Vajna44

«Mnie treba być z chłopcami». Dzianis Urbanovič paśla piaci ranieńniaŭ viarnuŭsia na front

Z4-hadovy Dzianis Urbanovič (jaho pazyŭny «Vaŭkałak») u bataljonie «Vołat» kamanduje šturmavoj hrupaj. Za čas vajny jon pieranios piać ranieńniaŭ. Apošniaje ŭ vieraśni. Dobraachvotnik kaža, što pryvyk da žyćcia na pieradavoj, ale treba navučycca bierahčysia. Ciapier jon rychtuje maładoje papaŭnieńnie da vykańnia bajavych zadač. 

Dzianis Urbanovič. Fota: asabisty albom Dzianisa Urbanoviča

«U mianie na ciele šeść dzirak»

Apošni raz Dzianisa Urbanoviča paraniła padčas šturmu rasijskich pazicyj kala siała Klaščejeŭka, što na poŭdzień ad Bachmuta.

Askiepak snarada trapiŭ jamu ŭ ruku. Bajcu ŭdałosia spynić kroŭ i zastacca ŭ bai. U špitali Dzianisu dyjahnastavali mocnuju kantuziju. U jaho była parvanaja barabannaja pieraponka pravaha vucha, a levaje było ahłušanaje.

Urbanovič kaža, što rana ruki zahaiłasia, choć časam dajmajuć boli.

Ad kantuzii ž całkam adnavicca nie mahčyma. Byvajuć pieryjady, kali balić hałava. Boli zastanucca na ŭsio žyćcio. Pavodle miedykaŭ, lepiej atrymać kulavoje ci askiepkavaje ranieńnie, čym kantuziju.

Levaje vucha nie čuje na 20 pracentaŭ, a pravaje ŭ paradku.

«Kožny, chto pabyvaŭ na froncie i byŭ paranieny, maje prablemy sa zdaroŭjem, — havoryć jon. — Kali budzie mahčymaść, to źjezdžu na abśledavańnie ci bolš hruntoŭna padlačusia, ale ciapier šmat vielmi adkaznych spraŭ na froncie».

Dzianis Urbanovič paśla piataha ranieńnia. Fota: archiŭ Dzianisa Urbanoviča

Dzianis adznačaje, što ŭ cełym adčuvaje siabie dobra i moža vykonvać bajavyja zadačy.

Vajskovaja kamisija dazvoliła viarnucca na słužbu. Tydzień tamu jon spraviŭsia z marš-kidkom na 25 kiłamietraŭ i moža prajści luby kiłamietraž z aŭtamatami i hranatamiotami.

Dzianis Urbanovič za čas vajny pieražyŭ piać ranieńniaŭ: adno kulavoje, dva askiepačnyja, kantuzija, adkrytaja čerapna-mazhavaja traŭma dy inšyja paškodžańni.

«U mianie na ciele šeść dzirak», — kaža lidar «Maładoha frontu». 

U mai, kali biełaruskija dobraachvotniki baranili Bachmut, na Dzianisa i jaho hrupu abrynulisia ścieny čatyrochpaviarchovaha doma. Evakuacyju paranienych prykryvaŭ Mirasłaŭ Łazoŭski i vyratavaŭ ich žyćci, ale sam zahinuŭ.

Boj u Bachmucie Urbanovič ličyć adnym z najciažejšych dla biełaruskich dobraachvotnikaŭ. U jaho na rukach zahinuŭ 24-hadovy paramiedyk-biełarus.

«U majoj hrupie zahinuła 4 čałavieki, — kaža jon. — Z Bachmutu vyjšli tolki troje».

Takija askiepki zabivajuć na froncie. Fota: archiŭ Dzianisa Urbanoviča

Pa jaho słovach, Bachmut staŭ miescam vyprabavańnia biełaruskich dobraachvotnikaŭ. Jon umacavaŭ ich i ciapier jany viedajuć canu žyćcia.

