«Pra 50 hadzin možna tolki maryć». Kałaps na miežach Biełarusi, miesca ŭ čarzie pradajuć za 250 jeŭra
Čarha na miažy Polščy i Biełarusi raściahnułasia na mnohija kiłamietry, ludzi stajać sutkami. Na litoŭskaj miažy situacyja nie lepšaja. Ludzi na niervach, skandalać, sprabujuć nie puskać «ulezunoŭ». Što adbyvajecca na miažy 24 śniežnia 2023 hoda, pahladzieŭ «Pieršy pinski».
«Rychtujemsia da žyćcia na miažy»
U prymiežnych čatach ludzi aktyŭna abmiarkoŭvajuć, što zaraz adbyvajecca na ŭjeździe ŭ Biełaruś. Na svaim dośviedzie niekatoryja rajać nie płanavać pierasiakać miažu ES-RB u bližejšyja dni.
«Pakul navat ciažka skazać, jakija dni buduć nie «najbližejšyja». Moža, 1 studzienia…» — napisaŭ adzin z tych, chto staić u čarzie.
«Rychtujemsia da žyćcia na miažy», — napisaŭ inšy karystalnik.
Adzin z padarožnikaŭ pytaŭsia, ci chopić 50 hadzin prajści miažu. Jamu adkazali ranicaj 24 śniežnia:
«Staju ŭžo 60 hadzin. Da šłahbauma jašče mietraŭ 250-300. Heta jašče +sutki. Tak što ab 50 hadzinach možna tolki maryć. Ustaŭ pazaŭčora ŭviečary».
Stajać prychodzicca doŭha, uvieś čas treba hreć aŭtamabil, kab nie źmierznuć. Niekatoryja navat pieražyvajuć, ci chopić u ich paliva.
A cieraź Litvu machnuć?
Jaŭhien pacikaviŭsia: «Moža na Litvu kruh zrabić?»
Jaŭhienu adkazaŭ čałaviek z čarhi na litoŭskaj miažy. Padobna, tamaka ničym nie lepš: «Ja staju na Pryvałki, chutka šłahbaum, zaniało kala 50-52 hadziny. Ci varta piercisia ŭ Litvu?»
Pavał napisaŭ u 10:00: «Varta było raniej, zaraz užo nie. Ja ŭ čaćvier uviečary vyjechaŭ z Varšavy na Łavaryškies, tam sutki da miažy pravioŭ u čarzie (jašče pašancavała). I dniom u subotu byŭ u Minsku».
Jašče adzin z kamientataraŭ u čacie padzialiŭsia mierkavańniem ab litoŭskim punkcie propusku: «Pryvałka — hibłaje miesca. Tamaka ŭ zvyčajny dzień vielmi pavolna ŭsio, a ciapier naohuł, musić, viečnaść stajać treba».
«Takoha piekła ja nie bačyła»
Iryna ŭ 3:10 nočy napisała ŭ prymiežnym čacie svaje ŭražańni: «Siońnia pryjechali dadomu, stajali na miažy amal troje sutak… Takoha piekła ja nie bačyła. U prybiralniu nie schadzić, nadvorje žachlivaje, vyrubała za rulom. Pa vyniku vyśvietliłasia, što kala šłahbauma jość stajanka, i tam samyja chitryja i pradumanyja ludzi zajazdžajuć u čarhu, milicyja byccam haniała, ale ja viedaju z dakładnych krynic, nachabnym čynam lezuć. Ale naša kałona jechała, budzili adzin adnaho, vyhaniali aŭto, jakija pryładžvalisia, navat byli bojki. Nazapaściesia ciarpieńniem, ježaj, i dapamahajcie adzin adnamu. Žadaju ŭsim dobraha nastroju i najchutčejšaha złučeńnia z rodnymi i blizkimi ludźmi».
U čarzie dachodzić da skandałaŭ — stomlenyja ludzi na niervach. Pierad polskim punktam propusku vadzicieli časam navat sihnalać.
Prablemu paharšajuć ludzi, jakija sprabujuć uklińvacca ŭ čarhu. Unačy niekatoryja mužčyny z čarhi navat vychodzili i pierakryvali darohu, razvaročvajučy takich nachabnych. Da ich navat pryjazdžała palicyja, ale pretenzij za pierakryćcio darohi nie pradjaŭlała.
Kamientatar ź nikam Śviatoša: «Stajańnie adbyvajecca nie z-za taho, što vas nie puskajuć naŭmysna. Za noč stajali byvała 3-4 hadziny, ale potym byli mocnyja zruchi. Prosta na kole dziažurać dźvie mašyny vartavych, jany razvaročvajuć usich razumnikaŭ. A razumniki jeduć da zapraŭki i tam sprabujuć uciskacca, z-za hetaha čarha staić».
«Kuplu čarhu»
Niekatoryja palaki pradajuć čarhu. Piša Michaś: «Pierada mnoj staić čałaviek na niamieckich numarach, kaža, ŭčora da jaho padjechaŭ palak na mašynie, prapanoŭvaŭ za 250 jeŭra da koła dajechać. Kaža, žaba zadušyła zapłacić hetyja hrošy».
U čacie čas ad času možna ŭbačyć abjavu: «Kuplu čarhu za 100 dołaraŭ».
Praŭda, zaraz kažuć, što na takija sumy «navat lanota adkazvać». Niekatoryja havorać, što košt za miesca ŭ čarzie moža dasiahać i 500 jeŭra. Praŭda nieviadoma, ci płaciŭ niechta stolki.
U čym pryčyna?
Mnohija z padarožnikaŭ na aŭtamabilach vinavaciać u takim harmidary na miažy aŭtobusy. Ich zaraz z Polščy jedzie realna šmat. Pryčym, abjazdžajučy aŭtamabilnuju čarhu.
Alina ŭ 10.30: «U nakirunku RP-RB za šłahbaumam staić 39 aŭtobusaŭ. I na moście imi ŭsio zabita».
Alaksiej: «Na pašpartny i mytny kantrol adnaho aŭtobusa patrabujecca ad 40 chvilin da pary hadzin. A jany za hadzinu pa piać štuk pryjazdžajuć. I zapuskajuć ich na miažu nie hledziačy na situacyju. Tak što «ŭlezuny» i tranzit — nie pryčyna hetaha kałapsu».
Alaksiej napisaŭ a 9-j hadzinie ranicy: «U čarhu ŭstaŭ u čaćvier 21 śniežnia ŭ 18:30. Tolki zaraz prajšoŭ polskuju miažu. I zaraz realna baču, dzie asnoŭnaja pryčyna dzikaj čarhi: šmat aŭtobusaŭ, jakija zabili ŭsiu niejtrałku. Mašynam prosta niama jak prajechać».
A jak ź Biełarusi ŭ Polšču?
Napisała Alaksandra: «24 śniežnia ŭ 1:00 zajechali ŭ zonu čakańnia, u 7:20 zajechali ŭ Polšču. Na ŭsiu miažu 6.20».
Alina ŭ 10.13: «Niekalki chvilin tamu vyjechali na aŭtobusie ŭ napramku RB-RP. Prachodžańnie miažy zaniało 8.30 hadzin».
Bondarava abrynułasia na muziej Janki Kupały i mastaka Sušu23
Kamientary