U źniavoleńni Viktar Babaryka sustrakaje čaćviorty dzień narodzinaŭ.
9 listapada siamja palityka zvyčajna źbirałasia razam. Dzieci vinšavali baćku zranku, uručajučy padarunki, a ŭviečary siamja išła na viačeru ŭ miesca ź cikavaj i niezvyčajnaj kuchniaj. Tam šmat havaryli, zhadvajučy siamiejnyja historyi.
Dzień Babaryki pravodzili tak, kab jon byŭ admietnym, pamiatnym, poŭnym uražańniaŭ. Byvała, što jany vypraŭlalisia ŭ vandroŭku, kožny raz vybirajučy novaje miesca.
Pavodle blizkich da siamja Babaryki ludziej, jon bolš lubiŭ sam daryć padarunki, čym prymać ich.
Ciapier palityka ŭtrymlivajuć u pamiaškańni kamiernaha typu navapołackaj kałonii № 1 u izalacyi ad inšych źniavolenych.
Ivan Kraŭcoŭ, kaardynatar kamandy Viktara Babaryki, kaža, što ciapier zdaroŭje byłoha bankira ŭ paradku.
«Jakichści vypadkaŭ asablivych nie było paśla špitalizacyi viasnoj», — adznačaje paplečnik palityka.
Sioleta ŭ noč na 25 krasavika źniavoleny eks-pretendent u prezidenty byŭ špitalizavany ŭ balnicu Navapołacka. Paźniej ad pravaabaroncaŭ stała viadoma, što Babaryku pieraviali ŭ turemnuju balnicu pry SIZA-1 u Minsku.
U mai były palitźniavoleny Alaksandr Kabanaŭ, jaki siadzieŭ u navapołackaj kałonii, vykazvaŭ mierkavańnie, što palityka mahli mocna źbić u kałonii: u jaho mahło być prabitaje lohkaje i złamanyja rebry.
Pavodle Kabanava, turemščykam dadziena kamanda źvierchu «pa maksimumie pastrožyć režym utrymańnia takich znakavych fihur, pačać žorstka ź imi abychodzicca».
«Ułada nie choča, kab ludzi daviedvalisia, što adbyvajecca ŭ kałonijach, i voś na ich jana pakazvaje», — kazaŭ były palitviazień.
Alaksandr Kabanaŭ u «Toku» adznačaŭ, što bačyŭsia ź Viktaram Babarykam štodnia, ale pahavaryć ź im nie ŭdavałasia. Źniavolenym kamunikavańnie z eks-pretendentam u prezidenty stroha zabaraniajuć.
Pavodle Kabanava, Babaryku izalujuć maksimalna. Za sprobu pahavaryć ź im karajuć ŠIZA. Kryminalnikaŭ strašać pastanoŭkaj na prafulik. Supracoŭniki kałonii starajucca nie źviazvacca z Babarykam, bo «jašče prezidentam stanie».
«Jon kali idzie, to jak ledakoł — usie rasstupajucca. Supracoŭniki da jaho staviacca narmalna — niejtralna», — zhadvaŭ Kabanaŭ.
Viktar Babaryka spačatku pracavaŭ u kałonii apalščykam u piakarni. Zatym jamu dali pracu ŭkładčyka chlebabułačnych vyrabaŭ. Uvieś pracoŭny čas jon znachodziŭsia ŭ pamiaškańni bieź vientylacyi, z tempieraturaj plus 30 hradusaŭ.
Potym jaho adpravili vypalvać draŭniany vuhal. Poŭny pracoŭny dzień (9 hadzin) 6 dzion na tydzień palityk znachodzicca na vulicy biez dostupu da bytavoha pamiaškańnia, dzie možna było b sahrecca. Takaja praca ŭ kałonii ličycca adnoj z samych ciažkich.
Były palitviazień i niavolnik navapołackaj kałonii Valancin Łabačoŭ paćviardžaŭ, što Babaryka «pracuje na vuhali, uvieś čorny».
