My nazirajem, jak u Rasii z ŁHBT robiać taki ž strach, jaki nacysty rabili ź jaŭrejaŭ. Što heta aznačaje dla biełarusaŭ
U Rasii siońnia pryznali ekstremisckim «mižnarodny ŁHBT-ruch». Choć nijakaha «mižnarodnaha ŁHBT-ruchu» nie isnuje. Hetaja situacyja vyjaŭlaje palityčnyja zadačy i taktyku pucinskaj Rasii na hety momant.
Nacysty zmahalisia «z suśvietnaj jaŭrejskaj zmovaj» (jakoj nie isnavała) i za «rasavuju čyściniu» (jakaja i niemahčymaja, i ničoha nie značyć), kab davieści hramadstva da isteryi, dziakujučy jakoj jany spadziavalisia i ŭmacavać svoj kantrol nad ludźmi, i źniščyć lubych, navat patencyjnych, apanientaŭ dy lubyja procivahi svajmu režymu, i ažyćciavić svaje impieryjalistyčnyja płany, płany pieradziełu Jeŭropy i śvietu na svaju karyść. Pucinskaja Rasija vybrała ŭ jakaści anałahičnaha župieła dla raspalvańnia strachu i varožaści lohkaha voraha, adnosna jakoha taksama isnuje šmat zababonaŭ, a ŭ niekatorych ludziej i traŭmy — ŁHBT. I zmahajecca ź jaho «suśvietnym rucham» (jakoha nie isnuje) i za «seksualnuju čyściniu».
«Bi žydoŭ, ratuj Rasiju», — kryčali čarnasociency sto hadoŭ tamu (i chaleru ŭratavali).
«Bi zmaharoŭ, ratuj Rasiju», «Bi pidaraŭ, ratuj Rasiju»,— kryčać ciapierašnija biesnavatyja i klikušy.
Dla čaho vam ratavać Rasiju, kali vy nie rasiejcy, a biełarusy?
Śpiral raspalvańnia nianaviści da hiejaŭ i leśbijanak pryviadzie da ich masavaha vyjezdu z Rasii. Što ž, krainy, jakija ich prymuć, uzbahaciacca intelektualna i ekanamična, taksama jak uzbahačalisia krainy, što prymali hnanych judejaŭ u XX stahodździ.
Łukašenka pieratvaryŭ Biełaruś u satelita Rasii — takimi byli Italija Musalini, Słavaččyna Cisa, Rumynija Antaniesku ci Vienhryja Chorci pry Hitleru. Jany imknulisia łaviravać, ale mieli mała prastory dla manieŭru.
Jany imknulisia adstojvać niejkija intaresy svajoj krainy ci chutčej jaje kiraŭnictva — ale nie ŭsio i nie zaŭsiody mahli. Nie ŭsie ź ich irvalisia vajavać na baku Hiermanii — ale nie zaŭsiody mahli adkrucicca i abmiežavacca pastaŭkami syraviny i dazvołam raźmiaščać vojski i rezidentury na svajoj terytoryi. Nie ŭsie ź ich hareli žadańniem uvodzić antysiemickija zakony — ale ŭ niejki momant im nie pakidali vybaru.
Padobnaja łohika prasočvajecca i ŭ staŭleńni Łukašenki da ŁHBT (jak i da sproby pakareńnia Ukrainy).
Hiei dla jaho to «apošniaja miarzota», to «załatyja ludzi, daj boh usim pracavać jak jany». Bo jon ža razumieje ich «chaziajśćviennuju» kaštoŭnaść, jak admirał Chorci razumieŭ kaštoŭnaść jaŭrejaŭ dla ekanomiki Vienhryi. Ale dyskurs prapahandy nie pakidaje sumnievaŭ: kali Maskva zahadaje…
Ekanamična niepaśpiachovyja, palityčna niesvabodnyja, maralna dehradavanyja režymy Pucina i Łukašenki nie mohuć prapanavać čałavieku ani zamožnaści, ani svabody, ani hodnaści, ani duchoŭnaj vieličy. Tamu jany i prapanujuć hetamu čałavieku bajacca hiejaŭ, nienavidzieć hiejaŭ, pryciaśniać hiejaŭ, samaśćviardžacca za košt hiejaŭ — jak nacysty vučyli nienavidzieć jaŭrejaŭ, bajacca jaŭrejaŭ i šturchali jak svoj, tak i paniavolenyja narody, kab tyja pryciaśniali i bili jaŭrejaŭ, i davali dyrlevanhieram mahčymaść samaśćviardžacca i samaŭzvyšacca.
Heta tolki ŭzmacniaje našu maralnuju patrebu stavicca da ŁHBT jak da roŭnych. Jany častka našaha hramadstva, častka biełaruskaj nacyi, adny z nas.
Kamientary