«Patreba ŭ adrenalinie»

Pa viartańni na słužbu Dzianis Urbanovič zajmajecca vyvučkaj maładoha papaŭnieńnia, jakoje, pa jaho słovach, pakul nie hatovaje vykonvać bajavyja zadačy.

Jon kaža, što kamandziraŭ i bajcoŭ z frantavym dośviedam nie chapaje.

«Niastača bajavoha dośviedu moža pryvieści da hibieli sałdat, tamu mnie treba być z chłopcami. Kali buduć daśviedčanyja kamandziry, zdolnyja vadzić ludziej u boj, to, mahčyma, ja zajmusia inšymi pytańniami. Kali ž nakanavana zahinuć, to niachaj tak i budzie», — havoryć Urbanovič.

Tak vyhladaŭ Bachmut u lipieni 2023 hoda. Fota: archiŭ Dzianisa Urbanoviča

Dzianis Urbanovič zaŭvažaje, što pryvyk da žyćcia na pieradavoj. Jamu padabajecca rychtavać šturmavyja apieracyi i vykonvać ich.

Na front jaho ciahnie i patreba ŭ adrenalinie. Jamu nie chapaje ryzyki.

Dzianis pryznajecca, što toje prajaviłasia na vajnie. Raniej u jaho žyćci nie było situacyj, kali jon moh u luby momant pamierci.

«Vajna vyjaŭlaje dobraje i kiepskaje. Na joj zjaŭlajecca adrenalinavaja zaležnaść», — zaŭvažaje dobraachvotnik.

Dzianis čytaŭ, što sałdaty Druhoj suśvietnaj vajny, jakija mocna ryzykavali, traplali ŭ takuju zaležnaść i nie mahli viarnucca da narmalnaha mirnaha žyćcia. Im byŭ patrebny adrenalin. Heta pryvodziła da taho, što jany ŭčyniali roznyja złačynstvy.

«Ciapier 2023 hod, i miedycyna navučyłasia, spadziajusia, ratavać ad takoj zaležnaści», — adznačaje Urbanovič.

Jon pierakanany, što adrenalin vyratavaŭ jamu žyćcio, kali jaho paraniła ŭ hrudzi. Tady jon pieršy raz mocna spałochaŭsia. Jamu było ciažka padniacca, z rotu išła kroŭ, a niepadalok lažaŭ paranieny rasijski sałdat, jaki kryčaŭ, kab jamu dapamahli.

Biełarus niepakoiŭsia, što jaho dabjuć rasijskija sałdaty, jakija pryjduć pa svajho sasłužyŭca. Strach i adrenalin zmusili jaho dziejničać, i jamu ŭdałosia niejak dapaŭźci da svaich. Aprytomnieŭ jon u špitali, nie razumiejučy, jak uratavaŭsia.

Dzianis Urbanovič — kamandzir šturmavoj hrupy. U jaje zadačy ŭvachodzić raźviedka, advajavańnie varožych pazicyj i ŭtrymańnie ich. Ciapier jon na Danbasie.

Urbanovič kaža, što suprać ich u pieršym ešałonie vystupajuć acalełyja reštki vahnieraŭcaŭ: zeki.

Niedaaceńvać ich nielha. Jany ŭmieła minirujuć pazicyi. Vajskovyja viedy byłyja źniavolenyja vynieśli z turmaŭ, a paśla padrychtoŭki ź ich vychodziać niakiepskija sałdaty.

Razam ź imi vajujuć mabilizavanyja z «DNR» i «ŁNR». Časam jany iduć na šturm, majučy ŭkrainskija pašparty.

«Ich vykarystoŭvać, jak miasa, — havoryć Dzianis. — Ich kidajuć u raźviedku bojem, kab vyśvietlić abstanoŭku, a zatym užo adpraŭlajuć u ataku elitu. Heta pieravažna desantniki. U hłybini rasijskaj abarony znachodziacca kadyraŭcy, jakija pilnujuć tam paradak».

Dzianis Urbanovič paśla ranieńnia. Fota: archiŭ Dzianisa Urbanoviča

Dzianis pryznajecca, što, niahledziačy na patrebu vajavać, nieabchodna navučycca bierahčysia. Biełarusy samaachviarna iduć u boj i hinuć, ale treba pamiatać ab vyzvaleńni Biełarusi.

