«Treba ŭsio vyrašać mirnym šlacham». Valfovič asabista ahledzieŭ čarhu z fur na miažy
Zachad, stvarajučy ź Biełarusi krainu-ahresara, sprabuje zadušyć Biełaruś, a ŭsio treba vyrašać mirnym šlacham. Hetyja zajavy zrabiŭ dziaržaŭny sakratar Rady biaśpieki Alaksandr Valfovič padčas sustrečy z bresckimi pahraničnikami, pieradaje BIEŁTA.
Alaksandr Valfovič na sustrečy raskazaŭ ab «pahrozach, jakija farmirujucca vakoł Biełarusi».
«Vojny siońnia zusim inšaha charaktaru. Jany majuć hibrydny efiekt: palityčnyja, infarmacyjnyja miery, ekanamičnyja sankcyi. Biełaruś sprabujuć zadušyć. Ź Biełarusi robiać krainu-ahresara, stvarajuć kałaps na miažy», — patłumačyŭ Valfovič.
Jak piša BIEŁTA, pa darozie ŭ Brest Valfovič «asabista acaniŭ maštab vialikaj kolkaści» fur na miažy.
Pavodle źviestak Dziaržaŭnaha pamiežnaha kamiteta, ciapier ujezdu ŭ Jeŭrasajuz praz polski pahranpierachod «Kukuryki» (sumiežny «Kazłovičy») čakajuć bolš jak 1240 hruzavikoŭ.
Valfovič źviarnuŭ uvahu na toje, što «z-za dziejańniaŭ polskaha boku jeŭrapiejskija kampanii niasuć straty, pieravozčyki adčuvajuć niazručnaści».
«Biełaruski bok sprabuje narmalizavać abstanoŭku, stvaryć elemientarnyja ŭmovy dla ludziej. Susiednija «demakraty» ab hetym nie dumajuć», — skazaŭ Valfovič.
«Treba ŭsio vyrašać mirnym šlacham, — dadaŭ jon. — Treba šukać punkty sudakranańnia, znachodzić šlachi, rašeńni, kab ludzi žyli ŭ miry i dobrasusiedstvie. Heta samaje hałoŭnaje».
Pamiežnyja pierachody na miažy z Polščaj i Litvoju byli zakryty hetymi krainami praź mihracyjny kryzis i saŭdzieł Biełarusi ŭ rasijskaj ahresii. Taksama heta byŭ adkaz Polščy na 8-hadovy prysud žurnalistu Andreju Pačobutu. Jaho vyzvaleńnie Polšča nazyvaje ŭmovaju adkryćcia pamiežnaha pierachoda.
Na hetym tydni Alaksandr Łukašenka niečakana palacieŭ u Piekin. Stratu Biełaruśsiu raniejšych tranzitnych mahčymaściaŭ ekśpierty nazyvajuć pryčynaj niezadavolenaści Piekina.
Za kamientary i ŭdzieł u pratestach zatrymali brata palitviaźnia. Jon niadaŭna viarnuŭsia z Polščy2
Kamientary