Škuryn, Sabalenka i skandały. Što adbyvałasia ŭ sporcie ŭ 2023-m

Novaja płanka ŭ spravach dahavarniakoŭ

Skandały z damoŭnymi matčami — nie redkaść dla biełaruskaha sportu, ale sioleta jany vyjšli na novy ŭzrovień. Usio tamu, što ŭ dahavarniakach abvinavacili adnaho z topaŭ biełaruskaha futboła.

11 maja 2023 hoda Biełaruskaja fiederacyja futboła prysudziła trom biełaruskim kłubam pakarańni za arhanizacyju i ŭdzieł u damoŭnych hulniach padčas čempijanatu krainy. Arhanizataram takich matčaŭ pryznali kiraŭnictva salihorskaha «Šachciora», na toj čas dziejnaha čempijona Biełarusi, a va ŭdziele abvinavacili jašče dva kłuby — «Enierhietyk-BDU» i «Biełšynu».

Pakarańni atrymalisia suvoryja: dziasiatki dyskvalifikavanych hulcoŭ i supracoŭnikaŭ kłubaŭ, štrafy ŭ tysiačy bazavych vieličyń, pazbaŭleńnie ačkoŭ u siezonach 2022, 2023 i navat 2024 hadoŭ. Daviałosia pierakroić vyniki čempijanatu-2022: «Šachcior» pazbavili čempijonstva, «Enierhietyk-BDU» — srebra, a kamandam na nižejšych pazicyjach razdali pucioŭki ŭ jeŭrakubki. 

Prymusovaja strata ačkoŭ adrazu adkinuła kłuby na dno turnirnaj tablicy da zony vyletu, ale «Šachcior» i «Enierhietyk-BDU» zdoleli adyhracca i zastacca ŭ vyšejšaj lizie. U adroźnieńnie ad «Biełšyny» — babrujski kłub u nastupnym hodzie hulaje ŭ druhim dyvizijonie.

Sabalenka — pieršaja rakietka śvietu

Samaja topavaja biełaruskaja tenisistka Aryna Sabalenka nie raz admaŭlałasia vykazvać svajo staŭleńnie da vajny Rasii va Ukrainie, niahledziačy na chejt u adkaz z boku ŭkrainskich tenisistak, jakija nieadnojčy admaŭlalisia joj cisnuć ruki paśla matčaŭ. Ale ŭ pačatku červienia Aryna abviaściła: «Ja nie padtrymlivaju vajnu, to-bok nie padtrymlivaju Łukašenku jakraz ciapier», nibyta pakinuła sabie maleńkuju prastoru dla kroku nazad. Paśla hetaha tenisistka znoŭ uklučyła režym palityčnaha maŭčańnia.

Dziakujučy vyletu polki Ihi Śviontak z turniru US Open, u vieraśni Aryna stała pieršaj rakietkaj śvietu. Ale nienadoŭha — praz dva miesiacy Sabalenka prajhrała ŭ vočnaj sustrečy ź Ihaj, i Śviontak viarnułasia na viaršyniu.

Pravał u jeŭrakubkach

Z-za historyi z damoŭnymi matčami doŭha było niezrazumieła, jakim budzie biełaruskaje pradstaŭnictva ŭ futbolnych jeŭrakubkach. U vyniku BATE trapiŭ u kvalifikacyju Lihi čempijonaŭ, a «Nioman» i minskaje «Dynama» — u kvalifikacyju Lihi kanfierencyj.

Atrymałasia zbolšaha biassłaŭna. BATE z ŁČ dalacieŭ da kvalifikacyi Lihi kanfierencyj — jeŭrakubka na dva ŭzroŭni nižej, a potym vylecieŭ i ź jaje. «Nioman» adoleŭ kamandu «Vaduc» ź Lichtenštejna, ale paśla treciaha raŭnda adboru ŭsio roŭna pajechaŭ dachaty — dziakuj chacia b za zaroblenyja kłubam 850 tysiač jeŭra. Što da «Dynama», budučy čempijon-2023 vylecieŭ z kvalifikacyi Lihi kanfierencyj užo paśla pieršaha raŭnda.

«Dynama» — čempijon?

Darečy, pra čempijonstva «Dynama» — bieła-błakitnyja aformili jaho daterminova ŭ kancy listapada. Padzieja pradkazalnaja, i voś čamu. 

Jašče vosieńniu 2021-ha, kali adkryvali stadyjon «Dynama-Juni», Alaksandr Łukašenka skazaŭ futbalistam kłuba: «U budučym hodzie vy pavinny być čempijonami». Ale ž pa vynikach 2022-ha dynamaŭcy stali tolki čaćviortymi, za što ministr sportu Siarhiej Kavalčuk atrymaŭ ad Łukašenki nahaniaj. Tady ŭ spartovych kołach pajšli razmovy, što chacia b u 2023-m «Dynama» pavinna vykanać zahad.

«Šachcior» i «Enierhietyk-BDU», jakija ŭ 2022-m abyšli «Dynama», sioleta stracili ački z-za skandału z damoŭnymi matčami. Skład BATE, jašče adnaho kankurenta bieła-błakitnych, mocna patrapali palityčnyja čornyja śpisy, taksama kłubu nie padpisali płan raźvićcia, jaki b dazvoliŭ atrymlivać hrošy ad dziaržpradpryjemstvaŭ — dy i treba pryznać, što sam BATE sioleta pakazaŭ siabie nie lepšym čynam. Inšyja kłuby vyšejšaj lihi taksama adčuli na sabie dyskryminacyju, i ŭ vyniku šlach «Dynama» da čempijonstva byŭ adkryty — Kavalčuk musiŭ być zadavoleny. 

