U ankachvoraha palitviaźnia prahresuje chvaroba, turemnaja chimijaterapija nie dapamahaje
Palitźniavoleny maładziečaniec Pavieł Kučynski maje pieršuju hrupu invalidnaści — u jaho limfoma Chodžkina čaćviortaj stadyi. Niahledziačy na ankazachvorvańnie, jaho ŭtrymlivajuć u źniavoleńni amal dva hady. U červieni minułaha hoda jaho asudzili da piaci hadoŭ kałonii, a pa vynikach apielacyi źmienšyli prysud tolki na try miesiacy. Pra jahony ciapierašni biazradasny stan daviedałasia «Viasna».
Pavieł — katalicki viernik, skončyŭ fakultet radyjotechniki i nanatechnałohij BDUIRa, pracavaŭ na «Intehrale» ŭ Minsku.
Dyjahnaz palitviaźniu pastavili ŭ sakaviku 2021 hoda, ale prykmiety chvaroby źjavilisia jašče vosieńniu 2020-ha. Daktary dyjahnastavali ŭ Paŭła limfomu Chodžkina čaćviortaj stadyi.
Paŭła zatrymali 26 studzienia 2022 hoda. Spačatku rodnym kazali, što jon zatrymany na troje sutak, a paśla vyśvietliłasia, što jaho buduć trymać pad vartaj da suda. Rodnyja jeździli ŭ Baraŭlany za papierami, što jamu nieabchodna lačeńnie, pastajannyja abśledavańni i jaho niamožna trymać u takich umovach, pisali ŭ prakuraturu i administracyju Łukašenki — ale ničoha nie dapamahło.
Svajakam udałosia damahčysia, kab Paŭła zvazili ŭ Baraŭlany na abśledavańni, pa vynikach jakoha stała viadoma, što stan zdaroŭja Paŭła pahoršyŭsia, pačaŭsia zapalenčy praces. Kali maci pryviezła vyniki abśledavańnia śledčaj z prośbaj akazać dapamohu, taja skazała, što jon nibyta nie skardzicca i što rodnyja «hetymi dziejańniami zatrymlivajuć praces».
U vyniku Paŭłu vystavili abvinavačvańnie pavodle piaci artykułaŭ Kryminalnaha kodeksa za kamientary ŭ internecie.
Praces nad im u zakrytym režymie raspačaŭsia 2 červienia 2022-ha ŭ sudzie Vilejskaha rajona. Sudździa Kanstancin Kaladaŭ asudziŭ Kučynskaha da piaci hadoŭ pazbaŭleńnia voli.
U lipieni 2022 hoda, padčas miedyka-reabilitacyjnaj ekśpiertnaj kamisii, Paŭłu pastavili pieršuju hrupu invalidnaści — datul u jaho była invalidnaść druhoj hrupy.
U Minskim abłasnym sudzie 2 vieraśnia była razhledžanaja apielacyjnaja skarha palitviaźnia, pa vynikach jakoj jamu ździekliva «skaracili» termin na try miesiacy — ź piaci hadoŭ źniavoleńnia da čatyroch hadoŭ i dzieviaci miesiacaŭ. Ale pry hetym dadali štraf u pamiery 120 bazavych vieličyniaŭ (3 840 rubloŭ).
Palitviaźnia musili nakiravać u papraŭčuju kałoniju va ŭmovach uzmocnienaha režymu, ale praz ankałahičnaje zachvorvańnie źmiaścili ŭ respublikanskuju lakarniu ŭ Kaladzičach.
Tam jaho ŭtrymlivajuć dla praviadzieńnia dyjahnostyki dla ankachvorych (PET/KT). U hetaj lakarni chvoryja znachodziacca nie ŭ pałatach, a ŭ zvyčajnych kamierach, jakija pierabudavali dla miedycynskich patreb.
Jak stała viadoma «Viaśnie», kursy chimijaterapii Paŭłu nie dapamahajuć i chvaroba prahresuje. Paśla abśledavańniaŭ kurs lačeńnia źmianiajuć, ale palitviaźniu nie stanovicca lepš.
Taksama ŭ jaho była kansultacyja z daktarami nakont pierasadki kaściavoha mozhu, ale praź źniavoleńnie i ŭmovy ŭtrymańnia zrabić heta niemahčyma.
Viadoma, što Pavieł praz kałoniju sprabavaŭ pieradać prašeńnie ab pamiłavańni na imia Łukašenki. Palitviaźnia navat pieraviali dziela hetaha ŭ kałoniju na niekalki dzion, ale ŭ vyniku, kali jaho ŭžo pieravozili ŭ lakarniu, chłopcu viarnuli papieru z prašeńniem nazad.
Padtrymajcie Paŭła listami i paštoŭkami:
ARB TA, 220030, h. Minsk, vuł. Vaładarskaha, 2, pałata № 7
Pavieł Andrejevič Kučynski
«Ja pryjechała ŭ 4:50 i była ŭ čarzie 77-ja». Jak ryełtarka nabyvała dla siabroŭki kvateru ŭ elitnym ŽK Minska9
Kamientary