«Treba vyžyć na hetaj vajnie i zachavać bajcoŭ z bajavym dośviedam, — padsumoŭvaje jon. — Pieršaje pytańnie — heta vyzvaleńnie Biełarusi, ale nie mienš istotna zastacca žyvymi dla hetaha. Pra toje kazaŭ i zahinuły Mirasłaŭ Łazoŭski, dziakujučy jakomu vyžyli jaho pabracimy».

Dzianis Urbanovič vajuje z sakavika 2022 hoda. Jon uznaharodžany miedalom «Za bajavyja zasłuhi» Hałoŭnaha ŭpraŭleńnia raźviedki Ministerstva abarony Ukrainy, a taksama miedalom «Za bajavyja zasłuhi» Rady BNR.

«Naša Niva» — bastyjon biełaruščyny

PADTRYMAĆ

Kamientary4

  • Bachmut.
    08.12.2023
    Nie chotitie publikovať kommientarij- nie publikujtie, no eto nie iźmienit słučivšiehosia.
    Bojcy v Bachmutie, vklučaja Myša, pohibli iz-za upriamstva i durosti Urbanoviča niepravilno vybravšieho poziciju i nastojavšieho na svojej hłuposti.
    A tiepieŕ on "hieroj".
  • Jeroma
    08.12.2023
    [Red. vydalena]
  • Symon
    11.12.2023
    Razam ź imi vajujuć mabilizavanyja z «DNR» i «ŁNR». Časam jany iduć na šturm, majučy ŭkrainskija pašparty.

    Ich vykarystoŭvać, jak miasa, — havoryć Dzianis. — Ich kidajuć u raźviedku bojem, kab vyśvietlić abstanoŭku, a zatym užo adpraŭlajuć u ataku elitu.


    Kali da biełarusaŭ nie dojdzie, što treba praz "nie mohu", "nie izučał", "bojuś ošibiťsia", "stieśniajuś" razmaŭlać prynamsi ŭ hramadskich miescach pa biełarusku, što treba hadavać dziaciej ŭ koły biełaruščyny - ichny los budzie adnolkavym ź losam harmatnaha miasa z "ŁDNR". Bo nijakaha inšaha staŭleńnia da tutejšych z boku vajaŭničych ŭschodnich kałanizataraŭ być nia moža.

Dar‘ja Łosik vyjšła na svabodu pa pamiłavańni12

Dar‘ja Łosik vyjšła na svabodu pa pamiłavańni

Usie naviny →
Usie naviny

Paŭła Łatušku vyklikali ŭ polskuju prakuraturu2

Rasijski vajskoviec, jakoha nibyta siońnia ŭzarvali ŭ Maskvie: Ja žyvy, siadžu na pracy

Śpievaka — pastajannaha ŭdzielnika aficyjnych kancertaŭ — buduć sudzić za pratesty1

Siaredni zarobak u červieni vyras na 50 rubloŭ, ale nakolki jon adlustroŭvaje realnuju situacyju?

Dzikavicki: Kamanda «Biełsata» amal nie maje nijakaha ŭpłyvu na situacyju3

Stryžak tłumačyć, čamu suprać pieramovaŭ z łukašenkaŭcami i jakaja jaho prapanova1

Stali viadomyja padrabiaznaści sustrečy Dudy i Si Czińpina nakont režymu Łukašenki

Na tarhach u Minsku dalar z salidnym zapasam ruchnuŭ da hadavoha minimimu1

«Padrychtoŭka da Alimpijady prajšła nie tak, jak płanavała». Cimanoŭskaja raskazała, ź jakim nastrojem jedzie ŭ Paryž6

bolš čytanych navin
bolš łajkanych navin

Dar‘ja Łosik vyjšła na svabodu pa pamiłavańni12

Dar‘ja Łosik vyjšła na svabodu pa pamiłavańni

Hałoŭnaje
Usie naviny →