Mody11

Luboŭ i nianaviść da Crocs: jak humovyja tapki skaryli śviet

Humovyja tapki Crocs časta zavuć samym vyrodlivym abutkam, jaki tolki bačyŭ śviet, ale, niahledziačy na ​​krytyku, niekatoryja madeli brenda raskuplajuć za ličanyja hadziny, a čystaja vyručka kampanii letaś skłała rekordnyja $3,6 młrd. U hetym abutku časta možna pabačyć błohiera Mikitu Miełkaziorava. U čym paradoks Crocs i jak chobi traich siabroŭ pierarasło ŭ šmatmiljonny biznes?

Questlove u kroksach

U 1999 hodzie try siabry, zachoplenyja adnym chobi, vyrašyli stvaryć novy typ abutku, jaki byŭ by zručny dla jachtsmienaŭ. Zapuskajučy biznes, mužčyny nie padazravali, što nieŭzabavie ich pradukcyja vyjdzie daloka za ramki jachtavaha sportu i budzie dapaŭniać łuki modnikaŭ pa ŭsim ziamnym šary.

Ad chobi — da pieršaha miljona

Ideja budučaha biznesu pryjšła vypadkova: padčas prahułki pa Karybskim mory Skot Simans pakazaŭ pryjacielam Lindanu Chansanu i Džordžu Biedekieru-małodšamu halošy kanadskaj firmy Foam Creations, zroblenyja ź lohkaj sintetyčnaj smały — krasłajta. Abutak, jaki nie ślizhaŭ i nie pakidaŭ śladoŭ na pałubie, adrazu spadabaŭsia siabram-jachtsmienam.

zasnavalniki Kroks
Stvaralniki Crocs: Skot Simans, Lindan Chansan i Džordž Biedekier. Fota: sacyjalnyja sietki.

Ale pratatyp ciapierašnich kroksaŭ patrabavaŭ dapracoŭki: jamu nie chapała važnaha elemienta — papružki, jakaja b utrymlivała abutak na nazie i dazvalała zručna jaho zdymać pry nieabchodnaści. Paśla niadoŭhich rozdumaŭ było vyrašana palepšyć kanadskuju madel i zapuścić ułasnuju vytvorčaść pad markaj Western Brands.

Da hetaha momantu kožny ź siabroŭ užo moh pachvalicca salidnym pradprymalnickim dośviedam. Biedekier vałodaŭ Oregon Food Concepts — najbujniejšym u zachodniaj častcy ZŠA frančajzieram sietki restaranaŭ chutkaha charčavańnia Quizno's. Chansan vioŭ biznes u śfiery kampjutarnaha abstalavańnia i prahramnaha zabieśpiačeńnia. Simans uznačalvaŭ kampaniju pa raspracoŭcy i vytvorčaści fatahrafičnaha abstalavańnia.

Užyŭšy svaje viedy, mužčyny raźličyli, što zmohuć vyrablać 25-30 tysiač par abutku ŭ hod, a novaje stvareńnie budzie isnavać u ramkach «dobraha chobi», jakoje zmoža prynosić nievialiki dadatkovy dachod.

kroks
Fota: placoŭka eBay

Nieŭzabavie, probnaja madel kroksaŭ — Beach — była pradstaŭlena na Mižnarodnaj vystavie łodak Fort Lauderdale Boat Show. Pieršuju partyju, usiaho 200 par, raskupili za niekalki hadzin.

Mudrahielistyja tapki choć i kaštavali trochi daražej za zvykłyja humavyja halošy, ale vyłučalisia zručnaściu. Raptam kroksy akazalisia idealnym abutkam nie tolki dla amataraŭ jachtavaha sportu, ale i dla kucharaŭ, miedycynskich rabotnikaŭ i inšych śpiecyjalistaŭ, jakija pravodziać svoj dzień na nahach.

Užo ŭ 2003-m było pradadziena zvyš 76 tysiač par, ale, niehledziačy na zacikaŭlenaść rynku, kampanija ŭsio jašče pracavała sa stratami. Minus pa vynikach taho hoda byŭ kałasalny — $1,2 młn. Nastaŭ čas niešta mianiać. Tak da kamandy dałučyŭsia Ron Snajder, jaki zaniaŭ pasadu hienieralnaha dyrektara. U chutkim časie pad jaho kiraŭnictvam zdaryŭsia rebrendynh — z 2005 hoda abutak pačaŭ vychodzić pad brendam Crocs. U hetym ža hodzie kampanija vyjšła na jeŭrapiejski rynak.

kroks
Fota: sajt Crocs

Jašče adnym dasiahnieńniem 2005 hoda byli «džybitsy» — upryhožvańni, jakija ŭstaŭlajuć u adtuliny na samich tapkach. Ich aŭtaram stała amierykanskaja chatniaja haspadynia Šery Šmielcer. Razam z mužam jana zapuściła nievialikuju vytvorčaść i prosty sajt, dzie pradavała jarkija «nalepki». Aksiesuary pačali karystacca vialikim sprosam. Crocs acanili ideju i vykupili startap za $10 młn. 

