Śvietłahorski celułozna-kardonny kambinat aštrafavali na miljon dołaraŭ
Rašeńnie ab nakładańni štrafu na Śvietłahorski CKK pryniaŭ sud Homielskaj vobłaści. Ciapier pradpryjemstva pavinna pieraličyć u dziaržbiudžet 3 341 758,02 rubla štrafu i 33 417,58 rubla dziaržmyta. Pakarali jaho za škodu, naniesienuju navakolnamu asiarodździu, piša «Paleskaja Viasna».
U apublikavanaj u banku danych sudovych pastanoŭ rezalucyjnaj častcy prysudu nie paznačany pazoŭnik i artykuł, pavodle jakoha sudzili Śvietłahorski CKK. Ale z kantekstu spravy stanovicca zrazumieła, što havorka idzie pra surjoznaje parušeńnie pryrodaachoŭnaha zakanadaŭstva.
Rašeńnie ŭ zakonnuju siłu nie ŭstupiła i moža być abskardžana.
Pra toje, što Śvietłahorski CKK škodzić navakolnamu asiarodździu, žychary horada i aktyvisty kazali jašče ad momantu budaŭnictva zavoda. Suprać prajekta, jaki realizoŭvała kitajskaja kampanija i jaki budavaŭsia za košt kitajskich kredytaŭ, žychary Śvietłahorska sabrali ŭ toj čas bolš za 10 tysiač podpisaŭ. Ale da hetych mierkavańniaŭ nichto nie prysłuchaŭsia i ŭ 2017 hodzie zavod raspačaŭ pracu. U toj ža čas žychary horada i navakolnych viosak pačali skardzicca na smurod ad pradpryjemstva i na prablemy sa zdaroŭjem, jakija ŭźnikali ad takoha susiedstva.
Całkam zavod uviali ŭ ekspłuatacyju ŭ studzieni 2020 hoda. A 30 lipienia taho ž hoda zdaryłasia pieršaje nadzvyčajnaje zdareńnie sa śmiarotnym zychodam — padčas ramontnych rabot prarvała trubu sa ščołačnaj sumieśsiu: adzin budaŭnik zahinuŭ, druhi atrymaŭ surjoznyja apioki. 19 kastryčnika 2020 hoda adbyŭsia vybuch reziervuara z tałavym alejem — adzin rabočy zahinuŭ.
7 červienia 2023 hoda zdaryłasia jašče bolš strašnaja trahiedyja. U vyniku ŭspyški hazapavietranaj sumiesi zahinuli rabotniki 24, 31 i 42 hadoŭ, jašče dva čałavieki atrymali cialesnyja paškodžańni. Pavodle źviestak MNS, abyšłosia biez hareńnia, byli paškodžanyja mietaličnyja ašaloŭki troch reziervuaraŭ, u adnaho ź jakich «parušyłasia cełasnaść».
Śledčy kamitet raspačaŭ kryminalnuju spravu pa art. 302 KK (Parušeńnie praviłaŭ vytvorča-techničnaj dyscypliny, praviłaŭ biaśpieki na vybuchovaniebiaśpiečnych pradpryjemstvach abo ŭ vybuchovaniebiaśpiečnych cechach, albo praviłaŭ biaśpieki vybuchovaniebiaśpiečnych rabot). Ab chodzie rasśledavańnia ničoha nie paviedamlałasia.
Situacyja na CKK paśla červieńskaha nadzvyčajnaha zdareńnia była ŭziataja na kantrol orhanami Minpryrody «z metaj acenki ŭpłyvu taho, što adbyłosia, na navakolnaje asiarodździe».
Kola Łukašenka syhraŭ na rajali na «Dni narodnaha adzinstva». Jaho tata pierad hetym pryhraziŭ Treciaj suśvietnaj vajnoj34
Kamientary