Hramadstva22

Junaja biełaruska atrymała pašpart zamiežnika ŭ Čechii na piać hod. Raniej jana addała svoj dron USU

U siaredzinie listapada češskija čynoŭniki ŭručyli pašpart zamiežnika maleńkaj biełaruscy. Dakumient terminam na piać hadoŭ atrymała Varvara Šylina — 13-hadovaja dziaŭčyna z haradka Zruč-nad-Sazavaj, što za 57 kiłamietraŭ ad Prahi. Voś što viadoma pra junuju biełarusku.

Fota: @Tsihanouskaya / x.com

Vara žyvie ŭ Čechii ŭžo siem hadoŭ, pierajechała tudy z maci. Jašče raniej, pierad vybarami-2015, u krainu pierabraŭsia jaje baćka Hieorhij Šylin. Dziaŭčynka vučycca ŭ škole i choča stać stamatołaham. 

Niekalki hadoŭ tamu Vara nabyła dron, kab ź jaho dapamohaj zdymać krajavidy horada, dzie žyvie. Častku hrošaj joj padaryli baćki, a častku jana naźbirała sama.

Biełaruska ź siamjoj žyvie ŭ Zručy-nad-Sazavaj — haradku, u jakim žyvie piać tysiač čałaviek, zasnavanym u XIV stahodździ. U horadzie jość svoj zamak, rekanstrujavany hadoŭ piatnaccać tamu, naziralnaja vieža i bahata kałarytnaj architektury.

Kali pačałasia vajna, dziaŭčynka z baćkam šmat abmiarkoŭvali padziei va Ukrainie i zachacieła niešta zrabić dla ŭkraincaŭ. Vyrašyła addać na karyść ukrainskaj armii dron. 

«Kali my źbiralisia jechać pieradavać dapamohu, jana paprasiła spakavać svoj dron. Pakolki heta jaje reč, my joj i słova nie skazali, tym bolš što sprava patrebnaja», — tłumačyć Hieorhij.

Dziaŭčynka zhadvaje, što razam z baćkam jana pryjechała ŭ Prahu. Tam jany sustrelisia z vałanciorami, jakija źbirali dapamohu dla Ukrainy, pieradali im dron, tataŭ binokl, bializnu i skrynku śnikiersaŭ. A taksama biełaruska namalavała Ivana «Bresta» Marčuka i napisała kranalny list.

«Vitaju! Mianie zavuć Vara. Ja adpraŭlaju vam svoj lubimy dron. Jon vam bolš patrebny. Chaču, kab vy ŭsie byli žyvyja. Kali łaska, kali prahonicie ŭsich fašystaŭ z Ukrainy, vyzvalicie potym i maju Biełaruś».

Fota: @kirillpartizan / x.com

Čamu dziaŭčynka paličyła važnym zhadać u liście i svaju Radzimu? Jana tłumačyć: «Biełaruś — maja kraina, jana dla mianie važnaja. Ja tam rasła niedzie da siami hadoŭ, ja lublu svaju krainu».

Fota z dronam i listom dziaŭčyny zapościŭ u siecivie Kirył Jakimovič — kiraŭnik Praga Support Team, vałanciorskaj inicyjatyvy, praź jakuju Vara pieradała dron. Tvit sa zdymkam atrymaŭ bolš za dziesiać tysiač łajkaŭ, i baćka dziaŭčynki Hieorhij pryznajecca, što takoha rezanansu jon z rodnymi i nie čakaŭ. Paźniej, kaža jon, šmat błohieraŭ prapanoŭvali vykupić Varyn dron nazad, ale sama dziaŭčynka admoviłasia i paprasiła achvotnych dapamahčy achviaravać hrošy na jaje nastupnuju inicyjatyvu. «Spadziajusia, jon čymści dapamoh», — tak dziaŭčyna kaža pra toj dron.

Viasnoj 2022-ha biełaruska razam z tatam arhanizavali zbor hrošaj na padraździaleńnie aeravyviedki, jakoje paźniej uvajšło ŭ skład pałka Kalinoŭskaha. Toj zbor «Bajsoła» sabraŭ bolš za 60 tysiač jeŭra: nie tolki na drony, ale i na dva džypy, štabnuju kamandnuju mašynu i dva kamplekty dla spadarožnikavaha internetu Starlink.

Taksama siamja davała prytułak ukrainskim uciekačam.

Vosieńniu 2023-ha Vara źbirałasia mianiać pašpart praź biełaruskaje pasolstva ŭ Čechii — jon u jaje zakančvajecca jakraz dniami. Dziaŭčynka akazałasia adnoj z tych biełarusaŭ, chto nie paśpieŭ atrymać pašpart — ciapier, jak viadoma, za miažoj ich nie vydajuć.

