nazad płatforma vykupiła kantrolny pakiet kampanii bujnoha vytvorcy zabaŭlalnaha kantentu Medium Quality Production. Jaho kamiedyjnyja šou «Što było dalej?», «Unutry Łapienka», «Vialikaje šou» i «Žanočy farmat» sumarna nabirali na YouTube dziasiatki miljonaŭ prahladaŭ.

U adroźnieńnie ad YouTube, «VK Videa» nie maje žorstkaha kantrolu kantentu. Tam pracuje tolki adno strohaje praviła — nie čapać palityku. Tym, chto supracoŭničaje z hetaj rasijskaj płatformaj, harantujuć trafik u niekalki sotniaŭ tysiač prahladaŭ.

Voś z prahladami jakraz i robiacca dziŭnyja rečy. Jak raspavioŭ žurnalistam adzin z błohieraŭ, z pačatkam supracoŭnictva z «VK Videa» jaho roliki ŭ siarednim nabirajuć 300-500 tysiač prahladaŭ. Prablema ŭ tym, što kolkaść reakcyj — łajkaŭ i kamientaroŭ — zusim nie adpaviadaje takomu trafiku. Takoje ŭražańnie, što hledačy — nie sapraŭdnyja.

Jak raspavioŭ adzin z subiasiednikaŭ vydańnia, hałoŭnaja prablema «VK Videa» ŭ tym, što na im šmat ručnoha ŭmiašańnia, tam niama ni narmalnaj sistemy rekamiendacyj, ni prazrystaj manietyzacyi.

Niahledziačy na niedachopy, servis demanstruje dobryja pakazčyki. Pa vynikach 2023 hoda, mabilny dadatak «VK Videa» ŭstalavali 2,6 miljonaŭ razoŭ, a miesiačnaja aŭdytoryja servisu skłała 68 miljonaŭ karystalnikaŭ. U toj čas jak miesiačnaja aŭdytoryja YouTube u Rasii ŭ listapadzie była 95 miljonaŭ.

Adzinaja kantent-płatforma

Choć pieramieny i adbylisia, adznačajuć aŭtary materyjału, UKantakcie nie zmahła ich manietyzavać. Pa vynikach 2022 hoda płatforma była siarod dziesiaci samych stratnych kampanij krainy apiaredziŭšy Maskoŭski mietrapaliten i «Poštu Rasii». Pieršaje paŭhodździe 2023 hoda kampanija taksama skončyła z stratami.

Jak śćviardžajuć supracoŭniki, ź niadaŭniaha času UKantakcie pačała ekanomić, spyniła vypłaty hadavych bonusaŭ, zapavoliła pryjom novych supracoŭnikaŭ.

Pry hetym na paradku dnia UKantakcie staić stvareńnie jašče adnaho maštabnaha prajektu — Adzinaj kantent-płatformy. Miarkujecca, što karystalniki atrymajuć mahčymaść adzinaj kropki ŭvachodu adrazu ŭ try pradukty — UKantakcie, «Adnakłaśniki» i «Dzen». Ale razumieńnia, jak heta budzie realizavana, pakul niama.

Mnohim u kampanii sama ideja takoha abjadnańnia zdajecca niemahčymaj navat čysta technična, bo pradukty vielmi roznyja technałahična.

Tamu pakul usia kancepcyja adzinaj kantent-płatformy — «ściah», jaki vielmi padabajecca «vialikim dziadziečkam» z Administracyi prezidenta Rasii.

Čytajcie jašče:

«Ukantakcie» adkryła ofis u Minsku

Jak zaścierahčy siabie ŭ VK, Facebook i «Adnakłaśnikach» — padrabiazny hajd

«Rumołaŭcy» vykupili minski pablik UKantakcie: abśmiejvajuć zabituju nastaŭnicu sa Stoŭbcaŭ, pijarać Pucina i zaklikajuć zabić Cimu Biełaruskich

Клас
1
Панылы сорам
6
Ха-ха
13
Ого
0
Сумна
2
Абуральна
8

Chočaš padzialicca važnaj infarmacyjaj ananimna i kanfidencyjna?