Stary most majuć całkam źnieści, na jaho miescy pabudujuć dva novyja — z dekaratyŭnymi lichtarami, padśvietkaj i stełaj z vyjavami słavutaściej horada.
Prajekt rekanstrukcyi, raspracavany aŭtarskim kalektyvam «Brestprajekta» (HAP Tamašeŭski, architektar Muryna, hienpłan — Chamianok, uparadkavańnie — Niakrasava i Virko), byŭ prezientavany na XXI Respublikanskim konkursie na najlepšy prajekt, pabudovu i publikacyju ŭ halinie architektury.
Na maštabnuju rekanstrukcyju mosta cieraz Muchaviec, jak paviedamlali ŭ Bresckim abłvykankamie, płanujecca vydatkavać kala 80 miljonaŭ rubloŭ.
Raboty płanavali pačać u hetym hodzie, ale ŭ žniŭni staršynia harvykankama Siarhiej Łabadzinski ŭdakładniŭ, što jany pačnucca tolki ŭ 2024 hodzie z boku Centralnaha plaža.
Ciapierašni most cieraz Muchaviec byŭ pabudavany ŭ 1963 hodzie, sioleta jamu spaŭniajecca 60 hadoŭ. Jahonaja daŭžynia składaje 142 m, a šyrynia — 13,5 m.
Dvuchpałosny most pierastaŭ zadavalniać patreby horada: za čas jaho słužby mocna vyraśli patoki transpartu, razraślisia mikrarajony i sioły Vulka, Kavaloŭka, Puhačoŭka, Vałynka, Arkadzija i Hieršony na paŭdniovym bierazie Muchaŭca.
Masty zastanucca piacipralotnymi, centralny pralot raściahniecca na 43,88 m, a bakavyja buduć mieć pa 33 i 24 m. Daŭžynia pavialičycca da 165,2 m, a ahulnaja šyrynia dvuch mastoŭ — da 31,86 m. Prajeznaja častka stanie čatyrochpałosnaj, taksama značna, da 4 m, pašyracca tratuary, pryznačanyja dla piešachodnaha i viełasipiednaha ruchu.
Haradskija ŭłady taksama abiacali, što ruch na čas rekanstrukcyi mosta budzie abmiežavany, ale nie pierakryty. Choć nie zusim zrazumieła, jakim čynam budzie vykananaje hetaje abiacańnie, uličvajučy, što stary most u čas rekanstrukcyi budzie całkam źniesieny, a na jaho miescy pabudujuć dva novyja.
Zrešty, Bieraście za apošniaje dziesiacihodździe atrymała novy most kala krepaści i pašyryła stary, jaki viadzie ad Puhačoŭki i Krasnaha Dvara kala Huźnioŭ da mikrarajona Uschod.
Na moście pastaviać duhapadobnyja lichtary, jakija buduć vyznačać jahonaje abličča, a sama kanstrukcyja atrymaje dekaratyŭnaje padśviatleńnie, jakoje budzie źmianiać koler.
Rekanstrujavana budzie taksama kalcavaja raźviazka na skryžavańni bulvara Šaŭčenki z nabiarežnaj Franciška Skaryny. Tut architektary prapanujuć pastavić dekaratyŭnuju stełu ŭ vyhladzie mietaličnaha kołca, na ŭnutranym baku jakoha raźmieščany paznavalnyja zbudavańni horada.
Ad steły śpirallu buduć razychodzicca padpornyja ścieny, z vyrašeńniem jakich pakul nie vyznačylisia — heta mohuć być pierfaravanyja aluminijevyja paneli z unutranym padśviatleńniem, abo bietonnyja ścienki ź siłuetami horada, abo prosta habijony.
«Naša Niva» — bastyjon biełaruščyny
PADTRYMAĆ
Viarnuŭsia z vajny, uładkavaŭsia ŭ Varšavie, pasvaryŭsia z usimi — i źnik. Pryjacieli pra eks-kalinoŭca Maksima Ralko, jakoha zatrymali ŭ Biełarusi1919
Kamientary