Dziakujučy dziejańniam Snajdera, prodažy rezka pajšli ŭvierch. Hazieta The Washigton Post pisała, što kroksy raspaŭsiudzilisia, «jak zaraza»: z 2005 pa 2006 hod było pradadziena bolš za 6 młn par abutku. Kampanija nie tolki vybrałasia ź minusa, ale vyjšła ŭ prybytak — u toj čas jon nabliziŭsia da $17 młn.

kroks
Fota: sajt Crocs

Impieryja Crocs imkliva rasła: sietka kram ŭklučała bolš za 6500 punktaŭ u ZŠA. Bolš za 1500 punktaŭ prodažaŭ byli adkryty jašče ŭ 40 krainach.

Adnak nieŭzabavie pačałasia doŭhaja čornaja pałasa.

Zaciažny kryzis

U 2006-m suzasnavalnik prajekta Džordž Biedekier-małodšy pakinuŭ radu dyrektaraŭ. Praz dva dni paśla sychodu jon byŭ aryštavany za pahrozu pierarezać horła svajmu ziaciu. Niahledziačy na toje, što paśla doŭhich raźbiralnictvaŭ abvinavačańni byli źniaty, historyja zakranuła reputacyju kampanii.

Paźniej emacyjny stan Biedekiera nie raz stanaviŭsia padstavaj dla čutak. Tak, u 2012 hodzie jon byŭ aryštavany za pjanuju jazdu. Padčas zatrymańnia Džorž kazaŭ, što mašynaj kiravaŭ nie jon, a śpiavačka Tejłar Śvift, ale akramia Biedekiera u sałonie nikoha nie było. I choć mužčyna ŭžo šmat hadoŭ nie pracavaŭ u Crocs, brend zhadvaŭsia ŭ kožnym skandale, źviazannym z byłym biznesoŭcam.

U druhoj pałovie nulavych rasła i kolkaść padrobak. Z hetaj nahody kiraŭnictva kampanii było vymušana źviarnucca ŭ Kamisiju pa mižnarodnym handli ZŠA i Fiederalny akruhovy sud sa skarhami ab parušeńni patentnych pravoŭ u dačynieńni da 11 kampanij. Pačalisia doŭhija ciažby.

Nie abyšoŭ kampaniju suśvietny finansavy kryzis 2008-ha. Jon baluča ŭdaryŭ pa vytvorčaści: toj hod kampanija skončyła sa strataj $185,1 młn i była vymušana ŭleźci ŭ vielizarnyja kredyty. Kab paźbiehnuć bankructva, kiraŭnictvu Crocs pryjšłosia skaracić 2000 pracoŭnych miescaŭ.

zavod Kroks
Fota: sajt Crocs

Analityki pradrakali krach: adny śćviardžali, što rynak prosta pierasyčany pradukcyjaj, inšyja — što daŭhaviečnaść hetaha abutku hulaje zły žart z vytvorcami. Hazieta The Washington Post pisała pra «paradoks Kroks»: tapki nastolki doŭha zachoŭvali tavarny vyhlad, što ludziam prosta nie była patrebna novaja para. 

U sakaviku 2009 hoda kampanija znoŭ źmianiła hienieralnaha dyrektara. Im staŭ Džon Dziurden, jaki ŭ 1990-ch uznačalvaŭ Reebok International. Daśviedčany kiraŭnik pravioŭ šerah reform: zakryŭ častku vytvorčaści, jašče bolš skaraciŭ piersanał i admoviŭsia ad nierentabielnych liniejek adzieńnia i abutku. Ale, niehledziačy na namahańni, jamu ŭdałosia tolki źmienšyć straty: «minus» za 12 miesiacaŭ składaŭ $42 młn.

kroksy
Fota: unsplash.com

Praz hod pracy Dziurden pakinuŭ pasadu, a jaho miesca zaniaŭ Džon Makkarvieł. U adroźnieńnie ad papiarednika, novy hienieralny dyrektar, naadvarot, rabiŭ staŭku na bahaćcie madelaŭ. Brend pačaŭ vyrablać baletki, čaraviki, abutak na abcasach, krasoŭki i navat futravyja kroksy. Akramia hetaha Makkarvieł źviarnuŭsia da chitraści: u kramach źmianili raskładku abutku — samyja chadavyja madeli ciapier raźmiaščalisia ŭ hłybini zały. Šukajučy ich, naviednik niepaźbiežna zaŭvažaŭ navinki.

