U Tut.by źjaviŭsia novy ŭładalnik? Chtości niadaŭna abnaviŭ stan damiena
Servis Whois pakazvaje, što chtości niadaŭna abnaviŭ stan damiena Tut.by, na jakim znachodziŭsia najbujniejšy partał Biełarusi, razhromleny ŭładami ŭ mai 2021 hoda. Apošnija abnaŭleńni zafiksavanyja 27 krasavika 2023 hoda, a sam damien padoŭžany da 19 maja 2024 hoda. Uładalnik schavaŭ infarmacyju pra siabie, takim pravam moža skarystacca fizičnaja asoba, piša Reform.by.
Damien Tut.by usio hetak ža zarehistravany praz TAA «Nadziejnyja prahramy». Adnak ciapier jon nie naležyć TAA «Tut baj miedyja».
Raniej infarmacyja vyhladała tak:
U web.archive.org možna vyjavić aktyŭnaść, źviazanuju z sajtam na damienie tut.by. Sajt praktyčna bieź pierapynkaŭ archivavaŭsia sa śniežnia 2000 hoda pa 18 maja 2021 hoda. Heta dzień, kali ŭłady zładzili pahrom u ofisie prajekta. Zatym nijakaj aktyŭnaści nie nazirałasia da 7 sakavika 2023 hoda.
U sakaviku 2023 hoda z 7 pa 15-ha novyja ŭładalniki sprabavali zapuścić sajt na sistemie kiravańnia kantentam «Bitryks», a zatym źjaviŭsia šabłon meblevaj kramy biez nazvy. Novy prajekt raźmiaščaŭsia ŭ data-centry «Biełtelekama».
U červieni 2021 hoda saŭładalnik kampanii «Tut baj miedyja», jakomu naležaŭ damien i tavarny znak, Kirył Vałošyn, jaki zastaŭsia na voli, kamientavaŭ čutki ab pieradačy damiena novym uładalnikam — nibyta tam budzie stvorana prapahandysckaje ŚMI na čale z Ramanam Pratasievičam.
«Na hety momant damiennaje imia, handlovy znak i prahramnaje zabieśpiačeńnie, naturalna, naležać kampanii. Svaju intelektualnuju ŭłasnaść TAA «Tut baj miedyja» nie źbirałasia i nie źbirajecca addavać; nijakich uhodaŭ u dačynieńni da hetaha być nie moža», — zajaviŭ tady jon.
18 žniŭnia 2021 hoda Tut.by unieśli ŭ respublikanski śpis ekstremisckich materyjałaŭ. U adpaviednaści z hetym, raspaŭsiud luboj pradukcyi partału, u tym liku łahatypu, ułady stali ličyć administracyjnym pravaparušeńniem. 14 červienia 2022 hoda rašeńniem ekanamičnaha suda Minska TAA «Tut baj miedyja» było pryznana ekstremisckaj arhanizacyjaj, a jaho dziejnaść na terytoryi Biełarusi zabaronienaja. Była zabaronienaja jaho simvolika i atrybutyka.
Reform.by źviarnuŭsia da dački, spadčyńnicy zasnavalnika partała Juryja Zisiera, jaki pamior u mai 2020 hoda, ale adkazu pakul nie atrymaŭ.
Tut.by byŭ razhromleny ŭładami 18 maja 2021 hoda, kali ŭ redakcyju ŭ Minsku, rehijanalnyja pradstaŭnictvy i dachaty da supracoŭnikaŭ pryjšli ź pieratrusami. Tady byli zatrymanyja 15 čałaviek. 17 sakavika 2023 hoda hałoŭny redaktar Tut.by Maryna Zołatava i hiendyrektar Ludmiła Čekina byli asudžanyja na 12 hadoŭ kałonii.
-
Jarmošyna: Ja nie mahu padtrymać kult asoby Stalina. Siamja majho baćki była raskułačanaja, pałova zahinuła
-
Taćciana Zareckaja bolš nie estonskaja startapierka. Ciapier jana sprabuje stać pasiarednicaj inviestaraŭ u Saudaŭskaj Aravii
-
Nazirać za vybarami ŭ Biełaruś pryjedzie šviejcarac, jakoha na radzimie sudzili za falsifikacyju vybaraŭ
Taćciana Zareckaja bolš nie estonskaja startapierka. Ciapier jana sprabuje stać pasiarednicaj inviestaraŭ u Saudaŭskaj Aravii13
Kamientary