«My stajali ŭ čarzie [na zamienu pašparta] u pasolstva, adrazu paśla ŭkaza [№278 ab pašpartach] nam pazvanili adtul i skazali, što pašpart mianiać nie buduć. Praz paru dzion my pajechali ŭ češskuju mihracyjonku. Udakładniŭ niekatoryja pytańni ŭ biełaruskaj narodnaj ambasady, ale zbolšaha znajšoŭ patrebnuju infarmacyju na sajcie Ministerstva ŭnutranych spraŭ, i ŭ mihracyjoncy nam usio patłumačyli.

Adzinaje, daviałosia pisać ad ruki tłumačeńnie, čamu my nie možam pamianiać pašpart. Z dapamohaj narodnaj ambasady napisaŭ, što Vara źbirała na drony i chadziła na mitynhi, ja napisaŭ knihu, nadrukavali niekalki skrynoŭ z artykułami pra Varu. My čakali dva miesiacy zamiest adnaho — vidać, mihracyjonka vyrašała, što rabić. Ale potym nam pazvanili i skazali pryjazdžać», — tłumačyć Varyn tata.

Hieorhij udakładniaje, što pašpart inšaziemca vydajuć nie biaspłatna — praŭda, zbor za jaho nievialiki. Kab apłacić zbor za dakumient, treba kupić padatkovuju marku i padać jaje z usimi papierami. Dla darosłaha čałavieka pasłuha kaštuje 500 češskich kron, dla dziciaci — 100 (adpaviedna 20,5 i 4 jeŭra).

Pašparty inšaziemcaŭ vydavalisia Čechijaj i raniej, ale Vara adna ź pieršych, chto jaho atrymaŭ, paśla taho jak Łukašenka zabaraniŭ biełaruskim konsulstvam mianiać pašparty. Dziaŭčynka atrymała češski dakumient na 5 hadoŭ, da svajho paŭnalećcia. Pra pašparty zamiežnikaŭ u Čechii možna pračytać taksama tut.

«Naša Niva» — bastyjon biełaruščyny

PADTRYMAĆ

Kamientary2

  • Dysydent
    24.11.2023
    Dziaŭčynka małaja, našaja rodnaja, uciorła nos usim hetym skuhołam, kaho ŭvieś čas kudyści departujuć "ni za što". Nia treba nijakija pašpartnyja stały Cichanoŭskaj u Vilni ci Varšavie. Kupicie choć prosta dron jaki dla Ŭkrainy, arhanizujcie pikiet la dyktatarskaj ambasady - i budzie vam i pašana ŭ cyvilizavanym śviecie, i narmalnyja dakumenty.
  • Redaktaru
    24.11.2023
    Zruč-nad-SazavaJ :) Raka Sazava. Pa-česku nad Sazavou.

Zaleva ŭ Minsku, vierahodna, była najmacniejšaj za ŭsiu historyju nazirańniaŭ3

Zaleva ŭ Minsku, vierahodna, była najmacniejšaj za ŭsiu historyju nazirańniaŭ

Usie naviny →
Usie naviny

U Bajdena dyjahnastavali karanavirus1

788 ukrainskich vajskoŭcaŭ źnikli bieź viestak u bajach za siało Krynki Chiersonskaj vobłaści5

Ułady ZŠA abvinavacili nieanacysta z Hruzii ŭ padrychtoŭcy masavaha atručvańnia dziaciej u Ńju-Jorku5

Kruty vykazaŭ spačuvańni rodnym zahinułych padčas urahanu. Ale nie Łukašenka5

Vysokaintensiŭnyja fizičnyja nahruzki ŭ staraści palapšajuć pamiać

U Śviatłany Cichanoŭskaj mianiajecca daradca pa pravavych pytańniach24

Łatuška zaklikaŭ žurnalistaŭ i pravaabaroncaŭ ź Jeŭropy skarystacca ź biaźvizu8

Rabotnicy suda pahražaje da 12 hadoŭ za «zakliki da sankcyj i abrazu Łukašenki»4

Transpartnyja srodki ź biełaruskimi numarami nie zmohuć zajazdžać i ŭ Estoniju7

bolš čytanych navin
bolš łajkanych navin

Zaleva ŭ Minsku, vierahodna, była najmacniejšaj za ŭsiu historyju nazirańniaŭ3

Zaleva ŭ Minsku, vierahodna, była najmacniejšaj za ŭsiu historyju nazirańniaŭ

Hałoŭnaje
Usie naviny →