Jak prapuskajuć praź miažu tych, chto nie paviedamiŭ pra svoj DNŽ, kartu palaka abo inšaje hramadzianstva
Pa novym zakonie biełarusy z zamiežnym hramadzianstvam ci DNŽ musili paviedamić pra hetyja dakumienty ŭ MUS da 10 kastryčnika. U čatach stali pisać, što na miažy praviarajuć i nibyta navat razvaročvajuć tych, chto hetaha nie zrabiŭ. Ci tak jano? «Naša Niva» apytała ludziej, jakija niadaŭna pierasiakali miažu.
«Navat u ruki dakumient nichto nie braŭ»
«Naša Niva» pahavaryła ź niekalkimi ludźmi, jakija majuć zamiežny DNŽ i pierachodzili miažu na hetym tydni. Bolšaść raskazali, što nijakich źmien na sabie nie adčuli.
«Vyjazdžaŭ ź Biełarusi praz «Pryvałku» try dni tamu, padaŭ pašpart i dakumienty na aŭto, pamiežnica navat nie pacikaviłasia, čamu ŭ mianie niama vizy i na jakich padstavach ja płanuju trapić u ES», — kaža mužčyna z polskim DNŽ.
Inšy čałaviek, jaki jechaŭ praz «Brest», kaža, što biełaruskija pahraničniki spytali ŭ jaho, ci maje toj druhi pašpart abo DNŽ.
«Ja adkazaŭ, što ŭ mianie DNŽ, paprasili pakazać, ale navat u ruki jaho nichto nie braŭ i nie pytaŭsia, ci padavaŭ ja źviestki», — kaža mužčyna.
Biez dadatkovych pytańniaŭ
Adna z našych surazmoŭcaŭ padała źviestki pra polski DNŽ praz ambasadu. A kali viartałasia z Polščy ŭ Biełaruś, to biełaruskija pamiežniki nie prasili jaje pakazać dakumient.
Inšaja žančyna, jakaja jechała ŭ Biełaruś z Polščy, taksama kaža, što nichto nie cikaviŭsia najaŭnaściu DNŽ abo hramadzianstva Polščy.
«Źviestki pra DNŽ jašče nie padavała, a na miažy nichto nie cikaviŭsia. Zajazdžała pa zvyčajnym biełaruskim pašparcie bieź vizy», — kaža žančyna.
Praź miažu pajechaŭ z daviedkaj ab pastanoŭcy na ŭlik
Dalnabojščyk, jaki dniami jechaŭ na kadencyju ŭ Litvu i maje DNŽ hetaj krainy, kaža, što na vyjeździe pamiežniki spytali jaho, na jakoj padstavie jon źbirajecca trapić u Litvu.
«Skazaŭ, što maju pracoŭny DNŽ i što ŭžo padaŭ źviestki ŭ MUS. Ale pakazać kartu (DNŽ) nie prasili, jak i daviedku pra pastanoŭku na ŭlik, jakuju ja na ŭsialaki vypadak braŭ z saboj, kab nie było lišnich pytańniaŭ», — kaža mužčyna.
«Pamiežnica spytała, ci padali my źviestki»
Siamja biełarusaŭ, jakija daŭno žyvuć u Polščy i majuć polskaje hramadzianstva, kaža, što na ŭjeździe ŭ Biełaruś praz punkt propusku «Katłoŭka» ad ich patrabavali pakazać pašpart abo DNŽ.
«Ad pačatku leta my ŭžo treci raz jedziem u Biełaruś i kožny raz u nas pytajuć pra zamiežnyja dakumienty. Da hetaha razu pakazvali id-karty i hetaha było dastatkova, ale ciapier skazali, što patrebny papiarovy pašpart.
Pamiežnica paraŭnała danyja i foty ź biełaruskimi pašpartami, spytała, ci padali my źviestki. My ščyra adkazali, što nie padavalisia. U vyniku heta nijak nie paŭpłyvała, bo nas biez prablem puścili ŭ Biełaruś», — kaža surazmoŭca.
Mužčyna vykazvaje zdahadki, što pavyšanaja cikavaść da zamiežnych dakumientaŭ u ich vypadku abhruntavanaja tym, što jany majuć biełaruskija pašparty sieryi RR.
11 lipienia 2023 hoda ŭstupili ŭ siłu źmieny ŭ zakon «Ab hramadzianstvie Respubliki Biełaruś». Zhodna ź imi, hramadzianie Biełarusi, jakija majuć zamiežny dakumient (hramadzianstva, dazvoł na žycharstva, inšy dakumient, jaki daje prava na lhoty), abaviazanyja painfarmavać pra heta orhany ŭnutranych spraŭ abo dypłamatyčnaj słužby na praciahu troch miesiacaŭ z dnia ŭstupleńnia ŭ siłu zakona.
«Amal hadzinu prasiadzieŭ u čarzie». Jak biełarusy padavali źviestki pra DNŽ
Kamientary