Učora stała viadoma, što nakłali aryšt na majomaść pravaabaroncy i redaktara Aršanskaha niezaležnaha sajta Ihara Kaźmierčaka. Juryst tłumačyć, u jakich vypadkach mohuć aryštavać kvateru.
Jak raspavioŭ sam Ihar Kaźmiarčak, aryštavanaja majomaść — heta kvatera, dzie jon prapisany, u zvyčajnym žyłym domie na ŭskrajku Oršy. «Paŭtaraška» na Zachodniaj — tak havoryć aktyvist pra svajo žytło ŭ rodnym horadzie, na adras jakoha pryjšoŭ list pra aryšt ź Viciebskaj ahiencyi pa dziaržaŭnaj rehistracyi i ziamielnym kadastry.
Kaźmiarčak miarkuje, što padstavaj dla takoha rašeńnia stała kryminalnaja sprava za abrazu Łukašenki (č.1 art 368 Kryminalnaha kodeksu), raspačataja suprać jaho jašče ŭ 2022 hodzie. Nahodaj, na dumku aktyvista, mahli stać niekatoryja vyrazy ŭ videarolikach ź jahonym udziełam.
Tak ci inakš, ale pravaabaroncu, jaki pakinuŭ Biełaruś u 2021 hodzie, abviaścili ŭ miždziaržaŭny vyšuk, a jahonyja fotazdymki byli raźmieščany na stendach «Ich šukaje milicyja».
Aryštavanuju kvateru niemahčyma pradać abo padaryć, tam nielha kahości prapisać. Ale dla aryštu nieabchodnyja jurydyčnyja padstavy: prykładam, heta robicca dla zabieśpiačeńnia vypłaty štrafa ci nakładzienaha materyjalnaha spahnańnia. Abo dziela zachavanaści majomaści, jakaja padlahaje nastupnaj pieradačy spahnańniku ci realizacyi.
Kali razmova pra palityčnyja spravy, takaja łohika moža nie pracavać, ličyć juryst Narodnaha antykryzisnaha ŭpraŭleńnia Michaił Kiryluk:
«Palityčny pieraśled — heta nie łohika prava, a łohika vajny. U dadzienym vypadku nie varta šukać zakonnych padstavaŭ dla niezakonnych rašeńniaŭ. Prykładam, Paŭła Łatušku siłavyja struktury vinavaciać u tym, što ŭ žniŭni 2020 hoda jon nibyta zaklikaŭ da padpałaŭ i pahromaŭ, i ludzi, nibyta pačuŭšy jahonyja zakliki, nanieśli škodu dziaržaŭnaj majomaści na 4 miljony biełaruskich rubloŭ. Heta nie adpaviadaje rečaisnaści, ličbu niejkaha ŭronu nichto nie padličvaŭ, ale dom palityka — pad aryštam».
U pačatku vieraśnia 2022 hoda biełaruskija aficyjnyja ŭłady aryštavali kvateru Siarhieja i Śviatłany Cichanoŭskich, i prykładna tym samym časam pačali źjaŭlacca źviestki pra toje, što na zakanadaŭčym uzroŭni budzie zafiksavana mahčymaść kanfiskacyi majomaści ŭ asob, jakija zajmajucca antydziaržaŭnaj dziejnaściu. 16 studzienia 2023 hoda zakon «Ab kanfiskacyi majomaści» nabyŭ moc. Zhodna ź im, padstavaj dla kanfiskacyi majomaści moža stać učynieńnie «niedružalubnych dziejańniaŭ». Takoha paniatku niama ŭ biełaruskim zakanadaŭstvie, ale miechanizm dziejańnia vielmi prosty, tłumačyć Michaił Kiryluk:
«Pavodle hetaha zakona, dastatkova źviarnucca ŭ ekanamičny sud z aficyjnaj zajavaj pra toje, što niejki čałaviek nanios materyjalnuju škodu dziaržavie. Taksama padać pieralik abjektaŭ jahonaj ułasnaści i pakazać subjekt, jakomu hetuju ŭłasnaść naležyć pieradać. Nijakich kryminalnych spravaŭ u takim vypadku nie zavodzicca».
Aryšt kvatery Cichanoŭskich užo skončyŭsia kanfiskacyjaj. 26 lipienia jaje pradali z treciaj sproby na aŭkcyjonie «BiełJurZabieśpiačeńnia» za 203 tysiačy biełaruskich rubloŭ. Padobnyja vypadki jašče nie stali sistemaj, ale tryvožnaja tendencyja abmiežavańniaŭ, jakija nakładajucca na dziejańni z majomaściu palityčnych apanientaŭ režymu, užo vidavočnaja.
7 vieraśnia ŭstupiŭ u siłu ŭkaz Łukašenki, pavodle jakoha davieranaści biełarusaŭ, składzienyja za miažoju, stracili paŭnamoctvy ŭ ździełkach ź nieruchomaściu i aŭtamabilami. Usio heta, na dumku niezaležnych jurystaŭ, raźviazvaje ruki dziejnym uładam, kab pomścić palityčnym apanientam.
Kamientary