Błohier Maksim Šabucki syšoŭ z Pałka Kalinoŭskaha: «Viarnusia abo ŭ inšaje padraździaleńnie, abo paśla reformy» 

Maksim Šabucki — błohier i były milicyjant, pačaŭ vieści svoj kanał uviesnu 2020 hoda. Jon raskazvaŭ, što žyŭ u padpolli da krasavika 2022-ha, a paśla zdoleŭ evakujavacca ź Biełarusi ŭ Polšču. Naprykancy 2022-ha Šabucki dałučyŭsia da Pałka Kalinoŭskaha i ŭziaŭ sabie pazyŭny «Chokinh».

U videa Šabucki raspaviadaje, što ŭžo napisaŭ rapart na zvalnieńnie i čakaje jaho jurydyčnaha afarmleńnia. Ciapier jon, miarkujučy pa ŭsim, płanuje pajechać u ES na lačeńnie i dla taho, kab zrabić novyja dakumienty.

Pa jahonych słovach, kali vajna praciahniecca, to jon chacieŭ by viarnucca va Ukrainu. Ale, pa słovach Šabuckaha, dla hetaha musić być vykananaja adna ź dźviuch umovaŭ: abo stvorycca novaje vialikaje padraździaleńnie, jakoje budzie mieć «najpierš biełaruski paradak dnia», abo ŭ Pałku Kalinoŭskaha adbuducca reformy.

Błohier kaža, što syšoŭ z bajavych pazicyjaŭ paśla trahiedyi, jakaja adbyłasia z bataljonam «Lićvin» u Čarnihaŭskaj vobłaści i niekalki bajcoŭ zahinuła. Paśla hetaha jon pracavaŭ u štabie Pałka.

Pa jahonych słovach, kali b nie było štaba PKK i ludziej u im, to struktury PKK mahło b uvohule nie być, bo ani ŭ kaho, akramia ich, nie atrymałasia stvaryć vialikaje biełaruskaje padraździaleńnie. Ale pakolki biełaruskija struktury biaruć na siabie vialikuju misiju pa vyzvaleńni Biełarusi ŭ budučyni, to i patrabavańni da ich vialikija, tamu jon ličyć patrebnym zapisać krytyčnaje videa.

Šabucki nazyvaje try pryčyny, pa jakich jon syšoŭ z PKK.

Pieršaja — prablemy ź lidarstvam, jak ich bačyć błohier. Pa jahonym mierkavańni, u PKK niama lidaraŭ, za jakimi hatovyja pajści ludzi, niama i vybaraŭ takich lidaraŭ. Heta nie dazvalaje Pałku raści.

Druhaja — niazhoda z kadravaj palitykaj pałka. Šabucki raspaviadaje pra niadaŭniaje zvalnieńnie kiraŭnika pres-słužby PKK (u miedyja pra heta nie pisali). «Jon čałaviek byŭ dobry i dobra raźbiraŭsia ŭ miedyjcy. Ja niazhodzien i z pryčynaj zvalnieńnia. Kali ty kiraŭnik, to navat kali jość asabisty kanflikt, treba ścisnuć zuby i šukać kampramis, a nie zvalniać ludziej», — kaža jon.

Treciaja — niazhoda z palitykaj štaba. Pamyłkaj jon ličyć, da prykładu, toje, što štab PKK nie naładziŭ pracu z bolšaściu apazicyjnych siłaŭ. Pa mierkavańni Šabuckaha, Biełaruś nikoli nie vyzvalić, kali biełarusy nie abjadnajucca.

Taksama jon niazhodny z tym, što štab PKK admoviŭsia brać hrošy ad fondaŭ i pravodzić marafon salidarnaści ź biełaruskimi vajarami. Pry hetym, u vajaroŭ na pieradavoj nie zapytalisia, choć im šmat čaho nie staje padčas bajoŭ i bajcy sami kuplajuć heta z ułasnych hrošaj.

Maksim Šabucki prapanuje try reformy dla Pałka. Pieršy krok — heta praviadzieńnie vybaraŭ kamandzira PKK, jaki budzie jahonym tvaram. Pa mierkavańni błohiera, kab nikoha nie abrazić, druhi kandydat musić stać namieśnikam kamandzira.

Druhaja reforma — heta stać bolš adkrytymi i najpierš dać razhornutuju finansavuju spravazdaču pa ŭsich achviaravańniach PKK i tym, jak jany vydatkavalisia. Jon ličyć, što heta viarnuła b davier da kiraŭnictva PKK.

Treciaja reforma — heta abjadnańnie z kabinietam Cichanoŭskaj. Pa mierkavańni błohiera, Cichanoŭskaja na siońnia lidar z najbolšaj palityčnaj subjektnaściu z usich, što byli ŭ demakratyčna nastrojenych biełarusaŭ za ŭvieś čas isnavańnia demakratyčnaha ruchu.

Takim čynam, mocny brend PKK i mocnaja subjektnaść Cichanoŭskaj mahli b dać sinierhiju, jakaja pajšła b na karyść biełaruskamu ruchu ŭ śviecie. 

U pres-słužbie Pałka Kalinoŭskaha «Našaj Nivie» raskazali, što jany ŭžo rychtujuć videa z adkazami na vostryja pytańni da kiraŭnictva. Jano źjavicca na aficyjnych staronkach Pałka.

• 126
• 0
• 13
• 22
• 12
• 10
• 9
• 0