«Jana redka źviartałasia da daktaroŭ». Što viadoma ab śmierci biełaruskaj dyzajnierki Hanny Kraśnier
43-hadovaja dyzajnierka pamierła ŭ Varšavie. U jaje zastałosia dvoje dziaciej. Tolki niadaŭna ŭ Hanny prajšoŭ vialiki modny pakaz.
Hanna Kraśnier naradziłasia niedaloka ad Pinska, u vioscy Pinkavičy. Paśla zakančeńnia škoły dziaŭčyna pastupiła ŭ technałahičny ŭniviersitet, dzie sustreła svajho budučaha muža. Para paznajomiłasia ŭ internacie. «Jany ŭdzielničali ŭ hulniach, chadzili ŭ pachody, treniravalisia ŭ fiechtavańni i vielmi šmat času bavili siarod siabroŭ. Z taho momantu prajšło bolš za 22 hady», — padzialiŭsia z «Našaj Nivaj» znajomy siamji.
U šlubie, jaki doŭžyŭsia bolš za 19 hadoŭ, naradzilisia dačka Maryja i syn Alaksandr.
Adpracavaŭšy raźmierkavańnie na mahiloŭskaj fabrycy «Viaśnianka», Kraśnier pierajechała ŭ Viciebsk. Mienavita ŭ hetym horadzie pačaŭsia jaje šlach u śviecie viasielnaj mody. Spačatku jana pracavała kanstruktaram, a paźniej vyrašyłasia na stvareńnie ŭłasnaj kalekcyi.
Niahledziačy na vysokuju kankurencyju, sprava pajšła ŭharu: sukienki, stvoranyja rukami Hanny, karystalisia vialikim popytam. Tak źjaviŭsia brend, dobra znajomy biełaruskim niaviestam — «Majsternia Hanny Kraśnier».
Dyzajnierka była ŭdzielnicaj Biełaruskaha tydnia mody. Naroŭni z pracami Viačasłava Zajcava i Valancina Judaškina, jaje sukienki ŭpryhožvali kalandar «Ruski siłuet». Dziaŭčyna ŭdzielničała ŭ mižnarodnych konkursach.
Za svaju karjeru Hanna Kraśnier apranuła bolš za 1300 niaviest. Siarod jaje klijentaŭ byli dziaŭčaty ź Biełarusi, Ispanii, Šviejcaryi, Izraila, Aŭstryi i mnohich inšych krain.
Ale ŭ lipieni 2021 hoda stała viadoma ab zakryćci prajekta. U tym ža hodzie siamja pierajechała ŭ Varšavu:
«Kali b mianie dva hady tamu spytali, dzie ja budu praz dva hady i što ja budu tam rabić, ja mahła b vykazać u zdahadku šmat čaho… Znachodžańnie ŭ lubym punkcie Jeŭropy, naprykład. U jakaści turysta, ale nie jak žycharki Varšavy. Inšyja byli płany, inšyja. Ciapier ža dapuskaju lubyja padziei, navat samyja nievierahodnyja», — pisała Hanna ŭ sacyjalnych sietkach.
U emihracyi žančyna atrymała novuju prafiesiju QA-inžyniera i navat paśpieła papracavać u IT, ale praz čas viarnułasia da dyzajnu.
«U mianie tak časta pytalisia, čamu ja bolš nie šyju sukienak, što paśla čarhovaha «čamu» ja vyrašyła, što tak, ja chaču pasprabavać. Ciapier ja šyju sukienki. Pakul nie šmat, pakul u jakaści chobi (vielmi prafiesijnaha chobi) paru zakazaŭ na miesiac», — raspaviadała Hanna ŭ svaim Facebook.
22 kastryčnika adbyŭsia pieršy vialiki pakaz Kraśnier u Varšavie: «Dziakuj vialiki ŭsim datyčnym! A dalej budzie jašče lepš i cikaviej», — dzialiłasia jana radaściu z padpisčykami. Na žal, płanam nie nakanavana było spraŭdzicca.
«U nas hora, pamierła Hanna. U jaje spyniłasia serca, była chutkaja, reanimacyja ŭ balnicy», — paviedamiŭ u sacsietkach muž dyzajnierki.
Viadoma, što ŭ Hanny nie było zafiksavanych prablem sa zdaroŭjem i jana redka źviartałasia da daktaroŭ. Časam u žančyny byŭ vysoki cisk, ale heta vyrašałasia biez zvarotu ŭ lakarniu.
Što pryviało da trahiedyi, pakul nie zrazumieła — siamja jašče čakaje zaklučeńnie ekśpiertaŭ. Pachavańnie Hanny projdzie ŭ Varšavie na pravasłaŭnych mohiłkach u rajonie Vola. Infarmacyja ab časie raźvitańnia budzie apublikavana paźniej.
«Prosta zalivaješsia ślaźmi i dumaješ: za što?» Iryna Ščasnaja i jaje čatyry balučyja hady za kratami4
Kamientary