U Baranavičach asudzili žančynu, jakaja «abraziła» Łukašenku i abvinavaciła jaho ŭ zabojstvie
U sudzie Baranavickaha rajona i Baranavič vyniesieny prysud indyvidualnaj pradprymalnicy Volzie Kazłoŭskaj, abvinavačanaj u abrazie Alaksandra Łukašenki, spałučanaj z abvinavačańniem u asabliva ciažkim złačynstvie pavodle č. 2 art. 368 Kryminalnaha kodeksa, piša «Viasna».
Napačatku žančynie vystavili abvinavačańnie pa troch składach złačynstva:
- č. 1 art. 368 (abraza Łukašenki);
- č. 2 art. 368 (abraza Łukašenki, spałučanaja z abvinavačańniem u asabliva ciažkim złačynstvie);
- art. 369 (abraza pradstaŭnika ŭłady).
Pa materyjałach abvinavačańnia, paśla prahladu fotavyjavy, raźmieščanaj u publičnym dostupie ŭ «Adnakłaśnikach» z zamacavanym tekstam, dzie «ŭ nieprystojnaj formie byŭ źniavažany honar i hodnaść asoby Łukašenki i źmieščana abvinavačvańnie jaho ŭ ździajśnieńni asabliva ciažkaha złačynstva (zabojstva)», Kazłoŭskaja raźmiaściła fotavyjavu na svajoj staroncy ŭ hetaj ža sacyjalnaj sietcy, adkrytaj dla volnaha prahladu i kapijavańnia nieabmiežavanamu kołu čytačoŭ.
U sudzie Volha paviedamiła, što nakiravała list Alaksandru Łukašenku, u jakim pryniesła jamu svaje prabačeńni.
Sud, jaki adbyŭsia jašče 23 žniŭnia 2023 hoda, abvinavaciŭ žančynu tolki pa č. 2 art. 368 KK i pryznačyŭ žančynie pakarańnie ŭ vyhladzie pazbaŭleńnia voli na termin šeść miesiacaŭ z adbyvańniem pakarańnia ŭ papraŭčaj kałonii va ŭmovach ahulnaha režymu. Mabilny telefon, jak srodak ździajśnieńnia złačynstva, kanfiskavany ŭ dachod dziaržavy.
Spravu razhladała sudździa Ina Paŭłoŭskaja.
Kamientary