Pa słovach Łabačova, u čas, što jon byŭ u kałonii, Babaryka trymaŭsia badziora, ale da ludziej staviŭsia naściarožana, bo ŭ kałonii chapaje stukačoŭ.
Palityka pastavili na prafiłaktyčnym uliku jak «schilnaha da napadu na administracyju i zachopu zakładnikaŭ». Zdaryłasia heta paśla taho, jak jon nožykam pakinuŭ drapiny na padvakońni, kali rezaŭ sała.
«Heta ŭbačyli pazaštatnyja supracoŭniki administracyi, pabiehli ŭ štab i dakłali pra heta apieram [supracoŭnikam administracyi kałonii]. Na hetaj padstavie palitviaźniu paviesili taki prafulik», — raskazvaŭ adzin z byłych źniavolenych.
Palitviazień Stanisłaŭ Paŭlinkovič, jaki taksama siadzieŭ z Babarykam, kaža, što jon zachoŭvaŭ dobry nastroj, da ŭsich źviartaŭsia na «vy» i zaŭvažna schudnieŭ.
Paŭlinkovič kazaŭ, što na palityka kožny miesiac składali raparty za nadumanyja parušeńni i adpraŭlali ŭ ŠIZA. Babaryku časta vyklikaŭ ciapier užo były načalnik kałonii Andrej Palčyk, i paśla vizitaŭ Babaryku kidali ŭ štrafny izalatar.
Viadoma, što piśmovaj karespandencyi ad Viktara Babaryki niama ź lutaha. Advakat apošni raz ź im sustrakaŭsia ŭ sakaviku.
17 lipienia svajakoŭ palityka na pryjomie ŭ navapołackaj kałonii zapeŭnivali, što jaho zdaroŭju ničoha nie pahražaje, ale samoha niavolnika nie pakazali.
Majomaść Viktara Babaryki praciahvajuć raspradavać. Dniami z aŭkcyjonu zbyvali dźvie madeli hadzińnikaŭ palityka. Na kožny z aŭkcyjonaŭ zarehistravalisia pa čatyry ŭdzielniki. Ź pieršaj sproby pakupnikoŭ nie znajšłosia.
U hetym vieraśni pradali taksama siem naručnych chranomietraŭ Babaryki. U 2021 hodzie na aŭkcyjonie kupili jaho aryštavany aŭtamabil Ford Fiesta. Taksama vystaŭlali na tarhi aptyčny pryceł, jaki naležyć palityku, i doli ŭ statutnym kapitale troch kampanij — «Pryvatlizinh», «Pravavy dyjałoh» i «Sistemy apracoŭki infarmacyi».
Eks-staršynia Biełhazprambanka i miecenat Viktar Babaryka 12 maja 2020 hoda zajaviŭ pra ŭdzieł u prezidenckich vybarach. Jaho kamanda chutka sabrała 440 tysiač podpisaŭ. 18 červienia 2020 hoda Viktar Babaryka i jahony syn Eduard, jaki ŭznačalvaŭ pieradvybarčy štab, byli zatrymanyja, kali vieźli podpisy ŭ CVK.
Praz hod, 6 lipienia 2021 hoda, Viktara Babaryku asudzili na 14 hadoŭ kałonii pa spravie Biełhazprambanka. Na sudzie palityk pažartavaŭ, što za 9 miesiacaŭ staŭ, «napeŭna, mienš puzatym buržujem», i heta vyklikała śmiech u zale.
Jaho syn pravioŭ u SIZA biez suda try hady. 5 lipienia jaho adpravili ŭ kałoniju ŭzmocnienaha režymu na 8 hadoŭ.
«Naša Niva» — bastyjon biełaruščyny
PADTRYMAĆHladzicie taksama:
«Nastrojeny vyžyć». Źniavolenaja raskazała pra sustreču z synam Babaryki na Vaładarcy
Babaryku zabyvajuć — Karbalevič
Usich zatrymanych miedykaŭ u Navapołacku zvolnili pa artykule za prahuły — «Biełyja chałaty»
Pašpart Novaj Biełarusi pačnuć vydavać z 26 studzienia. Što viadoma i jak atrymać?76
Kamientary