U 2010 hodzie čysty prybytak Crocs skłaŭ $67 młn, a praz 2 hady — dasiahnuŭ $131,3 młn. Adnak ščaście było nie doŭhim: u 2013 hodzie finansavyja pakazčyki znoŭ pajšli ŭniz. Novyja madeli nie znajšli vodhuku ŭ aŭdytoryi, a kłasičnyja tapki ŭžo nasycili rynak. Prybytak abrynuŭsia ŭ 13 razoŭ u paraŭnańni z 2012 hodam i skłaŭ usiaho $10,4 młn. 

Presa pačała poŭnicca čutkami ab chutkim prodažy kampanii: Bloomberg pisaŭ, što dla Kroks šukajuć novych uładalnikaŭ.

Šlach na viaršyniu

Kryzis kiraŭnictva byŭ vidavočny: Forbes śćviardžaŭ, što ŭ 2013 hodzie ź dziesiaci členaŭ rady dyrektaraŭ tolki adzin mieŭ dośvied u abutkovaj industryi. Kamandu znoŭ źmianili, a pasadu hiendyrektara zaniaŭ śpiecyjalist ź vialikim stažam pracy — Hreh Rybat. Kampaniju čakali čarhovyja stratehičnyja reformy: skaračeńni supracoŭnikaŭ i źmiena praduktovych liniejak.

kroksy
Fota: sajt Crocs

U sakaviku 2017 hoda Rybata źmianiŭ Endru Mał. Jon zakryŭ amal treć roźničnych mahazinaŭ, pieravioŭ prodažy ŭ anłajn i zrabiŭ akcent na pramoŭcie kłasičnych sabo.

Možna skazać, što Mału pašancavała — u 2018 hodzie trend na «vyrodlivuju modu» (ugly fashion) pačaŭ chutka nabirać papularnaść, a kroksy ŭpisvalisia u jaho jak nielha lepiej. Biznesmien uchapiŭsia za tendencyju i pravioŭ šerah hučnych imidžavych kampanij. Dziakujučy im, brend uvarvaŭsia ŭ top Piper Jaffray i zaniaŭ siomaje miesca ŭ rejtynhu papularnych abutkovych firm siarod padletkaŭ.

Kroksy stali skarać i modnyja padmostki. Na Paryžskim tydni mody brend Balenciaga dapoŭniŭ łuki svaich madelaŭ roznakalarovymi tapkami z džybitsami na vysokaj płatformnie.

kroksy ad Balensiaha
Fota: sacyjalnyja sietki Balenciaga

Košt takoj pary składaŭ $850, ale, niahledziačy na ​​ceńnik, madel raskupili za niekalki hadzin. U afłajn-kramach jana prosta nie paśpieła źjavicca.

Kroksy ad Balensiaha
Fota: sacyjalnyja sietki Balenciaga

Uśled rušyli kałabaracyi z brendami Chinatown Market, Pleasures, Alife i Pizzaslime. Supracoŭnictva z maładziožnymi markami jašče bolš zamacavała za kampanijaj imidž abutku dla śmiełaj aŭdytoryi.

Taksama byli raspracavany sumiesnyja prajekty ź viadomymi muzykantami i mastakami. Madel tapak, stvoranaja sumiesna z amierykanskim repieram Post Malone, raskupili za dziesiać chvilin. Tapki, jakija ŭ dzień prodažaŭ kaštavali $59,99, ciapier na resejłach kaštujuć amal u try razy daražej — $150.

Kroks ad Post Małon
Fota: instahram śpiavaka

Nielha abyści ŭvahaj jašče adzin hučny prajekt. U lutym 2020 hoda na Tydni mody ŭ Ńju-Jorku Crocs pradstaviŭ madel, natchnionuju restaranam chutkaha charčavańnia KFC. Tapki ŭpryhožvali džypsy ŭ vyhladzie smažanaj kurycy, a asnoŭnaj fiškaj staŭ vodar abutku — para pachła smažanymi kryłcami. Kupić takoje charastvo možna było za $60.

Kroks ad KFS
Fota: sajt Crocs

Na siońniašni Crocs pradali zvyš 600 młn par abutku. Akramia kłasičnych sabo, na jakija prychodzicca 60% prodažaŭ, ciapierašni kiraŭnik kampanii robić staŭku na novuju liniejku zručnych sandalaŭ Reviva. Fiškaj madeli stanie puzyrčataja vuściłka z efiektam masažu. U roźnicy taki abutak budzie pradavacca pa canie kala $40.

