Chto taki Siarhiej Sałoŭski — sudździa, što ŭviaźniŭ muzykaŭ z Tor Band 

Siarhiej Sałoŭski ŭ 2008-m skončyŭ jurydyčny fakultet Homielskaha dziaržaŭnaha ŭniviersiteta imia Franciška Skaryny. Vyvučaŭ jon tam kryminalnaje prava.

Spačatku Sałoŭski pracavaŭ u prakuratury. U 2010-m Sałoŭski zajmaŭ pasadu pamočnika prakurora Savieckaha rajona Homiela. Nieŭzabavie jaho pavysili. Praz dva hady Sałoŭski staŭ prakuroram adździeła pa nahladzie za zakonnaściu sudovych pastanovaŭ pa kryminalnych spravach prakuratury Homielskaj vobłaści.

A ŭ 2013-m z prakuroraŭ jaho pieravodziać u sudździ — pryčym z abłasnoha centra adpraŭlajuć u małuju i radyjacyjna zabrudžanuju Vietku. Tym nie mienš: być sudździoj ličycca vyhadniejšym i prestyžniejšym, čym prakuroram, jak patłumačyŭ «Našaj Nivie» były padpałkoŭnik milicyi Alaksandr Azaraŭ.

U stalicy staravieraŭ Sałoŭski ničym nie zapomniŭsia, akramia vyjezdaŭ na roznyja prafiłaktyčnyja mierapryjemstvy dla školnikaŭ.

Jahonaja «zorka» ŭzyšła ŭ 2020-m. Na toj momant Sałoŭski pracavaŭ užo ŭ sudzie Centralnaha rajona Homiela.

Ën byŭ adnym z tych sudździaŭ, jakija prysudžali sutki za patrabavańnie sumlennaha padliku hałasoŭ. Paśla 9 žniŭnia Sałoŭski pracavaŭ niastomna. Ën navat pryjazdžaŭ u IČU i sudziŭ ludziej asabista. Nikoha nie pamiłavaŭ.

Pavialičyć

Jon masava sudziŭ biełarusaŭ i ŭ nastupnyja miesiacy, i na listapad 2020-ha patrapiŭ u śpisy jak samy žorstki sudździa Homielščyny. Sałoŭski čaściej za ŭsio vynosiŭ aryšty ŭ jakaści pakarańniaŭ — na toj momant jon pa kolkaści vyniesienych sutak abhaniaŭ najbližejšaha «kankurenta» amal u try razy.

Nahadajem, što mienavita ŭ Homieli zdaryłasia druhaja paślavybarčaja trahiedyja 2020-ha. U izalatary časovaha ŭtrymańnia pamior 25-hadovy Alaksandr Vichor, jakoha źbili pry chapunie 9 žniŭnia.

Siarod hučnych spravaŭ, jakija vioŭ Sałoŭski — sprava homielskich pravaabaroncaŭ-«viasnoŭcaŭ» Leanida Sudalenki i Taćciany Łasicy, sprava Łarysy Kuźmienki, žančyny, chvoraj na kłaŭstrafobiju, jakaja ŭziała za ruku amapaŭca, a taksama sprava Siarhieja Vieraščahina, jakoha mocna źbili pry zatrymańni. Usim im jon prysudziŭ kałoniju.

Pravaabaronca Leanid Sudalenka raskazaŭ nam pra toje, jakija ŭražańni pakinuŭ Sałoŭski, jaki prysudziŭ jamu try hady źniavoleńnia.

«Mianie asudzili bieź viny, i Sałoŭski vydatna heta viedaŭ, ale ŭsio roŭna vynies abvinavaŭčy prysud, pryčym daŭ maksimalny z mahčymych terminaŭ u try hady kałonii. Choć u mianie byŭ małaletni syn na ŭtrymańni.

Usie maje chadajnictvy na sudzie jon ihnaravaŭ, biespadstaŭna zrabiŭ sud zakrytym. U sudzie mianie trymali ŭ kletcy, praz što ja nie moh navat vieści natatki. A častka «dokazaŭ», pakazanych na sudzie, byli zdabytyja ź jaŭnym parušeńniem zakona. Sałoŭski trymaŭsia fanaberysta, pastajanna padkreślivaŭ svaju važnaść».

Sudalenku zapomniłasia takaja detal.

«Ja arhanizoŭvaŭ pravaabarončy sieminar i zamoviŭ abied dla ŭdzielnikaŭ, — raskazvaje jon. — Jany dastali mieniu hetych abiedaŭ i prykłali da spravy jak dokaz złačynstva.

I Sałoŭski absmoktvaŭ hetaje mieniu: «oj, pahladzicie, kački pravaabaroncam zachaciełasia». Chacia ŭ mieniu nie było ničoha nadzvyčajnaha. Takim čynam jon prosta ździekavaŭsia. Ja siadzieŭ u kletcy ŭ kajdankach, a Sałoŭski niejkaje mieniu abmiarkoŭvaŭ, jakoje da spravy ŭvohule dačynieńnia nie maje.

Padčas prysudu ja skazaŭ jamu: «Mnie zrazumieła, što vy ŭžo damovilisia sa svaim sumleńniem, ale mnie niezrazumieła, jak vy damovilisia z zakonam». I ŭžo ŭ kałonii ja staŭ patrabavać dla jaho kryminalnaj adkaznaści.

Kali ŭ Biełaruś vierniecca zakonnaść, to ja budu damahacca dla jaho pakarańnia, bo jon zabraŭ u mianie ni za što try hady žyćcia», — kaža Leanid Sudalenka.

Ahułam ža na rachunku Sałoŭskaha kala 300 sutak aryštu, 9000 rubloŭ štrafaŭ i nie mienš za 50 hadoŭ źniavoleńnia pa palityčna matyvavanych kryminalnych spravach. Heta tolki toje, što publična viadoma na hety momant.

Akramia palityki, jon adznačyŭsia ŭdziełam u pakazalnym sudzie ŭ kancy 2022 hoda. Tady 21-hadovaha chłopca sudzili pry jahonych adnahodkach za toje, što jon nie źjaviŭsia na mierapryjemstvy pa pryzyvie. Admietna, što i tut jon vynies žorstki prysud — miesiac aryštu. Našmat čaściej, zhodna sa źviestkami, jakija sabrała «Miedyjazona», ludziam naznačajuć štraf, hramadskija pracy abo pakarańnie z adterminoŭkaj (to-bok, kali čałaviek niejki čas nie traplaje pad uvahu siłavikoŭ, termin zharaje).

Paśla takich starańniaŭ Sałoŭski pajšoŭ na pavyšeńnie. Na kaniec 2022-ha jon jašče byŭ sudździom rajonnaha suda. Ciapier, zhodna ź infarmacyjaj na sajcie Viarchoŭnaha suda, jon uvachodzić u kalehiju Homielskaha abłasnoha suda — tam i asudzili muzykaŭ.

Nahadajem, 31 kastryčnika staŭ viadomy prysud muzykam z hurta Tor Band. Siarhiej Sałoŭski prysudziŭ muzykam ad dzieviaci da siami z pałovaj hadoŭ kałonii. Jaŭhienu Burło, jaki maje surjoznyja prablemy sa zdaroŭjem, pierasoŭvajecca na mylicach i maje patrebu ŭ zamienie tazaściohnavaha sustava, Sałoŭski miłaserna dazvoliŭ nie ŭstavać padčas abviaščeńnia prysudu.

• 9
• 0
• 2
• 5
• 4
• 7
• 126
• 0