Sioletni futbolny siezon admietny jašče i najhoršym vynikam BATE za ŭsiu sučasnuju historyju kłuba. Voś tut my raśpisvali, čamu heta zdaryłasia i jak BATE, niekali biezumoŭny lidar i honar biełaruskaha futboła, apynuŭsia pa-za miedalami čempijanatu krainy.

Biełarusaŭ dapuścili da Alimpijady. Ale jość niuansy

Nabližajecca Alimpijada-2024 u Paryžy, i ceły hod było niezrazumieła, ci zmohuć tudy trapić rasijskija i biełaruskija atlety — nahadajem pra spartovyja sankcyi z-za vajny. Tolki ŭ śniežni MAK vynies rašeńnie: spartsmieny z rasijskim ci biełaruskim pašpartam nasamreč zmohuć pryjechać u Paryž, ale tolki ŭ statusie niejtralnych atletaŭ.

Na Hulniach budzie zabaronienaja lubaja simvolika, jakaja asacyjujecca z Rasijaj ci Biełaruśsiu, forma musić mieć niejtralnyja kolery. Taksama na Alimpijadu nie puściać aficyjnyja delehacyi Rasii i Biełarusi, spartsmienaŭ, afilijavanych z rasijskimi ci biełaruskimi siłavymi strukturami, i tych, chto byŭ zaŭvažany ŭ padtrymcy rasijskaj ahresii va Ukrainie.

Pakul niezrazumieła, jak heta ŭsio budzie realizoŭvacca na praktycy. Naprykład, što ličyć za padtrymku rasijskaj ahresii? Taksama biełaruskija spartsmieny časta padpisvajuć farmalnyja kantrakty ź siłavymi strukturami — naprykład, heta datyčyć barčychi Vanesy Kaładzinskaj, jakaja ŭžo maje alimpijskuju licenziju. Što budzie ŭ takim vypadku?

Pavodle zajavaŭ MAK, licenzii na ŭdzieł u Hulniach zavajavali piać biełarusaŭ. Viadoma, što, akramia Kaładzinskaj, u hetym śpisie jość płyŭčycha Nastaśsia Škurdaj, hreka-rymski barec Abubakar Asłachanaŭ i pradstaŭnik akademičnaha viesłavańnia Jaŭhien Załaty.

Alimpijada pačniecca 26 lipienia — pahladzim, chto ź biełarusaŭ u hety dzień akažacca ŭ Paryžy.

Pośpiechi Škuryna i salidarnaść

Jak majucca spartsmieny, jakija vyjechali z krainy praz svaju hramadzianskuju pazicyju?

Hałoŭnaja radaść tut — Illa Škuryn. Vyhladaje, što były forvard «Enierhietyka-BDU» znajšoŭ siabie ŭ hałoŭnym polskim dyvizijonie — Ekstrakłasie. Jon vystupaje za kłub «Stal» ź Mielca — ciapier jany na 12-m miescy z 18-ci, ale Škurynu status kamandy nie pieraškadžaje zabivać i prajaŭlać siabie. Z pačatku siezona jon zabiŭ užo vosiem razoŭ, i ŭ listapadzie byŭ pryznany najlepšym hulcom usioj Ekstrakłasy! Aficyjny sajt lihi pisaŭ tady ŭ tłumačeńni hetaha vybaru: «U sukupnaści, kali hety hulec traplaje ŭ sietku, jaho kamanda nie prajhraje».

I sioleta biełaruskamu sportu była nie čužaja salidarnaść. Šachmatyst Uładzisłaŭ Kavaloŭ u 2020-m vystupiŭ suprać hvałtu, tamu na siońnia nie moža karystacca padtrymkaj biełaruskaj dziaržavy, kali jedzie na mižnarodnyja turniry. Na čempijanat śvietu pa rapidzie i blicy, jaki adbyvajecca va Uźbiekistanie z 25 pa 30 śniežnia, Kavaloŭ jedzie ad mižnarodnaj fiederacyi šachmat i musić pakryvać vydatki samastojna. Ale biełarusy dapamahli i ŭsiaho za sutki sabrali 1600 dalaraŭ, nieabchodnyja Uładzisłavu na padrychtoŭku, raźmiaščeńnie i arhanizacyjnyja pytańni padčas turniru.

Škuryn — daloka nie adziny biełaruski spartsmien, jakomu znajšłosia miesca za miažoj. Zhadajem Vitala Raka, kiraŭnika kłuba adzinaborstvaŭ «Vołat», jaki za hady pracy ŭ Biełarusi padrychtavaŭ bahata pieramožcaŭ mižnarodnych turniraŭ. U pačatku 2022-ha biełaruskija ŭłady zakryli «Vołat», ale sioleta Vital adradziŭ kłub u Polščy. Trenier, jakoha vyhnała dziaržava, ciapier pracuje ź biełarusami Varšavy — i, pa jaho słovach, hurtuje ich, kab «jany narešcie stali haspadarami svajoj ziamli».

Čytajcie taksama:

Najlepšy futbalist Biełarusi — viciabčuk z afrykanskimi karaniami. Chto taki Maks Ebonh?

Biełaruskamu futbalistu płacili pa $5 tysiač na miesiac, ale nie vypuskali na pole — absurdnaja palityčnaja historyja

Viedajecie, chto abhaniaje «Barsiełonu» ŭ čempijanacie Ispanii? Zaštatny kłub z dvuma ŭkraincami ŭ składzie

• 4
• 0
• 1
• 0
• 0
• 3
• 1
• 0