Kroksy na zornym Alimpie

Za 20 hadoŭ isnavańnia Crocs zarabiŭ imidž «abutku pratestu». Tapki hetaha brenda abirajuć, kab pakazać buntarski noraŭ i niezaležnaść ad mierkavańniaŭ hramadstva. Zrazumieła, čamu hetyja pary tak palubilisia zorkam.

Naprykład, Džaścin Bibier nosić madeli, raspracavanyja ŭ kałabaracyi ź jaho asabistym brendam Drew House. Žoŭtyja i łavandavyja tapki, upryhožanyja džybitsami, vydatna ŭpisvajucca ŭ śmieły harderob muzykanta. Darečy, paśla zapusku prodažaŭ takija kroksy raskupili za niekalki sutak.

Bibier u kraksach
Fota: instahram

Amierykanski muzyka i režysior Questlove dapaŭniaje humovymi tapkami kamplekty dla ŭračystych padziej. U adnim z takich łukaŭ jon pryjšoŭ na cyrymoniju ŭručeńnia premii Oskar-2021. A praz hod zavitaŭ u kroksach na mierapryjemstva ŭručeńnia premii Hremi.

Fota: pinterest.com

Darečy, arhanizatary Oskara nie ŭzradavalisia takomu chodu, bo niezadoŭha da mierapryjemstva razasłali ŭdzielnikam list z prośbaj prytrymlivacca bolš uračystaha dres-kodu.

U harderobie Kim Kardašjan taksama možna zaŭvažyć humovyja tapki: jana ŭładalnica pary ź limitavanaj kalekcyi z KFC, kroksaŭ na abcasach ad Balenciaga, a taksama niekalkich kłasičnych madelaŭ.

Kim u kroksach
Fota: pinterest.com

Zorka «Vyratavalnikaŭ Malibu» Pameła Andersan nie adstaje ad trendaŭ. Jana, jak i Kim, nosić madeli na abcasach.

Pameła Andersan u kroksach
Fota: pinterest.com

Ź biełaruskich sielebryci kroksy lubić błohier Mikita Miełkazioraŭ.

Fota: instahram Miełkaziorava

Dziakujučy śmiełamu dyzajnu i kreatyŭnaj pijar-stratehii, siońnia kroksy dapaŭniajuć harderoby modnikaŭ z usiaho śvietu. Niekatoryja madeli, jakija ŭ momant zapusku prodažaŭ kaštavali niekalki dziasiatkaŭ dalaraŭ, zaraz pradajucca jak sapraŭdny skarb — za tysiačy. 

Kroksy, darečy, stali vyrablać i biełaruskija fabryki. Jarkuju madel vypuścili na «Marka».

Marko
Źleva — Crocs, sprava — «Marka». Fota: sajty brendaŭ

Kamientary1

  • daviedka
    31.10.2023
    Mokryje kroksy. 

Čamu ŭ Mazyry amal dvoje sutak nie mahli adnavić elektrazabieśpiačeńnie? I pry čym tut vajna4

Čamu ŭ Mazyry amal dvoje sutak nie mahli adnavić elektrazabieśpiačeńnie? I pry čym tut vajna

Usie naviny →
Usie naviny

Źmitra Daškieviča buduć sudzić pa novaj kryminalnaj spravie ŭžo na hetym tydni7

Łatuška: Ja mahu bajacca pić vadu ci kavu ŭ hramadskich miescach13

Kala miažy Polščy ź Biełaruśsiu ahresiŭnaja moładź atakavała polskich vajskoŭcaŭ VIDEA27

18-hadovaha chłopca z Bychava sudziać za «zdradu dziaržavie»9

U Biełarusi nie buduć reahavać na ŭviadzieńnie Łatvijaj zabarony ŭjezdu dla biełaruskich aŭtamabilaŭ4

U Hrodnie źbirajucca pravieści «svojeasablivy vals» BTR-aŭ1

Labiedźka: Biełaruskaja mova pavinna stać adzinaj dziaržaŭnaj. Ale treba zakłaści pierachodny pieryjad20

Dziakujučy ŭrahanu ŭ Homieli zrabili navukovaje adkryćcio3

Karbalevič: Minsk zahavaryŭ pa-inšamu, ale heta pakul tolki słovy, dziejańniaŭ minimum1

bolš čytanych navin
bolš łajkanych navin

Čamu ŭ Mazyry amal dvoje sutak nie mahli adnavić elektrazabieśpiačeńnie? I pry čym tut vajna4

Čamu ŭ Mazyry amal dvoje sutak nie mahli adnavić elektrazabieśpiačeńnie? I pry čym tut vajna

Hałoŭnaje
Usie naviny →