U Polščy pieramahła apazicyja. Jak heta adabjecca na Biełarusi
Spytali ŭ palitołaha, jak pieramoha apazicyi na parłamienckich vybarach u Polščy moža paŭpłyvać na adnosiny pamiž aficyjnym Minskam i Varšavaj.
Ci varta čakać źmien?
Na parłamienckich vybarach u Polščy kansiervatyŭna-nacyjanalistyčnaja partyja «Zakon i spraviadlivaść» (PiS), jakaja była va ŭładzie z 2015 hoda, nabrała na vybarach najbolš hałasoŭ (35,38%). Ale naŭrad ci jana zdoleje sfarmiravać urad. Čakajecca, što ŭrad uznačalić «Hramadzianskaja kaalicyja», bo da jaje dałučycca inšaja apazicyja.
Palityčny ahladalnik «Radyjo Svaboda» Valer Karbalevič adznačaje, što choć skład novaj uradavaj kaalicyi ŭ niejkim sensie budzie ŭpłyvać na adnosiny pamiž Varšavaj i Minskam, heta nie pryviadzie da niejkich pryncypovych źmien u dvuchbakovych adnosinach.
«Składanaści, jakija siońnia isnujuć, abumoŭlenyja davoli hłybokimi fundamientalnymi pryčynami, tamu na ich mała ŭpłyvajuć palityčnyja partyi, jakija buduć uznačalvać novy ŭrad», — ličyć Karbalevič.
Pry hetym, na dumku palitołaha, sam kaniec vybarčaj kampanii moža niejkim čynam paŭpłyvać na adnosiny pamiž krainami, bo palitykam bolš nie treba budzie ahladacca na pazicyju elektaratu.
«Im bolš nie treba reahavać na tyja ci inšyja dziejańni z ahladam na vybarčuju kampaniju. Tamu mienavita sam fakt zaviaršeńnia elektaralnaj kampanii moža bolš upłyvać na adnosiny i pavodziny, čym toje, jakaja składziecca ŭradavaja kaalicyja».
Što pieramoha apazicyi aznačaje dla biełaruskaj dyjaspary?
Što tyčycca pieramien u staŭleńni da biełaruskaj dyjaspary i demakratyčnych siłaŭ Biełarusi, to, na dumku ekśpierta, nijakich hruntoŭnych źmien tut čakać taksama nie varta.
«Polšča łajalna stavicca da biełaruskaj dyjaspary, mahčyma, jana źjaŭlajecca navat samaj łajalnaj siarod krain ES. Tamu naŭrad ci stvareńnie novaj uradavaj kaalicyi moža niejak na heta paŭpłyvać».
Valer Karbalevič ličyć, što źmieny sił va ŭradzie ŭ pieršuju čarhu mohuć pryvieźci da narmalizacyi adnosin pamiž Varšavaj i Brusielem.
«Budzie mienš kanfliktnych punktaŭ. Dziejańni va ŭsich śfierach mohuć stać bolš sinchronnymi», — miarkuje Karbalevič.
Taksama analityk vykazvaje zdahadku, što paśla vybaraŭ ścišycca i publičnaja palemika, jakaja była pamiž Varšavaj i Kijevam, bo novaja kaalicyja va ŭradzie bolš aryjentujecca na ahulnuju pazicyju krain Zachadu.
Pry hetym, na dumku Karbaleviča, heta nie budzie aznačać, što padtrymka Ukrainy zmoža stać bolš mocnaj.
«Abjom dapamohi jak zboku Polščy, tak i inšych krain Zachadu maje limity mahčymaściaŭ. Tym bolš, kali ciapier pačałasia vajna na Blizkim Uschodzie. Tamu pa abjektyŭnych pryčynach abjom dapamohi pašyracca nie budzie. I hety čyńnik bolš važny, čym žadańnie ci imknieńnie pavialičyć tuju dapamohu ŭ niezaležnaści ad taho, buduć heta staryja ci novyja kiraŭničyja elity», — adznačaje ekśpiert.
Tamu, na dumku palitołaha, źmieny va ŭradzie ŭ pieršuju čarhu buduć upłyvać na źmieny va ŭnutranaj palitycy Polščy, a nie ŭ źniešniaj.
Čamu refierendum pravaliŭsia?
Paralelna z vybarami ŭ parłamient, na jakich była zafiksavanaja rekordnaja jaŭka, u Polščy prachodziŭ refierendum, jaki pravaliŭsia praz toje, što ŭdzieł u im pryniali mienš za 50% vybarščykaŭ.
Adno z čatyroch pytańniaŭ, vyniesienych na plebiscyt, tyčyłasia Biełarusi. Dakładniej, aharodžy na miažy pamiž krainami.
Nizkuju cikavaść da refierendumu palityčny ahladalnik tłumačyć tym, što jon byŭ absalutna štučnym. I prydumany partyjaj PiS dziela taho, kab zaachvocić i mabilizavać svoj elektarat.
«Heta było vidavočnym dla ŭsich, tamu amal usie apazicyjnyja partyi faktyčna vystupili suprać hetaha refierendumu. Možna kazać, što ŭ im i ŭdzielničaŭ tolki «pisaŭski» elektarat, tamu i vyniki adpaviednyja.
Kali kazać pra pytańnie aharodžy na miažy ź Biełaruśsiu, to jano naohuł štučnaje i niełahičnaje, bo aharodža ŭžo faktyčna pabudavanaja. Pytańnie było aryjentavanaje na toje, kab zaachvocić bolš ludziej padtrymlivać PiS.
Tamu bolšaść vybarščykaŭ zrazumieła štučnaść i palityzavanaść takich pytańniaŭ, źviazanych mienavita z vybarami, a nie z realnymi prablemami, jakija isnujuć u polskim hramadstvie», — ličyć palitołah.
Ci vykarystaje Łukašenka źmienu ŭłady ŭ Polščy, kab pierazahruzić adnosiny z Varšavaj? Pabačym pa adnym prostym kroku
«Azaronkaŭščyna — heta najvyšejšaja forma łukašyzmu». «Tok» z Valeryjem Karbalevičam
«Vyrašyš uciačy — pałamaju nohi». Były palitviazień raskazaŭ ab pracy na chimii pa 18 hadzin na dzień1
Kamientary
heta fakt. heta ciažka nie zaŭvažyć navat prosta nazirajučy, što nazyvajecca, zboku
chto zojmie miescy ŭ nas? kitajcy? niehry? araby? (nie chaču nikoha pakryŭdzić)