Siłaviki zapuścili novy bot, jaki pakazvaje, ci «ekstremiscki» toj ci inšy resurs. Voś čamu karystacca im niebiaśpiečna i biessensoŭna

Što robić hety bot?

Vy dasyłajecie ŭ jaho spasyłku na sajt abo telehram-kanał, a jon kaža, ci jość jon u śpisie ekstremisckich materyjałaŭ. «Viedaj status resursaŭ, jakija źbiraješsia naviedać», — kaža dopis u telehram-kanale siłavikoŭ.

Čym hety bot moža być niebiaśpiečny?

Pa-pieršaje, luby bot, jak my ŭžo pisali, moža źbirać ID i imiony karystalnikaŭ tych, chto ŭ jaho źviartajecca.

Paśla taho, jak vy pravierycie niejkuju hrupu, siłaviki mohuć zdeananimizavać i zatrymać vas, kab «pierapravieryć» — maŭlaŭ, kali cikavišsia, to ŭ niečym vinavaty.

Pa-druhoje, takim čynam siłaviki mohuć napaŭniać bazu patencyjna «ekstremisckich» resursaŭ, jakija jany pakul nie apracavali. Heta tolki dapamoža im u represijach, ale nie źbieraže vas — i voś čamu.

Pa-treciaje, za prahlad resursaŭ, pryznanych ekstremisckimi, nie karajuć, bo technična składana zrazumieć, ci naviedvaŭ ich čałaviek. Karajuć za padpisku i ŭzajemadziejańni — to-bok, łajki, reposty i kamientary.

Čamu pravierki resursu na «ekstremizm» nie dapamohuć?

Na siońnia biełaruskaje zakanadaŭstva nie daje abarony ad taho, kab vas aštrafavali za «raspaŭsiud ekstremisckich materyjałaŭ», navat kali resurs nie pryznany ekstremisckim.

U Kodeksie ab administracyjnych parušeńniach jość artykuł 19.11, pa jakim i štrafujuć za reposty niezaležnych miedyja. Častka pieršaja artykułu dazvalaje karać za materyjały, jakich u śpisie niama (jana praduhledžvaje adkaznaść za raspaŭsiud «infarmacyjnaj pradukcyi, jakaja źmiaščaje zakliki da ekstremisckaj dziejnaści abo prapahanduje takuju dziejnaść»), častka druhaja — za tyja, jakija tam jość.

Pa abiedźviuch častkach praduhledžany vialiki štraf i kanfiskacyja «pradmieta ździajśnieńnia pravaparušeńnia», u bolšaści vypadkaŭ — heta smartfony abo kampjutary.

Roźnica ŭ tym, što pa druhoj častcy možna atrymać jašče i aryšt.

Bolš za toje, pakul čałaviek za kratami na «sutkach», suprać jaho mohuć skłaści kryminalnuju spravu. Tak było z Nastaj Łojka, pravabarončy dakład jakoj, zrobleny ŭ 2018-m, pryznali srodkam raspalvańnia sacyjalnaj varožaści da siłavikoŭ. Padobna, toje samaje chočuć zrabić z baćkam Mikity Załatarova, Mikałajem Łapunovym — jon bieśpierapynna na «sutkach» užo dva z pałovaj miesiacy, ale hrupu «Homiel za Mikitu Załatarova» ŭžo pryznali «ekstremisckim farmavańniem», u jakim Łapunoŭ paznačany kiraŭnikom.

Takim čynam, va ŭmovach, kali zakony realna pracujuć tolki na karyść siłavikoŭ i śpiecsłužbaŭ, pravierka na «ekstremisckaść» maje niašmat sensu.

• 7
• 0
• 1
• 5
• 1
• 0
• 21
• 0